»تراختور» ساده‌جه بیر کولوب دئییل، ۳۵ میلیون حاقی تاپدالانمیش تورکون اعتراض سسی‌دیر.

گونئی آذربایجانین سیموولارین‌دان بیرینه چئوریلن «تراختور» فوتبول کولوبو بو گونلرده شؤهرتی‌نین پیک نقطه‌سینه چاتیب دئسک یانیلماریق. کلوب مشهور آلمان سایتی «ترانسفرمارکت» طرفین‌دن آزارکش سایینا گؤره بین الخالق قیمتله‌‌ندیرمه‌ده بئش اینجی ان چوخ آزرکشی اولان کلوب کیمی گؤستریلیب.
بئله‌کی، کلوبون ائو اویونلارینی کئچیردیی «یادگار امام» (سهند) ایستادیونونا
اورتالاما هر اویون‌دا ان آزی ۵۰۰۰۰ آزارکش گلیر.
رقیب کوماندالارین قورخولو یوخوسونا چئوریله‌ن ایستادیون‌دا طرفتار دسته‌یی هر اویون مؤحتشم‌دیر.
کولوبون واجیب اویونلارین‌دا ایستادیون‌دا یئر تاپا بیلمه‌یه‌ن آزارکش کوتله‌سی ایستادیون اطرافی تپه‌لردن اویونو ایزله‌مک مجبوریتین‌ده قالیر. بیر نئچه ایل اؤنجه «تراختور»- «فجر سپاسی» گؤروشونو ۱۲۰۰۰۰ آزارکئش ایستادیون و اطراف تپه‌لردن ایزلمیش‌دی.

بس نئجه اولدو دا کلوبون شؤهرتی بو قدر آرتدی؟ سببلری گؤرمک اوچون ساده‌جه گونئی‌ده ایللردیر بوغولماق‌دا اولان اعتراض سسلرینه قولاق وئرمک کیفایت‌دیر.
ایران حاکیمیتی‌نین غیری-فارسلارا قارشی آپاردیغی آیری-سئچکی‌لیک البته کی، کوتله‌جه داها چوخ اولان آذربایجان تورکلرینه تأثیر ائدیر. بو تعضییق و آیری‌سئچکی‌لیک قارشی‌سین‌دا عکس تأثیر ایسه گئج-تئز بیر یئرده اؤزونو گؤستره‌جک ایدی. و بو غریبه سسلنسه ده سیاست‌دن اوزاق یاشیل میدانلاردا باش وئردی. میللت اعتراض ائتمه‌یه بیر میدان تاپدی او میدانین آدی ائل دیلی ایله دئسک «قوردلار دره‌سی» - تبریزین «سهند» ایستادیونو ایدی. ایستادیون بیر اعتراض تریبونونا چئوریلدی و مینلرله آذربایجان‌لی بورادان اؤز اعتراض شوعارلارینی ائشیتدیره بیلدی. «تورک دیلین‌ده مدرسه اولمالی‌دی هر کسه»، «نه موتلو تورکوم دیه‌نه»، «آذربایجان بیر اولسون ایسته‌مه‌ین کور اولسون»، « قاراباغ بیزیم‌دیر بیزیم اولاجاق» کیمی شوعارلار بیر داها ثبوت ائدیر کی، «تراختور» ساده‌جه تبریزه دئییل بوتون شیمال‌لی گونئی‌لی آذربایجانا مخصوص‌دور.