سورقو: سیاسی، اجتماعی قونو و موضوعلار ایله اوغراشان هر هانکی بیر شخص نئجه داورانمالی و رفتار ائتمه لیدیر؟

جاواب: سیاست مئیدانی بیر چوخلارینا گؤره کلک، فیریلداق اساسلی قلمه آلینماسینا باخمایاراق بو مسئله دوشونولموش بیر سیاسی داورانیش و رفتارین سونوچو و نتیجه سی دئیه مسئله نی اله آلارساق، سیاستچی بیر شخص ایستر باشقا سیاستچیلره قارشین، ایسترسه ده توپلوم ایله اوز اوزه اولدوغو اوچون، اؤز داورانیشلارینی کونترول آلتینا آلمالیدیر.

دئمک، سیاسی بیر شخص داورانیش و رفتار باخیمیندان توپلوما اویقون و مناسب بیر پرئنسیپ اساسیندا حرکت ائتمه لی، شخصی گؤروشلرینی ده مدنی بیر بیچیمده اورتایا قویمالیدیر. بو پرئنسیپلردن بیری ده خالق آراسیندا تانینمیش "عفت کلام" مسئله سینی رعایت ائتمک ساییلار. دئمک، اؤزونو سیاسی قلمه آلان بیر شخص بیر چوخ زامان بعضی ناشایست سؤزلری ائشیتدیکده بیله اجتماعیتی نظره آلاراق اؤز عصبلرینی کونترول آلتینا آلمالی، شخصیتی سورقو و سوآل آلتینا آپاریلماسین دئیه "عفت کلامی" حفظ ائتمه لی، ناشایست سؤزلره قولاقلارینی توتماغی و اونلاری ائشیتمزدن داورانماغی، دویارلی اولماغی، دویارلی رفتار ائتمگی باشارمالیدیر. بو مسئله هر هانکی علمی و سیاسی گؤروشلری نقد ائدن نقدچی انسانلار اوچون ده کئچرلی ساییلار. دئمک، بیر چوخ زامانلار، کسک داش ایله اوزلشدیگی کیمی انسان اؤز گؤروشونه اساسا یونولمامیش و ناطراز بیریسی ایله اوزلشدیکده بیله توپلوم و اجتماعیتی نظره آلاراق ناطرازلیقدان اوزاق دورماغا و داها دا تمکینلی و مدنی داورانماغا چالیشمالیدیر. ترس دورومدا و حالدا مدنی بیر انسان ایله مدنیتسیز بیریسی نین آراسیندا فرق قویماق اولدوقچا چتین بیر مقام ساییلار.