ایرانین امنیتی و قضایی سیستمی تورک لرین مدنی فعالیتینه کی ایلکین حاق حقوقولاریندان قیراق باشقا مطالبات لاری یوخدور و ایرانین اساسی قانون و قورارلار چرچیوه سیندن دیشاری فعالیت لری اولماییب، هر زامان مختلف انگ لره قاریشلانیب تام عدالتسیزلیکله آغیر آغیر جزالارا معروض ساخلانیلیب

خبردار اولدوق کاظیم بی صفابخش آدلی بیر گنج تهران محکمه سیندن ۱۳ ایل توستاغا محکوم اولونوب ،کاظیم بیین یگانه سوچو تیراختورون یانداشی اولدوغو و آنادیلین کیملیگین سئومک اولوب
آدی گئدن شخص تهران محکمه سینده اساس سیز و گولونج اتهام لارلا آغیر جزایا معروض قالیب فعالیتی ورزشی استادیومدا سئودیگی تاخیمین آلقیشی وآزارکئشدیگی اولوب
حکم ده بو شخصه اولان اتهام لار تهران محکمه سینین ادعلاراینین تام ترسی اولاراق هئچ بیریسی میللی امنیته قارشی ،عمومون اذهانین تشویش ائدن بیر تئوری وعملی اولماییب
حؤکمده اولان اتهام لارا دیققت ائدسک قید اولوب محکوم اولان شخص کیتاب نمایشگاهیندا قوم گرایانه یازی و بنئر آچیب ،بو بنئر و یازی هارای هارای من تورکم ،و بوزقوردون سیمگه سی عنوانیندادیر ،هانسی قضایی قانون ، ماده ،تبصره ده قید اولان یازی و گؤستریلن سیمگه کی تورک دونیاسینا آیید اولان بیر سمبل و نیشاندیر سوچ سانیلیر؟! ایران جغرافیاسی کثیرالملله بیر جغرافیا اولاراق مختلف میللت ،دیل.کؤلتوردن قورولوب
هارای هارای من تورکم یازیسی اؤزل بیر میللت ودیلین قوروماقدان سونرا باشقا آنلامی و آماجی یوخدور.بو یازینی سوچ سندی ، مدرکی بیلن محکمه ایلک گرک دیر ۳۵میلیون نفوسون کیملیگین ،اولدوغون و وارلیغین رسمیته تانیمییا ۳۵میلیون نفوسو جزالاندیریب هاممیسین ۱۳ ایل دوستاغا محکوم ائده و یا ۳۵میلیون خالقی سوی قیریم ائده نییه کی ۳۵میلیون نفوس پان ایرانیستی وریندن کیملیک تحریفینه معروض قالاراق هارای هارای تورکم سؤیله ییر بو نظر نه سویچولوقدور نه قوم گراینه بیر عمل،تکجه تحریفه قارشی اولان بیر تپکی اولاراق کیملیگی قوروماقدیر

باشقا اؤلکه نین بایراغین آچما سوچدورسا گرک دیر کلیسالاردا ارامنه طرفیندن ارمنستانین آچیلان بایراقلاری داخلی تهلوکه سیزه قارشی حسابلانا و مین لرجه ارمنی لر عؤمورلوک حبسه جزالانا و یا مظلوم واقع اولان غزه فلسطین خالقیندان ساووناراق ایران شهرلرینده بو بایراغی گؤسترمه سوچ و جرم دورسه بو حؤکمو صادر ائدن اؤزو مجرم حساب اولونور ایرانین توپراق بوتؤیلوگون قورویان ملی سردارین ،ستارخانین مزارین زیارت ائدمه هانسی منطق له امنیته قارشی بیر عمل سانیلیر ؟

اوجورکو هرکس بیلیر مرکزین فوتبال تاخیملاری تورک میللتینه قارشی استادیوملاردا نئجه نفاق و نفرت یارادان سویچولو شعارلار سس لندیریرلر آمما هئچ بیری داخلی تهلوکه سیزه قارشی و اذهان تشویش ائدن بیر عمله دادگاهی اولونوب قینانیلمیرلار،

قالدن رهبری گروهک کی انگ وورولوب دلی قانلی آدلا ،گرک دیر ایلک ثوبوتلانا بئله بیر قوروپ وار یوخسا یوخ و یا بو قوروپون مکتبی فعالیتی ندیر! کئچمیشده هانسی امنیته قارشی عمل لری اولوب ؟!

توتالیم ادعا ائدیلن قوروپون موجودیتی واردیر آنجاق بو قوروپ هانسی تروریستی و خشونتلی عملیاتلارا ال ووروب؟! و یا هانسی حرکاتلاری توپراق بوتؤیلوگون تهلوکه یه سالیبدیرکی آغیر جزایا قینانیلا؟!

کافر آدلانان اؤلکه لرین قضایی سیستمینده داعشین القاعده نین اؤیه سینه بئله آغیر حکم لر وئریلمیر آنجاق اسلامی اؤلکه ده بیر شخص کی فوتبال تاخیمین یانداشیدی دییه ۱۳ ایل حبسه جزالانیر!

پان ایرانیستی دوشونجه کی اؤلکه نین بوتون سیستیمینه نفوذ ائدیب قاباقدان گلمیشدیک ائدیب تجزیه طلبی و توپراق بوتؤیلوکوندن چوماق دوزه لدیبلرکی تورک میللتین استعمارا و استمثارا معروض قویماق لارینا دوام وئریب و اونلارین ایلکین حاق حقوق لاریندان گئری اوتوردالار آنجاق بونا دققت ائتمه لیدلر بو تئوری و عملین سونوجو تام ترسینه اولاجاق نییه کی تورک میللتی تاپدالانمیش قانون چرچیوه سینده اولان حاق حقوقوندان گئری چکیلمه یه جک و هئچواقت آیری سئچکیلگله باریشمایاجاق