آنا صحیفه یازارلار |
کؤچورن: شبنم توحیدی
ایستانبولدا طیارهدن ائنن کیمی اونلاری دؤورهیه آلدیلار. لاپ فیلملرده اولدوغو کیمی، اولجه پولیسلر، سونرا آغ پالتاردا، ایری شوشه گؤزلوکده، ماسک و الجکده طب ایشچیلری، آمبولانسلار... دئمک، تورکیه ده قرنطینه کئچمیشدی. نه تئز؟! او دا دستهیه قوشولدو. بوردان چیخماق، مئشهده غفلتدن قارشینا چیخان آج پلنگین پنجهسیندن قورتارماق کیمی بیر شئی ایدی.
...اونلار هانسیسا بیر کلینیکین زئرزمیسینه یئرلشدیریلمیشدیلر.
هر کسه ده بیر جوت الجک، بیر ماسک وئرمیشدیلر. سیرا ایله دوزولموش طبی چارپایالار دا سانکی آغ ماسک گئیینمیشدی.
گؤرونور، بورانی اولجهدن حاضیرلامیشدیلار. هره اؤز چارپایاسیندا ملول-موشگول اوتورموشدو. کیمی الجکله، کیمی ماسک ایله اویناییر، کیمی ده ماسکاسینی تاخیب اوستوندن برهلمیش گؤزلری ایله اطرافینی سئیر ائلهییردی. بو قورخولو، حئیرت دولو باخیشلاردان باشا دوشمک اولاردی کی، بوردا هر کس بیر-بیرینه رئال خسته کیمی باخیر. آرالاریندا زنجی (آغ - قارا)، روس دا واریدی.
یقین کی، ایش آداملاری ایدیلر. آمما وظیفهلیلر- مامورلار دا یوخ! دئییلدیلر! داورانیشلاریندان حیس اولونوردو کی، بورانی اؤزلری اوچون حقارت حئساب ائدیرلر! بو جور موناسیبتدن، طبیعی کی، ممنون دئییلدیلر. سانکی اونلار دوغرودان دا اؤلمجول ویروسا یولوخموشدولار، شهره چیخسالار بوتون اینسانلاری، اینسانلیغی، جمعیتی محو ائدهجکدیلر! لاکین بیر ایش ده واردی کی، بونلار هامیسی اولماسا دا، بوردا کیمسه، یا کیملرسه ویروسا یولوخا بیلردی. اگر ویروس دئییلن و شوقریب هاوا-دامجی یولوینان اینسانلارا کئچیردیسه، دئمک، بونلار دا بیر جانلی کیمی یقین کی، او هاوا ایله نفس آلیبلار، داها سو ایله، یا تورپاقلا یوخ کی...
مالیک الجکلرینی، ماسکاسینی گئیینیب کونجدهکی چارپایاسیندا یئمکدن کوسموش اوشاقلار کیمی بوزوشوب اوتورموشدو. هم یورولموشدو، سوسوز ایدی. هم ده قورخموشدو، بیردن ویروسا یولوخسا... انگیلیسدن گلیردی. اوردا یئنی مولک آلمیشدی.
مامورلارین چوخو اوردان ائو، اوبیئکت (اشیاء) آلیب. او دا آخینا قوشولموشدو. کیمدن اسکیک ایدی؟ وظیفهسی، پولو-پاراسی... نییه ده اولماسین؟! ایندی ده یامان یئرده آخشاملامیشدی... اون دؤرد گون بوردا قرنطینهده قالاجاقدی... نئجه دؤزهجکدی؟ ائله بیل اونو غفلتن، گؤزلنیلمهدن یاخالامیش، حاقسیز اولاراق سوچلاییب اون دؤرد ایل ایش کسمیشدیلر. بودور، اوتور بوردا، «اون دؤرد گون» چکهجک، دئییرلر.
تئلفونونو جیبیندن چیخارتدی، ائوه معلومات وئرمک ایستهییردی.
اونا خئیلی زنگ، مئساژ گلمیشدی. بیر-بیر آچیب اوخوماغا باشلادی. بیرینجی مئساژ باکیدان، آروادینین حکیمیندن ایدی.
