یوخودا گؤردوم اؤزومو آسیرام. اَل-آیاق چالاراق سون نفسلریمده بیتیردی. بیردن کندیر قیریلاراق یئره سریلدیم. یوخو گؤردویومو بیله‌ره کدن، یئنه دار کندیرینی قوشدوم. اَل-آیاق چالدیم، نفسیم سونا اَردی، یئنه کندیر قیریلدی...

سحر چاغی موبایلیمین سسی‌ایله یوخودان قالخدیم. سانکی باشیما داش سالدیلار. هر گون سحر یئمه‌ییمی رادیونو دینله‌یرکن یئیه‌رم. آپاریجی خبرلرین باشلیقلارینی سؤیله ییردی: سورییه ده تئروریسلرین یوروشوایله قیرخ‌سککیز قادین و اوشاق جانینی ایتیردی...بغداد‌‌دا بیر اینتیحاری بومبا‌ایلا یوزلرله اینسان قانینا بلشدی...تئروریسمه قارشی بیر توپلانتیدا تئروریسلرین تؤره‌تدییی ایشلر یارغیلاندی...میلل سازمانینین اوشاقلاری ساوونما بولومو افغانیستاندا اوشاقلارین پیس دورمدا اولدوغونو وورغولادی...

بیلیم یوردوندا ادبیاتدان باشقا هر سؤز دانیشدیم. نه دانیشدیغیمی اؤزومده بیلمیردیم، قالسین اؤیرنجی‌لر. سونوندا وئردیییم قونودا حیکایه یازمالارینی تکلیف ائده‌رک، کیمسه اَن گؤزل حیکایه‌نی یازیرسا اونو درگی‌ده یاییملایاجاغینا سؤز وئردیم. یورغون-آرغین ائوه دوشدوم. مطبخده یئمه‌یه هئچ نه تاپا بیلمه‌دیم. حیات یولداشیم بئش-آلتی آی اؤنجه چیخیب گئتمیشدی. گئدیشیندن اوزگون دئییلدیم، دوغروسو چوخ‌دا سئوینیردیم.

یوخودا یئنه اینتیحار ائدیردیم. داماریمی وورموشدوم حامام وانیندا. قان سویون ایچینده یاواش-یاواش سوزولوردو. سوزولدو...سوزولدو...! سو آل قیرمیزییا بویاندی. داشیب ائوی قوینونا آلدی. یوخو گؤردویومو بیله‌ره کدن اویانماغی ایسته‌میردیم. آنجاق یئنه موبایلیمین سسی یوخونو زهر ائله‌دی. رادیو بیر قادینین اؤزونو یاندیرماسیندان سؤز آپاریردی. یئردن-گؤیدن اینتیحار یاغیردی. اؤیرنجی‌لر اینتیحار قونوسوندان یازدیقلاری حیکایه‌لری گتیرمیشدیلر. گؤز گزدیره‌رک هئچ بیری ماراغیمی چکمه‌دی. آنجاق اینتیحارلاری قولتوغوما ووروب، ائوه ساری یؤنلدیم. ائوده اولان درمانلارا گؤز گزدیردیم. آروادیم دلی‌ایدی. گئجه‌لر یاتا بیلمزدی. یارامازین یوخو درمانلاری هله قالیردی. هر گئجه یاتاقدا بیرینی ایچه‌ری آتیب، مندن اوز چئویریب یاتاردی. اونلارین بیری‌ایله گون اورتایا‌دک یاتاردی. بئش-آلتیسی منی دینج ائده بیلردی.

اؤیرنجی‌لره سؤز وئرمیشدیم اَن گؤزل حیکایه‌نی درگی‌ده یاییملایام. گئجه اونلاری اوست –آلت ائله‌ییردیم. نئچه‌سی من دئدیییم قونودا یازیلمامیشدی. بیریسی تانرییا مکتوب یازاراق اونو پوست ائتمیشدی. کاغیذین آلتیندا یازدیم: اینترنتله تانریلا ایلگیلنسن‌سه داها تئز یانیت آلارسان. نئچه‌سی سئوگی حئکایه‌سی یازمیشدی. اونلارا‌دا یازدیم: سئوگی اودوندان یانیرسینیزسا، حیکایه گره‌کمیر. او یانغین اوره‌یینیزین اودو بیر یول سئوگیلیزایله یاتاقدا یاتماقلا سؤنر. یازیلارا چوخلو اتک یازی یازدان سونرا یاتاغیما گیردیم.

