رسمی درسلیک کیتابلاردا، تورک‌لرین علم و بیلیم دونیاسینا ائتدییی خیدمت‌لری گیزلدیب اونلاری ساده‌جه آت بئلینده گزیب، قیلینج اوینادان مدنیت‌سیز خالق‌لار کیمی تصویر ائدیرلر. بو عمل ائیتیم باخانلیغی و ایران دؤولتی‌نین تورک‌لری آلچالدیب تحقیر ائتمک هوسیندن قایناقلانیر و هئچ بیر تاریخی سنده دایانمیر.

ایسلام دونیاسیندا ان تانینمیش علم مرکزی بغدادین نظامییه مدرسه‌سی اولموشدور. او مدرسه مین ایل اؤنجه سلجوق امپراتورو آلپ ارسلان امریله یارادیلمیشدی. اوردا اوخویان اؤیرنجی‌لر آیلیق آلیرمیشلار. سلجوقلاردان سونرا دا بوتون تورک حؤکمدارلاری مدرسه تیکمه‌یی اؤزلرینه اساس مقصد کیمی قبول ائتمیشلر و آذربایجان تاریخینده بؤیوک بیر یونیورسیته کیمی تانیمیش ربع رشیدی بیناسی ائلخانلی قازان‌خان امریله و رشیدالدین همدانی چالیشمالاری ایله تبریزده یارانمیشدی. او مدرسه‌نین کیتابخانا و نشر مرکزی و خسته خاناسی دا وار ایمیش. هیند، چین، میصیر و شام‌دان او مدرسه‌یه عالیملر گتیرمیشلر. ایراندا یونیورسیته و مدرسه قاجارلار دؤنمینده یایغینلاشیبدیر و ایرانین ایلک مدرن مدرسه‌سینی میرزه حسن رشدیه و لال-کار اوشاقلار اوچون یارانمیش مدرسه‌لرینی جبار باغچه‌بان قوروموشلار. بونلار تورکلرین علم و مدنیت ساحه‌سینده چالیشمالارینا کیچیک اؤرنکلردیرلر.
ایندی ۴۰ ایل موددتینده امامزادا کشف ائدیب حسینیه تیکمکدن باشقا بیر ایش باجارمایان حؤکومتین رسمی درسلیک کیتابلاریندا تورکلره مدنیتسیزلیک دامغاسی وورماسینی نئجه دوشونمه‌لیییک؟!

*بوگون ایول ۲۸ آذربایجان میللی مطبوعات آتاسی کیمی تانینان حسن بی زردابی‌نین دوغوم گونودور و بیز تاریخیمیزین پارلاق صحیفه‌لریندن اولان اکینجی قزئته سینی سئوینجله یاد ائدیریک.