آلبر کامونون "یابانجی"کیتابینین ایلک سطری بئله باشلانیر : آنام بو گون اؤلدو. بو باشلانقیج،اولدوقجا ایلگینج دیر. بیر اؤرنک داها وئریم : فرانتس کافکانین "مسخ"کیتابینین ایلک سطری بئله باشلانیر : گرگوار سامسا یوخودان آییلدیغیندا اؤزونو حشره یه چئوریلمیش بیری اولاراق گؤردو.دونیا ادبیاتی بو تیپ اؤرنک لردن دولودور . بلکه ده ایلگینج بیر شئی دئییل آنجاق، بو باشلانقیج لاردان اؤنملی بیر دوشونجه اورتایا چیخیر.

دوشونجه بودور: بو کیتابلارداکی ایکی کاراکتئرین ده،-مورسو -سامسا- بیلینج لی اولاراق بو سطرلری دئییب و یاشامالاری. بیر اولایی بیلینج لی اولاراق آچیقلاماق، او اولایین کؤکدن بؤیوک بیر اولای یوخ،بلکه بؤیوتولموش بیر اولای اولاراق گؤرولمه سی دیر. بس بیر اولای یادا ائیلم ندن بؤیوتولور؟ آماج ندیر؟ یازار نه یی آچیقلاماق ایسته ییر؟

بیر میثال ایله یازیمی آیدینلاشدیرماغا چالیشاجاغام. نوری بیلگه جئیلانین "قیش یوخوسو"فیلمینده باش رول دا اوینایان کاراکتئر "آیدین" نین فیلمی کیچیجیک بیر اولای لا باشلانیب-ائولرینین بیرینده کیرا اوتورانلارین بیرینین اوشاغی آرابانین شوشه سینه داش آتیر- سونرادان ایسه بو کیچیک اولای دان بؤیوک بیر ائیلم باشلانیر و کاراکتئرین سونسوز کدرلری کیمی سونسوز بوراخیلیر. فیلیمده کی کاراکتئرین آدی "آیدین" دیر .آیدین ،تئاتر اوخوموش، هتئلینین آدی هملئت دیر.و تئاترین تاریخی آددا بیر کیتاب یازماق ایسته ییر. مورسودا آیدین دیر.سامسا دا آیدین دیر آنجاق، دوشونجه اولاراق فرقلی آیدیندیرلار.

کیچیک بیر اولایی بؤیوتمک ده آماج ندیر؟

آماج بللی دئییل دوغروسو.بللی دئییل چونکو ،بللی اولسا ایدی اولای ساییلمازدی. بیر اولایی آچیقلاماق اوچون، اینجه له مه لی سن.اینجه لنمه لی بیر اولای هر زامان اوستو اؤرتولو بیر یارا کیمی دی.اوستونو آچدیسانیز، قاباغکی یارا یئرینه راستلاشمیریق چونکو اوولده کی گئچمیشه عاییددیر.آما بو ایندی نین دیر.یانی کئچمیشین گله جه ییله اوز اوزه ییک. بس یازار؟ یازارین آچیقلاماق ایسته دیی بیر شئی یوخ اورتادا. یازار ،سادجه اولایین ایچینده قالیر. یارانین اوستونو اؤرتموش بیر تیکه پارچا کیمی. اصلینده بیلینج لی اولان یازار دئییل .یازارین دردلرینین اوغروندا شهید یادا حارام اولان کاراکتئردیر.