جاواب: ایچریده کی ملی و مدنی فعاللارین قلم موباریزه سی اولدوقچا اؤنملی و اهمیتلی اولدوغونا باخمایاراق کیمه و هانکی اساسدا موناسبت بیلدیرمکلرینی بیلمه لیدیرلر.

ترس دورومدا فارس مدنیت راسیستلیگینه باغلی اولان محفللر ایله "موباریزه قلمی" دئیه یازیشماق بیر چوخ انسانلاری باسقی آلتینا آپارابیلر. اؤرنک اولاراق علی افشاری، سالار سیف الدینی، افشین جعفرزاده کیمیلر ایله هر هانکی بیر اجتماعی مسئله یه آیدینلیق گتیرمک دوزگون اولمازکن آذربایجان ملی و مدنی فعاللارینی باسقی آلتینا دورتمک مقصدینه خدمت ائدر. بئلنچی ذاتلارین یازدیقلاری مطلب و مقاله لری آنادیلیمیزده نقد ائدرکن بیر یاندان آذربایجان دیلی و مدنیتینه خدمت ائده بیلر، باشقا یاندان بئلنچی مارجینال شخصلر سیرادان چیخاراق آذربایجان ملی حرکتی دوشونجه باخیمیندان توپارلانمیش و فارس ایستعمارچیلیغی قارشیسیندا گوج اعمال ائتمک مقامینا یوکسلمیش اولار. دئمک، ایستعمار دیلینده قلمه وورماق، ایستعمار مدنیتی ایله یاشاماقلا ایستعمارچیلیغی یئنمک و اونو شکست ایله اوز اوزه قویماق ایمکانسیز ساییلار.