داغ کیمی آدام

یوردوندان سون اولاراق ۱۹۴۲ ایلین سون باهاریندا آیریلدی. بو آیریلیق چوخ آجی اولدو. یوردونا بیر داها دؤنمه‌یه‌جه‌یینی حیس ائدیردی. ایستاسیوندا آناسی، باباسی، قارداشلاری، قوهوم اقرباسی توپلانمیشدی. چینگیز واقون پنجره‌سیندن اونلارا باخارکن حایاتی‌نین آجی دادلی گونلرینی دوشونوردو.

آناسی ساغ الینی اونا دوغرو قالدیرمیش، سول الیله اوموزوندان آشاغی سارخان آتقیسی‌نین اوجونو توتاراق گؤزلرینین یاشینی سیلیردی. ترن سون بیر دودوک داها چالدی، سونرا لوکموتیوین باغریندان فیشقیران قارا بیر دومان آرالارینا گیررک اونلاری بیربیرلریندن آییردی. قاتارین پنجره‌سیندن، اللریندن آلینمیش آتا توپراقلارینا باخدی، باخدی. او توپراقلار، واقونلارین تکرلری آلتیندا ایلین قانلی ماهنیسی‌نی سؤیله‌ییردی. چینگیز او ماهنینی ساعاتلارجا دینله‌دی، سونرا آللاهیم، آللاهیم دئیه یاخاریب سن بیزی آییرما بو توپراقلاردان دئدی. بو توپراقلار بیزیمدیر. آتالاریمیزین میراثیدیر. آج چیلپاق قالساق دا بو توپراقدا اولالیم. اؤلسک ده بو توپراقدا اؤله‌لیم. وطن، وطن، دونیانین هانسی بوجاغیندا اولورسام اولاییم، بن یاشادیقجا سن ده بیزیمله برابر یاشایاجاقسان.
بو جومله‌لر قیریم تاتارلاریندان قالخان شؤهرتلی رومان یازاری چینگیز داغجی‌نین وطندن آیریلدیغی آنلاری تصویر ائدیرلر. چینگیز او گوندن بئله وطنین گؤروشونه حسرت قالیب یئتمیش ایل سونراسی لندن‌ده اؤلدو. او اؤلن گون تورکییه خاریجی‌ایشلر باخانی؛ احمد داوداوغلو آغلار گؤزلرله، اوکراینا مقاملاری ایله گؤروشوب یئتمیش ایل سورگون یاشایان عسگرین جسدینه، وطنه دؤنمک ایجازه‌سی آلدی. جسد آغ‌مچیدین یوز کیلومئترلیگینده یئرلشن قیزیل‌داش کندینده تورپاغا تاپشیریلدی. یانی وطنه باغلی اولان اورک، هر حالدا وطنه دؤنه‌جک. چیرپینا چیرپینا گلمه‌سه‌ده بئله جسدی یقین گله‌جک.