سحر یئنه موبایلیمین سسی‌ایله یوخودان قالخدیم. سحر یئمه‌ییمی رادیوایله بیرگه یئدیم. اؤیرنجی‌لرله حیکایه‌لرینین ده‌یرسیز اولدوغونو آنلاشاراق بیر داها قلم توتمالارینی ایسته‌دیم. صینفده پنجره‌نین اؤنونده دایانمیشدیم. دوشونجه‌لریم اوچوب اوزاقلارا گئتمیشدی. چوخ اوچماسین دئیه اونلاری گئری قایتاردیم. من یئنیجه گؤیلردن یئره ساری قاییتمیشدیم. گئجه‌کی تئلئویزیون وئرلیشلرینی آنیمسادیم. "الله اکبر" سسیله قانلار یئره آخیردی. "الله اکبر" قارا بایراغین اورتاسیندا دوستاق قالمیشدی. "محمد رسول الله" دا اونا اتک یازی اولموشدو. قیز اؤیرنجی‌لردن بیرینین آتاسی گلمیشدی. قیزی اورک خسته‌لییینه اوغراشمیشدی. اونو بیر قیراغا چکدیم. یئکه‌پر بیر کیشی‌ایدی. گؤزلری دولموشدو. اوره‌یینی بوشالتدی. حکیملر درمان اوچون 10 میلیون پول ایسته‌ییردیلر. یئکه پر کیشی دانیشارکن بئینیمده بیر ایشیق چاخماق کیمی چاخدی. دئدیم: "من سنه 15 میلیون وئره‌رم، آنجاق منه بیر ایش گؤرمه لیسن". شاشقینجاسینا باخیردی. "قورخما بو پول سنه آنا سوتوندن حلالدی" دئیه‌رک موبایل نومره‌سینی آلدیم.

آخشام چاغی قالدیریملاردا آدیملایارکن دوشنجه‌یه دالمیشدیم. ماشینلار گل- گئت ائدیردیلر. من اؤزومو ماشینین اؤنونه آتا بیله‌رم‌می؟ قورخونون بالاسی اؤلسون. کئچن گئجه داما چیخمیشدیم. دایانمیشدیم اوچ قاتلی تیکینتینین قیراغیندا. اؤزومو یئره آتا بیلره‌رم می؟ اؤلمه‌سم کیم منه اییه دوراجاق؟ بونلار البت باهانادی. منیم یارامازلیغیم بیر باشا قورخومدان و چیخارسیزلیغیمدان آسیلی‌ایدی!

گئجه پنجره‌نین اؤنونده موبایلیملا اویناییردیم. "زنگ آچیم؟ آچماییم"؟ یئکه‌پر کیشی یه زنگ آچدیم. اوندان سونرا دلی‌لر کیمی ائوده گزیردیم. بیر آن اؤزومو اوتاغیمین اؤنونده تاپدیم. بو اوتاغی اونوتموشدوم. سؤز وئرمیشدیم داها اورا آیاغیمی قویمایام. آنجاق یئنه ایچه‌ری تپیلدیم. اویان- بویانا گؤز گزدیردیم. ایره‌لی گئده‌رک ماسانین اؤنونده دایاندیم. بو ماسانین آرخاسیندا چوخلو گئجه لری سحره دویونله‌میشدیم. آنجاق ایندی توز ایچینده ایدی. نه یازیق هامیسی بیر ایلغین ایمیش. اوتوراجاغی گئری چکیب اوتوردوم. سون یازیمین کاغیذلاری ائله قویدوغوم یئرده قالمیشدی. دوداغیما بیر آجی گولوش اوتوردو. کاغیذلاری یئره سپه‌له‌دیم. کیتابلار اوست-اوسته قالانمیشدی. هگل‌دن، نیچه‌دن، بورخس‌دن، کافکادان...بیر یوموروقلا اونلاری‌دا یئره سردیم. کافکا یئره سریلسه‌ده باخیشلاری مندن آیریلمازدی.

