سورقو: بابکین ایناندیغی دین، یئرلی خالقین دینی ایله نه اؤلچوده عئینی اولابیلرمیش؟ باشقا دئییشله بابک تورک ایمیش می؟ تورک ایمیشسه، نه اوچون بابک آدی کئچمیش یوز ایللرده آذربایجاندا خالق ایچینده یایقین اولمامیش؟

جاواب: دین و عقیده لرین اکتسابی اولدوغونو، حضرت محمدین اؤزو قیرخ یاشینی دولدوران گونه دک مسلمان اولمادیغینی و قیرخ یاشیندا اونا وحی گلدیگینی [(باخ: إقْرَأ بِاسْمِ رَبِّکَ الَّذِی خَلَقَ. خَلَقَ الْإِنْسانَ مِن عَلَقٍ (1)]، جد آبادلاری نین بت پرست اولدوغونو، علی و خدیجه نین بیرینجی ایسلامیتی قبول ائتدیگی شخصلر اولدوقلارینی، عربلرین ایسلامیت باشلیغی آلتیندا آذربایجانا آخین و هوجوم ائتدیکلرینی نظره آلارساق، بابکین و عموم اولاراق آذربایجانلیلارین او گونه دک مسلمان اولوب اولمادیقلاری دا چوخ اؤنملی و اهمیتلی دئییل، وطن آنلاییشی داها دا اؤنملی و اهمیتلی ساییلار.
بابک و اونون اطرافینداکی تاریخده آدلاری حک اولموش انسانلار بوگون آذربایجان تورکلوگونون ملی قهرمانلاری ساییلار. وطن آنلاییشی باخیمیندان بابکین هانکی دیلده دانیشدیغی بیله چوخ دا اؤنملی و اهمتلی دئییل، اونون آذربایجانی بیر توپلوم اولاراق هر هانکی خاریجی قوه قارشیسیندا ساوینماسی و دیفاع ائتمه سی اولدوقچا اهمیتلی ساییلار.

کئچمیشه دوغرو باخاراق بوگون آذربایجان تورکلوگو ائتنیک منسوبیت و کؤکوندن (منشآ سیندن) آسیلی اولمایاراق آذربایجان تورکلوگو ایله بیر آرادا یاشامیش و آذربایجان تورکلوگو ایله دوغما دولاما اولموش، بوگونکو آذربایجان تورکلوگونو بیر ملی توپلوم اولاراق ات و دیرناق حالینا گتیرمیش انسانلاری، آذربایجان تورکلوگو اؤز اولو آجدادلاری دئیه قلمه آلمالی، دیل و مدنیت مسئله لری نین نئجه بیر مرکب مسئله اولدوقلارینی درک ائتمه لیدیر.
دیل و مدنیتین بیر چوخ زامانلار اکتسابی بیر گؤرونوم (فنومئن) اولدوغونو قبول ائتمه لی، کئچمیشیمیزه دوغرو کیم تورک اولموش، کیم غیر تورک اولموش دئمه یه رک تاریخیمیزده اؤگئی و دوغما آنلاییشینی بیر دفعه لیک قیراغا بوراخمالیییق. آذربایجان مشروطه حرکاتیندان بوگون آلدیغیمیز عبرت درسی، کئچمیشینه دوغرو و دوزگون صاحاب چیخماق باشاریسیندا اولمایان ملی توپلوملارین گلجکلری نین ده آیدین گؤرونمدیگینی سرگیله میش اولار.
بابک آدی نین اوزاق کئچمیش ایللرده آذربایجاندا یایقین بیر آد اولمادیغی مسئله سی ایسه، بابک و او باشچیلیق ائتدیگی حرکتین عربلیک و ایسلامیت قارشیسیندا باشاریلی اولمادیغی ایله ایضاح ائدیلمه لیدیر. ایسلامیتین آذربایجانا قرآن و عرب دیلی ایله غالب گلمه سی، انسانلارین روحوندا اسلام دینی اینانجی نین یئر آچماسی، ایستر ایستمز عرب آدلاری نین دا یئرلی خالق آراسیندا مود اولماسینا و یئرلی آدلاری دیشلاماسینا یول آچمیش بیر مقام ساییلمیش.

موغوللارین باشدا چینگیزخان اولاراق ایران ممالیکی محروسه سینه آخین ائتدیگینی و چینگیز آدی نین دا گونوموزه دک بیر چوخ موغول اولمامیش ملی توپلوملاردا بیر یایقین آد اولدوغونو قبول ائدرسک، اؤز تاریخینی بیلمگن انسانلاردا اؤزگه توپلوملارین ملی قهرمانلارینا اؤزنمک و اونلارین حسرتینی چکمک قاچینماز بیر آنلاییش ساییلار.

دئمک، بابک حرکاتی او زامانلار آذربایجاندا عرب خلیفه لیگی قارشیسیندا غالب اولسایمش، چینگیز و آتیلا آدلاری نین بیر چوخ توپلوملاردا یاشادیقلاری کیمی بابک آدی نین دا ایستر آذربایجان تورکلوگونده، ایسترسه ده تورک اولمایان ملی توپلوملاردا تاریخ بویو شخص آدی اولاراق یاشاماسینا تانیق اولارمیشیق.

قایناق: قرآن مجید، سوره ۹۶: العلق - جزء ۳۰.