یازاری‌نین کیم اولدوغونو و هانسی اورقان طرفیندن یاییملاندیغینی بیلمه‌دن اوخوموشدوم «اون‌ایکی شهریور» کیتابینی. هله ده دادی داماغیمدادیر.

سونرا اؤیرندیم کی ۱۳۲۵ شهریورینده، فرقه‌نین تبلیغات شعبه‌سی طرفیندن، کئچن بیر ایلین اولایلارینی قاپساملی شکیلده اورتایا قویماق مقصدیله یاییملانمیش او کیتاب، داها سونرالار برلینده یاشایان تورک آیدینلاری طرفیندن توپلاناراق ۱۳۵۸ ده تبریزده تکرار یاییملانمیشدیر. کیتابین فارسجا ترجمه‌سی ده چوخ تمیز بیر چئویری و کیفیتلی جیلید و چاپلا، ایلک دفه ۱۳۵۸ و سونرالار تقریبی اولاراق ۱۳۷۱ ده تبریزده یاییملانیبدیر. چئویری‌نین اؤن‌سؤزو کیتابی توپلاییب چئویرنلری بئله تقدیم ائدیبدیر: کیتاب ایرانلی مترقی تورک روشنفکرلر جمعیتی طرفیندن یاییملانیبدیر.

بو جمعیت ۱۳۵۰ ایللرینده دوکتور زهتابی باشچیلیغی ایله برلینده یارانیب و اونون رسمی اورقانی اولاراق «بیرلیک» آیلیق قازئته‌سینین ایلک ساییسی ائله اون‌ایکی شهریورین اوتوز ایللیگینده (۱۳۵۴/۶/۱۲) نشر ائدیلمیشدیر. بیرلیک قازئته‌سینین مودورو و باش یازاری دوکتور زهتابی ایدی. دؤرد ایل یاریم سورن بو قازئته ایلک ساییسیندا اؤز هدفینی بئله آچیقلامیشدی: بو نشریه‌نین ایلک هدفی ایرانلی مترقی تورک روشنفکرلرله، وطندن خاریجده یاشایان تورک روشنفکرلر آراسیندا علاقه، فیکیر و هدف بیرلیگی یاراتماقدیر.

زهتابی وطنه قاییدالی دوکتور حسینقلی کاتبی و دوکتور جواد هئیت باشچیلیغی ایله قورولموش «آذربایجان جمعیتی» ایله «ایرانلی مترقی تورک روشنفکرلر جمعیتی» بیرلشیب، بیرلیک قازئته‌سی هر ایکی جمعیتین رسمی اورقانی اولاراق تبریزده نشر ائدیلیر. زهتابی او ایللرده بیرلیکدن علاوه «ارک» درگی‌سینی یاییملاماغا باشلامیشدی. ارک درگیسی هرنه‌دن اوول کئچن دؤرد ایل یاریمدا برلینده یاییملانان بیرلیک قازئته‌سینی دؤرد مجموعه‌ده توپلاییب چاپا وئرمیشدی. هر مجموعه ۸۶ صحیفه ده، تبریزین مستقیمی بازارچاسیندا چاپ اولوب آلتی تومنه ساتیلمیشدی. اون‌ایکی شهریور کیتابی‌نین هم تورکجه‌سی، هم ده فارسجا ترجمه‌سی ائله همن ارک درگیسینده چاپ اولموشدور.
او کیتابین اوخوماسینی بوگونه قدر اوخومامیش بوتون دوسلاریما تکلیف ائدیریم.