سون زامانلار، میلّی حرکتده چالیشان بیر تعداد فعاللار گونوموزون اؤنملی مسئله‌لرینه،اؤلکه‌ده و دونیادا باش وئرن سیاسی حادثه‌لره و بو حادثه‌لرین بیزیم آلین یازیمیزا و گله‌جه‌ییمیزه نه تاثیر قویاجاغینا و بیزیم بو مسئله‌لره نه جور یاناشماغیمیز یئرینه، هیجانلی دانیشیقلار و لزومو اولمایان موضوعلاری مئیدانا آتیب گون سیاستیندن اوزاق میلّی حرکت ایچینده دارتیشمالار و مباحثه‌لره سبب اولموشلار!

بوگون آرتیق، سلجوقلار نییه فارس دیلینی تقویت ائتدیلر، صفوی‌لر نییه شیعه‌چیلیگی گوجلندیریب سُنّی دیلداشلاری اولان عثمانلی امپراتورلوقلاری ایله ساواشا گیردیلر، ستارخان- باقیرخان نییه تورک حاکیمیتی اولان قاجار پادشاهی علیهینه قیام ائتدی و یا شوروی استبدادیندان آیریلیب و مستقل « آذربایجان جمهوریتی» آدینی داشیان و داغیلمیش شوروی‌دن آیریلان باشقا جمهوریلرله مقایسه‌ده داها سرعتلی گلیشمه و ترقّی یولونو آددیملایان قوزئی آذربایجاندا نییه بو چاتیشمامازلیق وار حاقدا مباحثه ائتمک زامانی دئییل!

حتی دموکراتیک اؤلکه‌لرده اوتوروب ایچریده اولان شرایط و دورومو نظره آلمادان آرزولار و رؤیالاردا سئیر ائتمک زامانی‌دا دئییل!

بو گونلر، ایراندا و دونیادا کئچن سرعتلی سیاسی حادثه‌لر نتیجه‌سینده اؤلکه‌ده گؤزله‌نیلمر دگیشیکلیک یارانارسا، بیز میلّتیمیزی نئجه قورویوب و حادثه‌لرین قارشیسینی آلماغا نه ایشلر گؤمه‌لییک یئرینه میلّتچیلرین باشینی غیر ضروری مسئله‌لرله مشغول ائتمک سون ۱۰۰ ایلده ایراندا ان ابتدایی حقدن محروم قالان ۳۲- ۳۵ میلیون تورک انسانی‌نین آلین یازیسینا لاقید قالیب سیلاحلی تروریسم، شوونیسم و پانفارسیسم دگیرمانینا دَن تؤکوب تاریخی آذربایجاندا و ایرانین باشقا بؤلگه‌لرینده یاشایان تورکلری داها فلاکتلی گونلره سالماق و کؤله و برده شکیلده یاشاتماقدان باشقا بیر آنلامی یوخدور!
بو گونلر، هر بیر میلّچی، چیگینلرینده آغیر میلّی وظیفه داشیاراق هیجانلی سؤزلر دانیشماق- یازماق یئرینه سیاسی حادثه‌لری نظره آلاراق آلین یازیمیزا فیکیرلشمه‌لیدیر!