گونئی آذربایجاندا میللی حوکومت قورولدوغوندان سونرا، پهلوی رژیمی چاره‌سیز قالاراق، درین سودا بوغولان آدام کیمی اللرینی هر کول کوسا ایلیشدیریب دیری قالماغا جان آتیردی.

نهایت حکیمی ایشدن چیخاریلیب و سییاست عالمی‌نین باشاریلی آداملاریندان اولان قوام‌السلطنه، ایش اۆستونه گلدی، او آذربایجان مساله‌سینین چؤزولمه‌‌سینی، شوروی‌ دؤولتی‌ایله گؤروشوب دانیشماقدا بیله‌رک، ۲۷ نفرلیک هئیت‌له بیرلیکده ۲۹ بهمن ۱۳۲۴ ده، کیریملین سارایینا یولا چیخدی.

قوامین تئلقیرافلارینا باخدیغیمیزدا دانیشیق‌لارین چوخ دا باشاریلی کئچمه‌مه‌سی بللی اولور، آنجاق ۱۴، ۱۲، ۱۳۲۴ ده قورولان شام ضیافتی‌نین سونوندا مولوتوف(شوروی دیش ایشلر باخانی)‌ون تکجه بیر سؤزو قوامی اومودلاندیردی؛ سؤز وئریرم ایکی اؤلکه‌نین موناسیبت‌لری یاخشی اولاجاق.
قوام شوروی‌دن دؤندویونده تئهراندا شاهین ساراییندا، سادچیکوف، محمدرضا، اؤلکه بؤیوکلری و... رنگلی یئمکلری بزه‌نیلن شام ماساسی‌نین باشیندا بؤیوک بیر سئوینج‌له آذربایجانین میللی حوکومتین گله‌جک آی‌لار ایچره، طوماری‌نین بۆکولمه‌سینین خبرینی وئره‌رک، پهلوی دودمانی‌نین سونسوزا قدر ایران حاکیم‌لری قالماغی‌نین شرفینه بارداقلاری یوخاری قالدیردیقلاری زامان، بیلمه‌ییردیلر بیر نئچه ایل سونرا سلطنت‌لری‌نین طومارینی همن فدایی‌لرین قانی‌لا، کۆله دؤنموش کیتابلارین کۆللری آلتیندان جۆجه‌رن فیدانلار، ۱۳۵۶ ـ جی ایلین ۲۹ بهمنین‌ده بۆکه‌جکلر و ۱۳۲۵ ده حاقسیزجاسینا یئره تؤکولموش قانلارین اؤجونو(اینتیقامینی) آلاجاقلار،

اردبیل شهرینده قورولان والیبال اویونلاریندا،
بلکه ایلک گۆن [ ۳۱، ۳، ۱۳۹۸] ده ساوالان سالونوندا "یاشاسین آذربایجان" دئییلمه‌گی‌نین اؤنونو [ بیلیطلری اؤز آداملاری و باشقا شهرلردن گلن غئیرـ‌ی تۆرک‌لره وئرمکله] آلیب، گئجه‌سی بو ظفرلرینی، دادلی یئمک‌لرله قوتلاییب سرئیین‌ده سویا دۆشوب کئفلندیلر، آنجاق قوامین سئوینجی و موتلولوغو نئچه ایل سۆرسه‌یدی ده، بونلارینکی نئچه ساعاتلیق اولدو و اردبیل‌ین غئیره‌تلی گنجلری خییاوانلارلا ایستادییومدا " آذربایجان وار اولسون ایسته‌مه‌ین کور اولسون" و "یاشاسین آذربایجان" شوعارلارینی سسلندیریب بیر گئجه اؤنجه یئدیکلری یئمک‌لرین دادینی بورونلاریندان گتیردیلر.

کیچیک قازانج‌لارلا دیلخوش اولان آذربایجان‌ین یاشاماغیندان راحاتسیز اولانلار بیر شئیی اونوتمامالی‌دیرلار؛ بورا آذربایجان‌دیر و تۆرک‌لرین نه زامان نه ائده‌جکلری هئچ چاغ بللی اولماییب، اولماز و سیزلره ناموبارک ساییلان اولای‌لار هرگۆن تیکرارلانا بیلر.