یازین سون گۆنلری دیر، عینالی‌دان اسن مئه یئل قارنی بورنوندا اولان سارانین آلنیندا اولان تر دامجیلارینی سویودوب، سارانین جانینی سرین بیر گیزیلتی بۆرویور، سانجی قارنینی دوغراییر.

۱۳۱۸-اینجی گۆنش ایلینده روس لارین چکمه‌لری‌نین سسی تبریزین
" واغزال " خییاوانینی آیاغی آلتینا آلیب.
هاوانین ایستی‌سینده آرا بیر سوچو عزت‌ین " سرین سوُدی، سرین سوُ " سسی گلیر، روس سالداتلارین اؤنوندن کئچرکن عزت ده سسینی قیْسیر؛ سارا ائوده سانجیدان سسینی قیسان کیمی.

یای‌ین بیرینجی گۆنودور، عزت یاشاملاری‌نین پاراسال دورومونا باخمایاراق ایکی بالاسی ایله بیرگه، حیات یولداشی سارانین یانیندا قالدی.
سارا دئییردی " سانجیلاریم چوخالیب، بوُدوم تیره چکیر، دئییرم بس اوشاق بۆیون اولار. "
سارا نه قدر سانجی چکسه‌ده اوُشاقدان خبر اولمادی.
قوْرا پیشیرنین ایکینجی گۆنو گلیب چاتدی.
سارانین سانجیلاری‌نین آردی کسیلمیردی.
رنگی پؤرتموشدو، عزت خبر وئریب ائوه ماما گتیتدیردی.
ماما یئتیشجه‌یین عزت ائودن ائشیگه چیخدی.
عزت قاپیدا آددیملاییردی اۆره‌یی اسه-اسه دؤزومسوزلوکله ائودن بیر خبر گؤزله‌ییردی.
سارانی تر بۆروموشدو، دیشلرین بیر-بیرینه قیْساراق قیْشقیرتیلارین ایچینده بوغوردو.
ماما-نین سسی سارانین قولاغینا چاتدی
" قوتولدو، توتدوم "
سارا کیپریکلرینی بیر-بیری‌نین اۆستونه آخیداراق کؤرپه اوُشاغین آغلاما سسی ائوه دولدو.
عزت گۆلومسه‌یه‌رک " هن؟ نه خبر؟ " دئیه سارایا سسلندی.
ماما " عزت آ گؤزلریز آیدیْن، گۆل کیمی اوغلون اولدو، من سارانین باشینا دۆز تؤکنده سارا الین اۆزونه وورموشدو من اوندا دئمیشدیم اوشاغین اوغلاندی. ایندی ایناندیز؟ "
عزت گۆله-گۆله باشینی ترپه‌دیب "هه " دئدی.
ایکی گۆن سونرا عزت گئدیب " صمد " آدلی بیر کیملیک آلدی یئنی دوغولموش اوووجلاری ایْشیق دولو اوغلونا.