ایران تورکلری قاراباغی هر زامان ساوونوب و ساووناجاقلار. بو، میللی معنوی بورجوموزدور.

قاراباغ آذربایجانین آیریلماز قدیم تاریخی ویلایتلریندن بیری‌دیر کی، ۱۹۸۸-جی ایلدن بری اراضی‌سی ایشغالچی ارمنی داشناکلارین تاپداغی آلتیندادیر. اهالیسینین چوخو سویقیریما معروض قالیب، بعضیلری ایسه مجبوری شکیلده اؤز دوغما آتا-بابا یوردلاریندان دیدرگین دوشوب، باشقا شهرلرده مسکونلاشیبلار.

همین ایلده داغلیق قاراباغین ان بؤیوک یاشاییش منطقه‌سی اولان خانکندیدن بوتون آذربایجانلیلار قووولور و ۱۹۹۰-جی ایلده ارمنیستان آچیق شکیلده آذربایجانا قارشی ایشغالچیلیق فالیتینه باشلاییرلار. ارمنیلر ایشغال ائتدیی شهرلرده و قصبه‌لرده اؤزللیکله خوجالی‌دا بیر چوخ آذربایجانلی آتا-آنالاری، هابئله، کؤرپه اوشاقلاری دا اؤلدوروب، دونیا تاریخینده ان چیرکین بیر ایز بوراخیبلار.

تاسف کی کئچه‌ن گونلرده تهرانین پارلامنت‌ده‌کی میللت وکیلی علی مطهری اؤز دانیشقلاریندا اعتراف ائدیب کی اؤلکه‌میزین خارجی سیاستینده ایسلام هم‌رای لیگی و قارداشلیق مسئله‌سینه کیفایت قدر دیققت یئتیریلمیر. اؤتن ایللرده ده قاراباغ مسئله‌سینده آذربایجانین حاقلی اولماسینا باخمایاراق ائتنیک ملاحظه‌لره گؤره عمومی‌لیکده ارمنیستانین طرفینی توتدوق. و یاخود پاشنیانین فئورال آیی خوجالی سویقیریمی‌نین ایل دونومو عرفه‌سینده تهرانین آرارات کلوبوندا ارمنی ایجماسی ایله گؤروشو زامانی قاراباغ ارمنیستانین دیر و سون پلاکاتی ایله سلفی چکمه‌سی و ایران دوولتی‌نین بو پلاکاتین قالدیریلماسینا گؤز یومماسی ایسلام هم رای لیگی و اؤلکه‌نین ان چوخلو نوفوسو اولان ۳۵ میلیون تورکلره بؤیوک بیر سایقی‌سیزلیق دیر.

قاراباغ موسلمان تورکلری‌نین میللی معنوی حاقلارینی ساوونوب، قورویوب ساخلاماق هر بیر اؤزونو تورک و موسلمان بیلن دؤولتلرین بورجودور. او جمله‌دن، ایران دا بوندان استثنا دئییل. ایراندا ان آزی ۳۵ میلیون تورک یاشاییر. ایستر دیل باخیمیندان، ایستر دین باخیمیندان ایراندا یاشایان تورکلر اؤزللیکله گونی آذربایجانلیلارا یاخیندیلار. بئله‌لیکله، ایران حکومتی اؤلکه‌ده ۳۵ میلیون تورکون ایستیینه اؤنم وئرمه‌لیدیر. نئجه کی، ایسلام دئییر مظلوم و ظلم آلتین‌دا قالان بیر موسلمانی حمایه ائتمک هر بیر موسلمانین بورجودور.

بیز گونئی آذربایجان‌لیلار قوزئی‌لی باجی قارداشلاریمیزین یانینداییق و هر زامان اونلاری ائرمنی‌لرین قارشی‌سیندا ساوونوب دستک‌له‌یه‌جه‌ییک. اینشاللاه بیر گون الله‌ین یاردیمی و میللتیمیزین ایراده‌سیله ایشغال‌چیلاری قاراباغدان قوووب ایشغال اولونموش توپراغلاریمیزی گئری قایتاراجاغیق.