آنا صحیفه یازارلار |
فارسلارلا توتوشدوراندا بیزیم رسانه گوجوموز هئچ ساییلا بیلر. ایستر ایرانین ایچینده اولسون، ایسترسه ایرانین ائشییینده، اونلارین رسانهلری بؤیوک اقتصادی اولاناقلاردان یارارلاناراق ائتگی آلانلارینی گونو گوندن گئنیشلندیرمکدهدیرلر. ایرانداکی فارس رسانهلر حؤکومته باغلی اولدوقلارینا گؤره، بیزیم سسیمیز اولا بیلمزلر. نه یازیق کی، ایراندان ائشیکدهکی فارس رسانهلر ده سویچولوق دوشونجهلرینه باغلی اولدوقلارینا گؤره بیزیم سسیمیز اولماق ایستمزلر.
بو آرادا، بیزیم اؤزوموز اؤزوموزون سسیمیز اولمالیییق! رسانه گوجو باخیمیندان فارسلارلا توتوشدورولا بیلهجک بیر دورومدا اولماساق دا، سانال دونیانین اولاناقلاریندان دولایی بیزیم ده الیمیز بوش دئییل. ائله بو سون ایللرده بیزلر، بو آز امکانلاریمیزلا، سانال دونیانین اولاناقلاریندان یارارلاناراق بیر چوخ ایشلری یئرینه یئتیرمکده باشاریلی اولموشوق. بو گونه دک، نئچه سئری، بیزیم سانال دونیاداکی گوجوموز شوونیستلری گئری چکیلمک زوروندا قویوبدور.
گوندم خبرلر و بشر حاقلاری قونوسوندا چالیشان فیکیرداشلاریمیز، آذربایجان تورک میللتینین ایستکلری اوغروندا چالیشدیقلارینا گؤره توتوقلانان یولداشلاریمیزین سسی اولماقدا، اللریندن گلهنی اسیرگهمهمیشلر، دئیه دوشونورم. آنجاق، دوغال اولاراق، توتوقلاندیقلاری گونه دک تانینمیش اولمایان یا دا آز تانینمیش اولان بیر سیرا توتوقلولارین آدلاری یئترینجه ائشیدیلمهمیش، سونوج اولاراق دا اونلارین سسی اولماقدا یئترینجه باشاریلی اولا بیلمهمیشیک.
بو باخیمدان، سسسیزلرین سسی اولماق داها آرتیق اؤنم داشیماقدادیر. دئمک، آذربایجان میللی دئموکراتیک حرکتینین چالیشقانلاری سسسیزلرین سسی، کیمسهسیزلرین دایاغی اولمالیدیرلار. آذربایجان میللی دئموکراتیک حرکتینین چالیشقانلارینین ایلکین و اؤزگون گؤرهولری آذربایجان تورک میللتینین سسی اولماقدیر.
سایین حکیمه احمدی خانیمی چوخلاری تانیماییر. بونا گؤره ده اونون توتوقلانماسی و گؤز آلتینا آلینماسی حاقدا بیلگیمیز چوخ آزدیر. ائشیتدیکلریمه گؤره، اونا بئش یوز میلیونلوق وثیقه کسمیشلر. آنجاق، عاییلهسینین یوخسوللوغونا گؤره بو وثیقه تأمین اولونا بیلمهمیشدیر. حکیمه احمدی کیمیلرین ساییسی آز دئییل. گلین، الیمیزدن گلدییی قدر سسسیزلرین سسی، کیمسهسیزلرین دایاغی اولاق!
تاریخ
2020.01.22 / 20:25
|
مولف
محمد رحمانی فر
|