جاواب: آذربایجان تورکلری اؤزلرینی تاریخ بویو تورک آدلاندیرمیش. آذربایجان تورکلری ایران ممالیک محروسه سینده قونشو خالقلار طرفیندن بوگون ده تورک آدلانارلار. دئمک، بو آنلاییش یاسمین قاراقویونلو اوچون بؤیوک بیر تاپینتی ساییلابیلمز.

روسلار اوللرده تاتاریستان تورکلری ایله تانیش اولدوقلاری اوچون، قافقازلاری ایشغال ائتدیکدن سونرا اوراداکی تورکلری "قافقاز تاتارلاری" دئیه قلمه آلماغا باشلادیلار. روس مترجمی ماکاروف دیلچی اولدوغو و تاتار تورکچه سی ایله آذربایجان تورکچه سی آراسیندا فرقلر تشخیص وئردیگی اوچون ۱۸۴۸ اینجی ایل یازدیغی گئرامئر کتابیندا قافقازداکی تورکلری آذربایجان آدیندان یولا چیخاراق "آدئربیجانسی" دئیه قلمه آلمیش(۱). تورکلوق وامبئری ۱۸۸۵ اینجی ایل آلمان نین درئسدن شهرینده یازدیغی "تورک خالقی" آدلی کتابیندا آذربایجان تورکچه سینه اویقون دانیشانلاری آذربایجانئر (آذربایجانلیلار) قلمه آلمیش (۲). بو تاریخدن اعتبارن بوتون آلمان تورکولوقلاری کارل فوی (۱۹۰۳، ۱۹۰۴) (۳) هئلموت ریتئر (۱۹۲۱) یازدیقلاری اثرلرینده آذربایجان تورکچه سینه اویقون دانیشانلاری "آذربایجانلیلار" قلمه آلمیشلار(۴). دئمک، بو مسئله آذربایجان تورکلری نین تورک اولدوغونو سورقو و سوآل آلتینا آپارجاق بیر آنلاییش دئییل، دونیا ملتلری و دونیا دؤلتلری چاپیندا؛ مختلیف ملی توپلوملار یئرینه گؤره بعضا جغرافی، بعضا ایسه باشقا توپلوملاردان دقیقلشسین دئیه اونلارا خاص بیر آد قبول اولموش.

آلمانلار اؤزلرینی "دؤیچ"، انگلیسلر آلمانلارا "جئرمئنی"، روسلار آلمانلارا "گئرمانیا"، فرانسه لیلر آلمانلارا "آلئماند" آدی ایشلتدیکلرینه باخمایاراق انگلیس دیلینده دونیا ملتلری آلمانلاری "جئرمئن"، شرق دؤلتلری نین ده بیر چوخو فرانسه لیلردن تبعیت ائده رک "دؤیچ" دئیه قلمه آلارلار.

اوتریشین ده رسما دیلی آلمان اولماسینا باخمایاراق آلمانلار ۱۸۶۷- ۱۹۱۸ ایللر آراسیندا اونلاری "آلمان اوتریشلیلری" دئیه قلمه آلمیشلار. بوگون ایسه اوتریشده کی آلمانلار آلمان ادبیاتیندا "اوتریشلیلر" دئیه قلمه آلینارلار(۵). "آذربایجان تورکلری" ایفاده سی ده "آلمان اوتریشلیلری" کیمی بیر تانیتیم آدی ساییلار. اونون قیساتماسی دا "آذربایجانیلار" اولار.

اوسته دیلچیلیک دونیاسیندا اولونموش تانیتیم و تعریفلره اساسا تورکمن صحراداکی تورکمنلر گؤز آردی ائدیلرسه، ایران ممالیکی محروسه سینده، آذربایجان جمهوریتینده، دربند-ده، بورچالیدا و تورکیه نین شرقینده کی تورکلوک اؤزلرینی تورک قلمه آلدیقلارینا و قونشو خالقلار دا اونلاری تورک تانیدیقلارینا باخمایاراق دیلچیلیک باخیمیندان بیر دیل مئدیوموندا (گئرامئر اؤزللیگی ایله) دانیشدیقلاری اوچون آذربایجان تورکلری و قیساتما اولاراق دا "آذربایجانلیلار" دئیه قلمه آلینارلار.