خالق آرتیستی، تارزن رامیز قولیئودن اؤنجه ده اونلو تارزنلریمیز، خالق آرتیستلریمیز اولوب، رامیز معلمله عینی دؤورده ده بئله صنعت‌چیلر وار و یقین، گله‌جک‌ده ده اولاجاق. تار یئنی موسیقی آلتی دئییل، تارزه‌ن‌لیک آذربایجان‌دا، عموماً بیزیم ده عایید اولدوغوموز جغرافییادا – شرق‌ده اؤزونمخصوص گلنکلره مالیکدیر. بس ان آزی بو دئدیکلریمیزین فونوندا رامیز قولیئوی بیزلره سئودیره‌ن، اونو فرق‌لی قیلان نه(لر)دیر؟ حؤرمتلی رامیز معلم تارزن‌لیک پئشه‌سینی، صنعت یولونو سئچممیش اولسایدی، نه باش وئرردی؟

منجه، رامیز معلم کلاسسیک ارثه صداقتی و یئنی‌لیکلره آچیق‌لیغی ایله سئچیلیر. او، صنعتله علمی قوشا قاناد کیمی داشییانلاردان و هر ایکی ساحه‌ده یئنی‌لیکلرده ایمضاسی اولان آیدینلاریمیزدان‌دیر. رامیز معلم صنعت مکتبی، معلم گؤرموش و اؤزو ده معلم اولان – اوستاد صنعت‌چی‌دیر. صنعتی تالع کیمی یاشادیغین‌دان‌دیر کی، یالنیز اونون یانینا، سینفینه، اوستاد درسلرینه گلن قیراق یئتیرمه‌لری دئییل، اؤز اؤولادی دا صنعت اعجازین‌دان نسیبینی آلیب، اونون فیزیکی اؤولادی اولماقلا یاناشی، معنوی اؤولادی دا اولدو.

تارزن رامیز قولیئو آز قالا بوتون بؤیوک صنعتچیلر حاقین‌دا دئییله‌ن «او صنعتی یاشاییر» دئییمینی هر ایفاسین‌دا گؤستریر – یعنی طبیعی حالی ایله بیز اوستادین صنعتی یاشایا-یاشایا ایفا ائتدیینه شاهید اولوروق – اوز-گؤزون‌ده، بارماقلارین‌دا، قولون‌دا جریان ائد‌ن انرژی سئلی ایله... و رامیز معلم بؤیوک صنعت‌چی اولماقلا یاناشی، کوبار و صمیمی، ساده اینساندیر. نه گیزلدک، اؤزللیکله باخ بو مقام هئچ ده هر صنعت‌چی‌ده راست گلینه‌ن حال دئییل...

اگر رامیز معلمین بوتون قالان ایفالاری مؤوجود اولماسای‌دی بئله، «آی ایشیغین‌دا» و «لپه‌لر»دکی مکمل ایفاسی اونون ایچ دونیاسینی، خیاللارینی، بو خیاللارین افقی گنیشلیینی (و درینلیینی)، صنعت‌چی صیقلتینی (صنعت لیاقتینی!) گؤسترمه‌یه یئترلی اولاردی...

ایستر آی ایشیغینی، ایستر لپه‌لری سئیر ائدرکه‌ن طبیعتین گؤزوموزه سیغدیرا بیلمدییمیز اسرارینی، گؤزللیینی... خالق آرتیستیمیز، علم خادیمیمیز صنعتین اعجازی ایله کؤنلوموزده شکیللندیریر، روحوموزو قیدالاندیریر... خالق یازیچی‌سی آنارین سؤزلری ایله دئسک، «صنعت اؤز استتیک دیرلری ایله اینکیشاف ائتمه‌لی‌دیر» فیکری خالق آرتیستینین ایفالارین‌دا تجللا ائدیر، بیر اؤرنک تشکیل ائدیر.

اوستاد تارزن تورکییه، پاکیستان، افغانیستان، هیندیستان، سورییا، ایران، عراق، ایسرایل، اینگیلتره، ایسوچره، نوروژ، آلمانییا، هللاندییا، دانیمارکا، فرانسا، الجزایر، تونیس، آمریکا، کانادا و ب. اؤلکه‌لرده کونسرتلر وئریب. هابئله «بؤیوک ایپک یولو» فستیوالی چرچیوه‌سینده یاپونییانین ۳۰-دان آرتیق شهرین‌ده کنسرتلری تشکیل اولونوب.

۱۹۹۴-جو ایلده تورکییه‌نین ازمیر شهرین‌ده (اژه اونیورسیتتین‌ده)، ۱۹۹۷-جی ایلده ایسرایلین یئروسلیم شهرینده و ۲۰۰۲-جی ایلده تهران دؤولت مدنیت و اینجه سنت اونیورسیتتین‌ده «اوستاد درسلری» وئریب. آذ بیر حیصه‌سینی سادالادیغیمیز بو جدی صنعت اوغورلاری رامیز معلمین صنعت اوغورلارینین جوغرافییاسینی گؤسترمک‌ده‌دیر. بیلیرسینیز، بو دئییله‌نلر اؤزلویون‌ده آذربایجان تارینین دونیادا اعترافی، آذربایجان تار ایفاچیلیغینین صنعت بیلیجیلری گؤزون‌ده‌کی دیری و رامیز قولیئوین صنعت ائلچیسی اولاراق شخصیتینی بیر داها گؤسترمک‌ده، تصدیق ائتمک‌ده‌دیر. و چوخ غروروئریجی‌دیر! بلی، اؤلکه‌میزین، خالقیمیزین آدی بئله بایراقلاشیر، صنعت بایراغی بئله اوجالدیلیر! صنعت و صنعتچینین اؤز دؤولتینه خیدمتی، اؤز خالقینا باغلی‌لیغی، البته، صنعتین اینکیشافینا وئردیی تؤهفه‌لر تاریخین اونوتمایاجاغی حادثه‌لردیر.

اوستاد صنعت‌چیلر بهرام منصوروو، احمد باکیخانوو، مشهدی جمیل امیروو رامیز قولیئوین صنعت دونیاسین‌دا هانسی ایزلری بوراخیبسا، رامیز قولیئو ده اؤزون‌دن سونراکیلارا او میقیاس‌دا و بلکه داها آرتیق درجه‌ده تأثیرلره مالیکدیر. هر سونراکی صنعتچی اؤزوندن اؤنجکیلرین قالخدیغی زیرونی اساس آلاراق، محض او مقام(لار)آ ایستیناد ائد‌رک، بیر سونراکی زیروه‌یه بویلانیر. صنعتده زیروه‌لر طبیعت‌ده‌کی زیروه‌لردن فرقلی اولاراق، سون‌لو دئییل: هر صنعتچی اؤز زیروه‌سینی یارادیر، یاخود هر زیروه اؤز فاتحینی گؤزلییر..!

یئنی صنعت فتحلرینه اینام حسی ایله حؤرمت‌لی خالق آرتیستیمیزی قازاندیغی بوتون زیروه‌لر مناسیبتی و علامتدار یوبیلئیی ایله باغلی اورکدن تبریک ائدیر، محکم جان ساغلیغی، یئنی-یئنی صنعت اوغورلاری دیلییرم! ان بؤیوک دیلییمسه، نؤوبتی آد گونلرینی دوغما آغدام‌دا کئچیرمه‌سی‌دیر!

آغدامین آغ گونونو بسته‌له‌مک، صنعت اعجازینا قالدیرماق نصیبینیز اولسون، اوستاد!