آخشام چؤکر، هاوا توران ووراردی. آستا-آستا توزو تورپاغی چیس دومان دان نملنمیش کوچه‌لردن اتک‌لریمیزی چکیب چیی کرپیج‌لرله تیکیلن کیچیک ائولریمیزه قاچاردیق.

ائویمیز مبلمان‌سیز، دکوراسیون‌سیز، کاناپه‌سیز ایدی آنجاق، قاپیسیندا باجاسیندا داییما، غریبه بیر دالغالار بورولمادا ایدی.
آغ- قارا تلویزیونون اؤله‌زیک صفحه‌سینده فیلم‌لره یاریمچیق، باخار- باخماز، دیب اوتاغا یوللاناردیق، گیرسوز چیراغین ایشیغیندا مشق یازماغا. او واختی برق تئز- تئز گئدردی. یوخو تؤکه-تؤکه دده یاندیران مشق‌لر یازاردیق، باجیم‌لا من.

بعضن آنام گلیب یاتماغیمیزی گؤرردی؛ نیگران- نیگران بیزی سیلکه‌له‌ییب چاغیراردی... "صاباح خانیم سیزی اؤلدوره‌جک هاا"دئیردی.

بیرآز ازیلیب بوزولردیک، سونرا معللیمین بارماقلاریمیزین آراسینا میدادی قویوب ایشکنجه وئرمه‌یینی دوشونرکن یوخوموز قاچاردی.
بعضن گئجه‌نین تام سوکوتو ایچینده کیچیک باغچایا آچیلان تاختا پنجره‌میزین آرخاسیندا، کولک وییلداردی، سونرا پنجره نین جیریق‌لاریندان زورلا ایچری گیرن هاوا دالغالاری جوموب گیرسوزون شعله‌سین نئچه آنلیق اویناداردی. اونونلا دا اوتاقدا بوتون اشیالارین کؤلگه‌سی بؤیویوب رقصه گلردی.

مشقی بوراخیب باجیم‌لا کؤلگه-کؤلگه اویناردیق. گیرسوزلا دیوار آراسیندا بارماقلاریمیزی دبردیب قورد شکلی، قوش شکلی چکردیک...

پاییز گئجه‌لری عجیب اولاردی. بعضن اوتاغا گئدنده گیرسوزون دیبینده آچیلی قالمیش بیر کیتاب گؤرردیم."درجستجوی نان". بیلمزدیم هانسی قارداشیمیندی، ندی. ورقلردیم، آنجاق هئچ جوره باش آچا بیلمزدیم...

سونرالار بو کیتابی درین بیر هوس‌له اوخودوم. ماکسیم گورکی‌نین رمانین. بو رمان گورکی‌نین اؤز حیاتیندان تصویر ائله‌دییی پارچالاردیر. بیر باشماقچی دوکانیندا ال آلتیندا ایشله‌ین اوشاغین آجیناجاقلی‌حیاتی. اوشاق مدرسه‌یه یازیلماق ایسته ‌ییر آنجاق اونو یوخسول اولدوغونا گؤره هئچ جوره مدرسه‌یه داخیل اولماغا یول وئرمیرلر. رمان باشدان باشا تنها بیر اوشاغین ناغیلی‌دیر آلچاقلیق دولو بیر دونیادا.

هه، پاییز هر گلنده ایندی ده ایندی‌دیر منه هرشئی‌دن چوخ اوزاق ایل‌لرین طناز گیرسوز چیراغینی خاطیرلادیر! چئوره‌سینده رقص ائدن آرخا باغی، تاختا پنجره نی، کؤلگه رسم‌لری، و «درجستجوی‌نان»رمانینی...