سحر یئنه موبایلیمین سسی‌ایله یوخودان قالخدیم. اؤیرنجی‌لره دئدیم بو قونو‌دا یازمالیسینیز: "بیر کیشی پول وئریر اونو اؤلدورسونلر". اؤیرنجی‌لرین شاشقین باخیشلارینا اؤنم وئرمه‌دن صینیف‌دان چیخدیم. بانکا ساری یؤنلدیم. اوردان‌ایسه ائوه دؤندوم. یوخ! ائوه دؤنمه‌دیم. قبریستانا ساری گئتدیم. اینانیلماز دویغولارا دالدیردی منی، اورانین گون باتان چاغی. بو دونیادا بئله بیر قوربت دویغوسو، بئله بیر سارسینتی، بئله بیر اورک سیخینتیسی دویمادیم. گوجله دایاناتیمی ساخلامیشدیم. منده بویون-ساباه بیر قبیرین قوینونا سیغینیب، یاتاجاغام. داها سحر چاغی موبایلیم چالمایاجاق. رادیو دینله‌مه‌یه‌جه‌یم. اؤیرنجیلری حیکایه یازماق زوروندا قویمایاجاغام. قوی شاعیرلرین سایی بوندان آرتیق آرتیریلسین. من اؤلندن سونرا حیکایه نه ییمه یارار؟ بونا باخمایاراق وصیت ائده‌جه‌یم منیم قبیر داشیمدا شئعر یازماسینلار...
یارین گون، گون‌اورتا چاغی یئکه‌پر کیشی زنگ ائتدی. پول ایسته‌ییردی. دئدیم: "ایشیوی یئرینه یئتیرمه‌لیسن". گلیشی یاریم ساعات سورمه‌دی. هوووشنه ایچینده‌ایدی. تئلوئزییونون اؤنونونده دینج اوتورموشدوم. آز قالیردی دوشسون آیاقلاریما. آچاری گؤتوروب ایشقابا ساری یورودوم. ایشقابی آچیب پوللاری اونا گؤسته‌ردیم. سونرا باغلاییب آچاری جئبیمه قویدوم.

دئدیم: "منی اؤلدورمزدن اؤنجه پول وئره‌سی دئییلم. سونرا آچاری گؤتوروب پوللاری آپارا بیلرسن. یالوار-یاخار دا یارارسیزدی. سؤز وئرمیسن، کیشی کیمی سؤزونده قالمالیسان".

یئکه پر کیشی دئدی: "بو آن قیزیمدان باشقا هئچ نه‌یه دوشونه بیلمیرم. پولو وئر، سؤزومده وارام، ساباه سنین ایشین بیتیب".
بو دارتیشما چوخ سوردو. یئکه‌پر یاواش – یاواش اؤزوندن اولوردو. قیزارمیشدی. سویوق یانا یاناشمامدان داها آرتیق سینیرلی اولوردو. یاخالاییب، منی بیر بوجاقدان باشقا بوجاغا سوروتله‌دی. سونوندا باشیمی هارا‌ایسه چیرپدی. یئره سریلدیم. کافکا کیمی یئره سریلدیم. دیل-دوداغی قوروموشدو. جئبیمدن آچاری چیخارداراق، پوللاری گؤتوروب گئتدی. گئجه‌نین قارانلیغیندا اؤزومه گلدییمده باشیمی پارچالانمیش گؤردوم. گوزگونون اؤنونده دایاندیم. اوز-گؤزومو قان بویامیشدی. آنجاق هله اؤلمه‌میشدیم. یاراماز گئده اؤلدورمه‌دن پوللاریمی گؤتوروب گئتمیشدی.

باشیمین ساغلام سوره‌جی چوخ سورمه‌دی. یئکه‌پرین قیزی خسته‌لیکدن ساغلام چیخیب پولومو آز-آز گئری قایتارماسینا سؤز وئرمیشدی. چوخ دوشونوب- داشیناندان سونرا بیر سونوجا چاتمادیم. حایاتا گئری دؤنسم بئله دوشونجه‌لریم یئرینده‌ایدی. بیلیم یوردوندا من اولمادیغیم سوره‌ده اؤیرنجی‌لر حیکایه‌لرینی بیتیرمیشدیلر. حیکایه لری بیر یئره توپلاییب گئجه‌لر اونلارا سیغینیردیم. اؤزومه اویغون بیر حیکایه آختاریردیم. بیر حیکایه ده بیر قادین حیات یولداشینی اؤلدوروردو. نه دن بو قونو اؤز قافاما چاتمامیشدی؟ منیم آروادیم چوخ اسکیح آدام‌ایدی. پول وئرسه ایدین هر ایش گؤرردی. موبایلیمدا نومره‌سی قالیرمی؟...