سورقو: ملی حرکتده ندن دایازلیق و اخلاقسیزلیق چوخ گؤزه چارپیر؟ ندن بعضی آخین و جریانلار هر جوره تنقیدن آماندادیر و اؤزونو مصون بیلر؟ ولی مستقیل شخصلر همیشه بو شخصلرین حؤرمتسیزلیگینه معروض قالیرلار؟

جاواب: هر هانکی بیر حرکتده دایازلیق و درینلیک آنلاییشینی اورتایا قویماق، او حرکتدن اجتماعیت، یوخسا منسوب اولموش دونیا گؤروشو اوچون گؤزلنیلن وئریم و فایدانین ایضاحی ساییلار. دئمک، هر بیر حرکت ایستر توپلوم، ایسترسه ده بیر دونیا گؤروشو اوچون فایدالی قلمه آلیندیقدا، او حرکت درین دوشونولموش، فایداسیز قلمه آلیندیقدا، دایاز و دوشونولمه میش بیر حرکت دئیه قلمه آلینار. دئمک بو آنلاییش بیر باخیش آچیسی اولاراق اوررتایا چیخارکن بو حرکتین درینلمه سی نین قاباغینی آلان پولیسی شرطلر و سیاسی حاکیم سیستیم قلمدن دوشموش اولار.

اخلاق مسئله سی ایسه، تربیت و پرئنسیپ مسئله-دیر. پرئنسیپی گؤز اؤنونه آلاراق حرکت ائدن انسانلار اؤز شخصی دگر و ارزشلریندن یولا چیخاراق اؤزلرینه رقیب ساییلان باشقا انسانلارین شخصی حیات دگرلرینه بیله توز بیله قوندورماق ایستمزکن رادیکال شخص و قوروپلار پرئنسیپ دئییل، ایناندیقلاری اولمازسا، اولماز دئیه کیچیک بیر دوشونجه آیریلیغینی حیثیت مسئله سی قلمه آلاراق باشقا گؤروش صاحابلارینا دوشمنجه یاناشما حرکتینه قاپیلارکن قارشی طرفی اؤزلریندن قیرماقلا "اخلاقسیزلیق" آنلاییشی اورتایا چیخار.

نقد و تنقید مسئله سی ایسه قارا یاخماق، باشقاسینی سوسدورماق مقصدی داشیماق دئییل، هر هانکی آتیلمیش بیر آددیمین فاکتلار اساسیندا یانلیش اولدوغونو قارشی طرفه سرگیلمکله اونون دوزگون یولا قاییتماسینا خدمت ائتمک ماهیتی داشیمالیدیر. دئمک، نقد و تنقید مسئله سی اولدوقچا چتین و هر بیر شخص باشارمایاجاق داورانیشلاردان بیری ساییلار. نقد و تنقید مسئله سینده ایپ اوجو الدن قاچیریلارسا، شخص اورتایا قویدوغو گؤروشلر ایله اؤزونو چتین توپارلایابیلر. بئله لیکله مئیدان رادیکال شخص و قوروپلارا آچیلمیش اولار.

حرکتین اؤز ایچینده و اؤزلوگونده مصونلوق مسئله سی ایسه حرکتده اولان قوروپ دینامیزمیگی آنلاییشینا اساسلانار. بو آنلاییش اجتماعی بیلیمده "قوروپ دینامیزماسی" آدلانار. بو آنلاییشا گؤره بیزیم قوروپ، بیزیم دوشونجه نی یئدک چکن شخص هر زامان یاخشی، قارشی طرف هر زامان پیس ساییلار.

بو آنلاییش اوزره تورکیه وطنداشی اولموش شریف آمریکادا بؤیوک آراشدیرمالار آپارمیش و اونلارین نتیجه سینی کتاب اولاراق انگلیسچه یازمیش. شریف بیربیرلرینی تانیمایان انسانلاردان ایکی فوتبال تاخیمی (فوتبال تاخیمی) اولوشدورموش. یاواش یاواش هر بیر تاخیم ایچینده بیزیم تاخیم یاخشی، او بیری تاخیم پیس و زامان کئچیدی ایله بو تاخیملارین بیربیرلرینه دوشمن کسیلمیش مقاملارینی دا کتابیندا یازمیش.

دئمک، قوروپ دینامیزماسی آنلاییشی ایله تانیش اولدوقدان سونرا قوروپلار و شخصلر آراسی بیربیرلرینه رقیب ماهیتلی بوینوز توتماقلارا گرک انسان اوزولمه سین. بو داورانیشلار اجتماعی توپلوملاردا بیر ذاتی و غریضی بیر آنلاییش ساییلار.