بیرینجی دفعه‌دیر اورین داغی‌نین میللی همایشینه قاتیلیرام. جوانلیق چاغلاریمدا آماتور بیر داغچی کیمی داغا گئدیب، یوخاری چیخارکن طبیعتین بیکرلییندن، ساکین‌لییندن لذت آلیب، داغین زیروه‌سینه چاتدیغیمدا اؤز استقامتیمه داها آرتیق ایناناردیم. آمما ایندی آرتروز منی گؤلون قیراغیندا دایاندیریر. اوغلوما یولداشلیق ائدیب بوندان آرتیق یوخاری چیخا بیلمیرم. اوغلوم گؤلون دؤوره‌سینده قیمیلدایان جمعیتین ایچینده مناسیب بیر یئر تاپیب، چلیک‌لریمی یئره میخلاییب، دؤوره‌سینه داش دوزوب، چرقدیمله بیر کؤلگه‌لیک دوزلدیب، اؤزو یوخاری چیخیر. من ایسه اؤزل کؤلگه‌لیییمده کاسکت‌لی باشیمی گونشدن گیزلدیرم. گونشین خشونت‌لی اوزونو دفعه‌لرجه گؤرموشم.

منه گؤره داغا چیخماق مادی وارلیقلاردان، تکنولوژیدن، شهرین سسیندن اوزاقلاشیب، ذهنی دینج‌لییی الده ائتمک آنلامیندادیر. آمما بو همایش اؤزویله برابر شهرین سسی ایله مادی وارلیقلارینی دا بو گؤلون قیراغینا چاتدیریب. دییه‌سن بوراسی اورین داغی دئییل، اورین تفرجگاهی‌دیر. آدامدان علاوه رنگ به رنگ ماشینلار، وانت نیساندان توتدو تا یوخاری مدل ماشینلار گؤلو دؤوره‌له‌ییبلر. اسپیکرلردن چیخان تورکو، فارسی، کوردی موسیقی سس‌لری بیربیرینه قاریشیب، طبیعتین قولاغینین پرده‌سینی تیتره‌دیر. اسپیکرلرین سسی یئترلی دئییلمیش کیمی آنباشی گؤلون دؤوره‌سینده ویراژ وئرن موتورسیکلت‌لرین اگزوزلارینین بوغوناق سسی ده اسپیکرلرین سس‌لرینه قاریشیب، طبیعتدن آلدیغیم لذته توخونور. اورین داغینین دؤزومو چوخ اولسا دا منیم بو سس‌لری ائشیتمه‌یه دؤزوموم یوخدور، نظریمه گلیر بو سس‌لر گؤیده شیغییان گونشین خشونتینی آرتیریر.

قیرخ أللی ایل بوندان اول داغلار تفرجگاه دئییلدی، یالنیز طبیعته قایغی گؤسترن، طبیعتین بیکرلییینی قورویان داغچی‌لارین آیاغی اورین کیمی داغلارا چاتاردی. اوسته‌لیک او زامانلار ایدماندان علاوه بو اؤلکه‌نین سیاسی حرکاتیندا داغین آنلاملی بیر رولو وار ایدی. قیریخ ایل عرضینده بو سیاسی آنلامین رنگی ده‌ییشیلیب. قیریخ أللی ایل بوندان اول داغلار چریک‌لرین یاتاق یئریسی اولسایدی، بو گون شهرلرده یاساقلانمیش ناسیونالیستی شعارلارین، یاساقلانمیش رقص و موسیقی سسی‌نین مکانی اولوب داغلار. دییه‌سن جماعت طبیعتین قوجاغینا پناه گتیریب، یاساقلاری سیندیرماغا آلیشیب.

ایندیسه میللی همایش آدینا یئددیدن یئتمیشه داغچی ایله غیر داغچی، بو گؤلون دؤوره‌سینه ییغیشیب، یئییب، ایچیب، اوخویوب، رقص ائدیب، گؤلون اطرافینداکی بیتگی‌لری أزیب، آیاقلاییب، طبیعتی آزارلاماقدادیرلار. بو سؤزلری دئمکدن قصدیم یوخدور رقص ایله موسیقی‌یه خور باخیم. داغدان یوخاری چیخارکن بیر گوشه‌یه چکیلیب، چالیب اوخویانلارین اوره‌یه یاتیم سس‌لریندن لذت آلیب، طبیعتی قورویان بیر گروپون اوخدوقلاری ماهنی سسینه اوغلوم ایله برابر رقص ائتدیییم من، ایندی بو گؤلون قیراغیندا موسیقی‌نین سارسیدیجی اوزونو گؤروب موسیقی سسیندن بئزارلامیشام. منه ائله گلیر کی گؤلون اطرافیندا قیمیلدایان سایسیز حسابسیز جمعیت، - من ده بو جمعیتین ایچینده اولاراق- گؤلون نفس یولونو بوغوبلار.

اؤزل کؤلگه‌لیییمده اوتوروب، اوغلومو گؤزله‌ییرکن داغلاردا قورولان میللی همایش‌لرین فایدالاری ایله ضررلرینی دوشونورم. بو هایا هایدا شهریمیزین ملت وکیلینی گؤرورم، گؤلون اطرافیندا گزیرکن جماعت ایله سلاملاشیب، دانیشیر. ملت وکیلی یالنیز دئییل، اوچ نفر ده اونو مشایعت ائدیرلر. مشایعت ائدنلرین بیری اونون سلاملاشیب، دانیشیغیندان فیلم چکیر. اعتراف ائتمه‌لییم کی ملت وکیلینی اورین داغیندا گؤردویومده اؤز یالنیشیمی باشا دوشدوم: بو اؤلکه‌نین داغلاری یالنیز یاساقلانمیش شعارلار ایله موسیقی‌نین سسینی عکس ائتدیرمیر. گؤردویومه گؤره سیاست دونیاسیندا داغلار ایکی باشلی بیر وسیله‌یه دؤنوشوب. میللی همایش‌لر ایسه بو وسیله‌نین هر ایکی باشینی ایتی ساخلاماقدا بؤیوک رول اویناییر. آنجاق بو اویوندا طبیعتین قایغیسینی چکیب، قوروماق بو همایش‌لرین سونونجو دغدغه‌سی کیمی گؤرونور.