سورقو: بوگونکو ایران ممالیکی محروسه سینده کی فارسلیغا تابع توتولموش تورکلوگون چیخیش یولو نه اولابیلر؟

جاواب: هر زامان وورقولادیغیمیز دک فارس دیلی، موسیقیسی و مدنیتی "ایرانلی (ایرانی)"، فارسچا اولمایان دیل و مدنیتلر "غیر ایرانلی" قلمه آلینان، فارسلیق دوشونجه و مفکوره سی اساسیندا اداره چیلیک دئیه فارس ایستعمارچیلیغینا تابع توتولموش ممالیکی محروسه ده، فارس اولمایان ملی توپلوملارین آزادلیق یوللاری حاکیم دوشونجه و مفکوره ترمینلوژیسی ایله چییخش ائتمک دئییل، هر بیر ملی توپلوم، یاشادیغی جغرافی بؤلگه اوزره اؤز دیلی و مدنیتینی حاکیم ائتمک مفکوره سینه سؤیکنمه سی، اونون فارسلیق اسارتیندن قورتولوش یولو ساییلار. بو یول اولدوقچا چتین اولسا دا، فارسلیق چنبره سینی یاریب کئچمک، فارسلیق مفکوره سینه ائتنیک فارس اولمایان جغرافی بؤلگه لرده اصابتلی ضربه وورماق، فارسلیغین کئچمیش یوز ایلده بیریکدیرمیش "ایرانیت" دئیه "فارسلیق" مفکوره سینه ساغالماز یارا وورماقلا فارس هئگمونلوغونو ایران ممالیکی محروسه سینده چوروتمک مقصدینه خدمت ائدر.

بو مسئله نی درک ائتمگن "ایرانچی تورکلر" فقط اؤزلری دئییل، کیرمانا، یزده، سیمنانا و بیر چوخ یئرلره چؤرک قازانماق اوچون گئدیب یئرلشن زاواللی تورکلری "ایرانیت" آدینا فارسلیق خدمتینه قاپدیران ذاتلار ساییلاجاقلار. بئله لیکله فارس حاکیمیتی لازیم گؤردوگو زمان اؤز دیل و مدنیتلریندن آرینمیش بو تورکلری، ایستر ائتنیک گونئی آذربایجان، ایستر قاشقای و ایسترسه ده خوراسانداکی تورکلوگو ازمک اوچون بیر وسیله ائده بیلمه سی قاچینماز ساییلاجاقدیر.

دئمک، "ایرانچی تورکلرین" ایران ممالیکی محروسه سیندکی تورک ملی وارلیغینا ووردوقلاری ضربه لر تورک توپلوملارینی یوخا اوغراداجاق خیانت ساییلاجاقدیر.

ایشیق سؤنمز، ۰۱.۰۹.۲۰۱۹