تبریزین سویوغونو آنلاماق اوچون تبریز ده یاشاماق گره کیر. بو ایل تبریزین سویوغو قار ایله ایچ ایچه گیرمیش اینسان هم ائشیگینی هم ده ایچینی دونداریردی.

کیمسه اونون آدینی بیلمیردی. ساده جه خبرلر ده قیسا اولاراق دئییلدی نئجه اؤلدویو. تبریزین عئینالی داغیندا بیر قادین دوناراق اؤلدو. کیمسه سوروشمادی او قادین کیم ایدی؟ ندن بیرگون بویونجا عئنالی داغیندا قالدی؟ ندن دوناراق اؤلدو؟ آدی نه ایدی؟
دوناراق اؤلمک نئجه بیر دویغودور بیلیرسینیز می؟ هر طرفین سویوقدان بوز باغلار. نفس آلماغین چتینلشر. بوزوشرسن.

بیر طرفین ایسسی اولسون دئیه اؤزون اؤزونو قوجاقلارسان. کیسمه یوخدور اطزافیندا. کیمسه سسینی دویماز. سویوق اؤنجه دریندن ایچری گیرر. سونرا قانین یاواش یاواش دونار. سونرا سوموکلرین و ایلیگین. سویوقدا اؤلمک اؤلوملرین ان چتینیدیر بلکه ده. چونکو آغرینی توم ووجودونلا حیس ائدرسن.

تبریزین داغیندا بیر قادین سویوقدان اؤلرکن میللت وکیلی آدایلاری گازلی سوبالار اطرافیندا وعده نطقلری آتیردیلار. میللتین سورونلاری نئجه چؤزجکلرینی دئییردیلر. و اونلارین سؤزلرینی آلقیشلارین مینلر اینسان وار ایدی. کیمسه آما او قادینی نین سسینی دویماق ایسته مه دی. حتی کیمسه اؤلدوکدن سونرا خسته خانایا گئدیب اونون آدینی بئله اَیرنمک ایسته مه دی. میللت وکیلی آدایلاری بئله اؤزلرینه زحمت وئریب بو مسئله نین دالینی توتمادیلار.

و بیر قادین عئینالی داغیندا دوناراق اؤلدو. کیمسه اونون آدینی بیلمه دی.