«چرنوبیل» سئریالی پلانئتین زهر تولوغو اولان بو مکانی زیارتگاها چئویریب. حاضردا دونیانین موختلیف اؤلکه‌لرین‌دن بورایا اینسان آخینی وار.

عمومیتله، چاغداش دونیا اینسانینین مدنیلشمه پروسسی چوخ قانلی و پراگماتیک گئتدیی اوچون بو گون حتی سیویل جمعیت‌ده ده آقرسییا، هگمون اولماق آرزوسو مشاهیده ائدیلیر. اینسانلیق آرتیق باشقا اینسانلارین فاجعه‌سی اوزرین‌دن پول قازانماغا و باشقالارینین فاجعه‌سین‌دن زؤوق آلماغا باشلاییب. مثلاً، اوکئانین دیبین‌ده «تیتانیک» گمی‌سینی یاریم عصر آختاردیلار و تاپان‌دان سونرا معلوم اولدو کی، گمینی سرگیله‌ییب پول قازانماق اوچون آختاریرمیشلار.

یاخود دا موزئیلرده کلله سوموکلری، ایشگه‌نجه آلتلرینین نوماییشی کئچیریلیر.

ایندی ایسه چئرنوبیلا کوتلوی تورلار تشکیل اولونور. اونمینلر، بلکه ده یوزمینلرله اینسانین فاجعه‌سی آرتیق استراحت، سیاهت اوبیئکتینه چئوریلیب.

اصلین‌ده دونیانین موختلیف اؤلکه‌لرین‌ده بو تیپ «قان‌لی فستیواللار» وار. مثلاً، پاریس‌ده یئرلشه‌ن کاتاکومبا موزئیین‌ده ۶ میلیون اینسانین کلله سومویو سرگی‌لنیر. موزئیه گیریش ایسه ۱۰-۱۵ آورودور.

ایتالییانین پالئرمو شهرین‌ده‌کی کاپوچین موناستیرین‌دا مینلرله جسد سرگی‌لنیر. بو دهشت‌لی «آچیق قبیریستانلیغا» هر ایل یوزمینلرله توریست گلیر.

یعنی دونیایا مدنیت درسی وئره‌ن ایکی اؤلکه - فران‌سا و ایتالییا مئییت‌دن پول چیخارماقلا مشغول‌دور. بئله دئیک، پول قازانماغین ان آسان یولونو کشف ائدیبلر.

تاریخ‌ده ایلک موزئی ائرادان اول ۴-جو عصرده، یوزمینلرله اینسانین اؤلدورولدویو ایسگندرییه‌ده یارادیلیب. موزئی علم و صنعت مرکزی اولوب. قریبه‌دیر کی، بورادا اؤلدوروله‌ن یوزمینلرین کلله‌سینی سرگیله‌مک ایبتی‌دای، قولدار بابالاریمیزین آغلینا گلمه‌ییب.

بئله موزئیلرله باغلی ساختا بیر تئزیس اورتایا آتیلیر: «اینسان فاجعه‌لرینی گؤسترمک اوچون یارادیلیب». ندنسه اینسان فاجعه‌لرینی گؤستره‌ن بو موزئیلره گیریش پول‌لودور. یعنی تئزی‌سین اصلی بئله‌دیر: «اینسان فاجعه‌لری اوزرین‌دن پول قازانماق اوچون موزئی یاراتدیق».

وحشیجه‌سینه اؤلدورولموش اینسانلارین سوموکلرینی ایزله‌مک هوه‌سی هان‌سی پسیخولوژی حالین نتیجه‌سی‌دیر - بو، باشقا بیر صحبتین مؤوضوسودور.

عمومی‌لیک‌ده گلدییمیز نتیجه بودور: مودئرن دونیادا هر شئی، حتی بئله مقاملاردا صنعت ده اینسانی قان تؤکمک، قانی ایزله‌مک آرزوسونا سؤوق ائدیر.

۲۱-جی عصر اینسانی قاپی-قاپی دوشوب، دونیانین ان گؤزل اؤلوسونو آختارماقلا مشغول‌دور.