خوی شهرینی کیمیسی اسکی تاریخی ایله تانیییر، کیمیسی گونه‌باخان گول‌لری ایله تانیییر، کیمیسی دونیادا شؤهرت قازانمیش بالیق طرحلی قالی‌لاری ایله تانیییر. آنجاق، چوخ‌لاری بو شهرین کئچمیش چاغ‌لاردا قیزیل گول‌لری ایله بیر ده اینجه ایپک‌لری ایله تانینمیش اولدوغونو بیلمه‌ییرلر.

ایپکچی‌لیک پئشه‌سینین بو شهرده یایقین اولدوغونو یالنیز بوگون گؤردویوموز توت آغاج‌لارینا گؤره یاخود ائشیتدیییمیز "خوی توتو" کیمی سؤز بیرلشمه‌لرینه گؤره دیله گتیرمه‌ییریک. تاریخ بویو یاقوت حموی هابئله ابن اثیر کیمی بیر چوخ یازیچی بو شهرین ایپه‌ییندن سؤز آچمیشلار.

ائله خویون قیزیل گولو ده تاریخ بویو بیر چوخ شاعیری ماراقلاندیرمیش‌دیر. آلتینجی – یئددینجی یوز ایل‌لیک‌لرین شاعیری "ظهیر خونجی" روباعی‌لرینین بیرینده قیزیل گولون کؤکونو خویدان بیلمیش! (کئچمیش فارس ادبیاتیندا "گول" سؤزو اؤزل اولاراق "قیزیل گوله" دئییلیرمیش):

گل را که مبارک رخ و فرخنده پی است
هر جا که بود، زینت آنجا ز وی است

گفتم ز کدام شهری، ای من خاکت
گفتا: نشنیده‌ای که اصلم ز خوی است