دیرلی دوستلاریم و عزیز فیکیرداشلاریم ، هر بیر سیاسی اجتماعی حرکتین سونوجا وارماسی او حرکتین اویه لرین بیربیرلریله ایش بیرلیگیندن گئچر. بیلدیگینیز کیمی ده اورک بیرلیگی اولمادان ایش بیرلیگینی ساغلاماق اولماز.

چونکی اورک بیرلیگی یارانمادان ایش بیرلیگی ده یاراناماز. اورکلرده بیر بیریمیزه قیرقینلیق ، کدورت ، اوزونتو ، کین واردییسا او اورکلری داشییان اینسانلار بیر ارایا گلیب و ایش بیرلیگی یارادیب جمعی حرکت اونه سوره بیلنمزلر. و مجبورا فردی حرکت ائدرلر فردی چالیشماقیندا خروجیسی و قازانجی هئچ بیر زامان جمعی و منسجیم بیر حرکت کیمی اولماز.

پس بیرینجی سی نتیجه الیریقکی بیز تورک میللی مدنی چالیشقانلاری اولاراق جمعی حرکتی ساغلاماق و یاراتماق اوچون ارامیزدا اولان تنشلری و تشنج یاراتان نوقطه لری باشاردیقجا و اولدوقجا ازاتمالییق ، ایکینجی سی بو تشنج و اختیلافلارین یارانماسینا بستر و شراییط یاراتمامالییق. اوچونجوسو قیرقین اورکلری بیربیرینه یاخیناتمالییق ، کین کدورتی میللی چیخارلاریمیز اوچون اوزاق توتمالییق. اورتاق اماجلارا دایاناراق اورتاق بیر مخرجیمیز واردییسا دئمک بیز بو اورتاق اماجلارا دایانیب و ایش بیرلیگی ده ساغلایا بیلریک‌‌. بو اوزدن اختیلاف نقطه لرینه یوخ بلکی اتیحاد نقطه لرینه بارماق باساراق قارداشلیق روحونو دیریلدیب و بیربیریمیزه مشوق اولوب گوج وئریب ، صاحیب چیخمالییق.

گلین بیزلری بیزلردن اوزاق سالان ایشلره سون قویاق، گلین میللی حرکتین ضررینه قورتولان قارداشلیقیمیزی ضعفه سالان ایشلره و سوزلره سون قویاق. گلین میللی حرکتین تورک و اذربایجان توپلوموندان الان توپلومسال اعتمادینا ضرر وئریجی دانیشیقلارا سون قویاق. گلین اتیحاد و انسیجام عمله فیکیرله شک. گلین قارداشلیق روحونو گوجله ندیرک و بیربیریمیزه ارخا اولاق نه دوشمن.!!

منیم دیرلی داوا ارخاداشلاریم و اولکوداشلاریم منطقه نین بو گونکو حساس دوروموندا بیزی بیزدن ائدن ، حرکتین انسیجامینی ، قارداشلیق روحونو ، اتحاد عملینی داغیلدان، شخصلر و تشکیلاتلار اراسی قارشی دورماقلارا یول وئرن و سبب اولان ، میللی حرکتی بیر بیرینه رقیب اولاراق طیف طیف ائدیب و منفی رقابتلره سالان داورانیشلارا سون قویمالییق. قویمازساق ایر گلجکده اودوزان و اودانیمیز اولمایاجاق. بلکی هاممیمیز اودوزاجاییق و تورک میللتین اونونده اوزو قارا هپیمیز اولاجاق نه بیر شخص یا بیر خاص تشکیلات.! بو یوزدن میللی چیخارلارا دایاناراق گئچمیشی جراحی ائتمه یین شیکاف یارادیجی داورانیشلارا سون قویون.

هر بیر موبازیز و میللتچیلیک روحو داشییان فرد ، اونجه خود سازی ائدیب و میللی موباریزده اخلاقییاتی اون پیلاندا توتاراق اینسانلیق درجه سینه چاتمالی دیر. چاتمالیدیرکی هم اوزونو هم بو قوتسال موباریزه یولونو اخلاق دیشی عمللری و سوزلرییله کیرله تمیش اولماسین. هر بیر میللی چالیشقان اخلاق مدار اولمالی دیر. هر بیر میللی مدنی چالیشقان کندینی میللتچی بیلن ، اوزللیکله سییاسی حوزده چالیشان هر بیر کیمسه ایلک اونجه دیپلوماتیک بیر ادبییاتیلا سوزونو یازیپ دئییب و اونه سورمه لی دیر. دیپلوماتیک و اخلاقی دانیشیق داییره سیندن چیخانلار ، تحقیر ائدیجی و اشاغالاییجی دیل و سویلم قولانان ، ایثباتی اولونمایان کوتو صیفتلریله بیربیرینی یاد ائدنلر و اونون حاققیندا کوتو غیر مستند دانیشیق اپاران هر بیر کیمسه لر قوروم یا قورولوش ، و تشکیلاتلار ، سیزلرین بو تیپ ایشلرنیز میللی چیخارلارین دیشیندا یئر الان و تماما ضرر وئریجی ایشلردیر.

اذربایجان و تورک میللی حرکتینه منسوب شخصییت لرین و تشکیلاتلارین بوتون داورانیشلاری هم میللتیمیز و هم صادیق چالیشقانلار طرفیندن رصد اولونماقدادیر و هر شئی اپ ایدین گورونور و گوز اونونه الینیر. بو یوزدن یانلیش و ضرر وئریجی ایفاده لرینیزه سون قویون. گلین استراتژی و یول خریطه سی وئرین میللته نه تخریبات.! سیزلر سون قویمازسانیز غیر دیپلوماتیک و اخلاق دیشی ایشلرینیزه ، میللت اونونده اودوزان میللی جایگاه و ویجهه ویزی ، توپلومون حیمایتینی الدن وئرن سیزلر اولاجاقسینیز و حرکتیمیز. سانمایینکی گئچمیشده حرکته اولان خیدمتلرینیز سیزه عمور بویو سیگورتا ساغلاییب یانلیشلارینیز اوچون! و اونلارا توجیه گتیره بیلجک. حرکتین و میللتیمیزین سورونلارینا مدون برنامه لر و چوزوم یوللاری وئرمک یئرینه ، باشقا بیر اولکه نین ان اوست سووییده اولان حقوقی مقاملارینا ، و باشقا تشکیلاتلارین منسوبلارینا غیر دموکراتیک ایفاده لرین عمرا و ابدا قازانانیدا اودوزونیدا یوخدور.قازانان واردییسادا امنییتی قوه لردیر. اودوزاندا بو ایشلره ال اتانلار و حرکتیمیزدیر.چونکی بو ایشلرین توپلوم ایچینده حرکتین عمومی و سییاسی وجهه سینه منفی ائتکیسی واردی.