گئجه آروادینین حالی آغیرلاشمیش، «تعجیل یاردیم»لا گتیریب خستهخانایا یئرلشدیرمیشدیلر. سحر معاینه زامانی اوندا خرچنگ (سرطان) آشکارلانمیشدی. ایندی اونا کیمیاتراپییا (شیمیدرمانی) لازیم ایدی.
آنجاق خستهیه دئیه بیلمیردیلر. اونون - أرینین دئمهسینی، باشا سالماسینی گؤزلهییردیلر. بئله... اوزون موددتدی اؤزونو ناراحات حیس ائدن آروادینین خستهلییی، دئمک، خرچنگین (سرطان) علامتلری ایمیش... بو خستهلیک ده ایللردی ائله ویروس کیمی یاییلماقدادی... گؤرهسن بونون قاباغی نه واخت، نئجه آلیناجاق؟ دوغرودانمی بونون معالجهسی تاپیلمایاجاق؟..
اؤزو ده أن حساس، کؤورک اینسانلاری چکیب آپاریر... اؤکوز خصلتلی آداملارین بو خستهلییه توتولدوغونو ائشیدیب، گؤرموسونوزمو؟ یقین کی یوخ! ائله بوردان یولا چیخیب اونون درمانینی تاپماق گرکدی...
ایکینجی مئساژ قیزیندان ایدی. موسکو-دان یازمیشدی. روسیه ده قرنطینه کئچیب. بوتون ایشچیلر ائوینه گئدیب. او ایسه شرکتده قالیب. ائوه گئتمهین ایمکان اولماییب. هم ده یامان قورخور... بیردن ویروسا یولوخسا بوردا نئیلهیهجک؟! آتاسیندان کؤمک گؤزلهییردی...
اوچونجو مئساژ اوغلوندان ایدی. میلان-دان یازیردی. دوستلاری ایله گزمکدن قاییدارکن پولیسه تابع اولمادیقلارینا گؤره حبس اولونموشدولار. ایندی او دا آتاسیندان کؤمک گؤزلهییردی... بوردا قالماقدان قورخور. شرایط دؤزولمزدی... - دئییر. اوه، فرسیز اوغول!...
کیشی یئریندن دلی کیمی قالخدی. قاپینین آغزینا گلدی. چؤلدن، یوخاریدان پولیسلرین قاریشیق سسلری ائشیدیلیردی. ایکی-اوچ دفعه «پولیس» - دئیه سسلندی. سونرا قیشقیردی. سسی زئرزمینین کونج-بوجاغینا دهییب قاییتدی. ائله بیل اونلاری قویونون دیبینه سالمیشدیلار. سس یوخارییا گئتمیردی. بیر آز گؤزلهییب گئرییه قاییتدی. یاتاغینا اوزاندی. قارنینی سانجی دوغراییرمیش کیمی قالخدی، قیوریلیب اوتوردو.
حیاتییندا ایلک دفعه ایدی کی، هئچ کیمه، هئچ نهیه گوجو چاتمیردی. اونون سسی، سؤزو ائشیدیلمیردی!
- ایلاهی، اؤزون کؤمک اول! - ایلک دفعه یارادانی یاد ائلهییب اورکدن کؤمک ایستهدی.سونرا دا فیکیرلشدی کی، گؤرهسن آخیرینجی دفعه یارادانین آدینی نه واخت، هاردا، هانسی شرایطده چکیب؟ خاطیرلایا بیلمهدی.
اوتوردوغو یئرده یاتمیشدی دئیهسن. سسه آییلدی. اؤزونو چوخ أزگین، یورغون حیس ائدیردی. ائله بیل آغیرلاشمیشدی. نم، رطوبتلی یئرده نه قدر دؤزه بیلهجکدی؟ قیزدیرماسی واردی. یقین کی، اوتاغین هاواسیندان ایدی. دورماق ایستهدی. طاقتی یوخ ایدی.
اطرافداکیلار اونا تعجوبله، حئیرتله، قورخو ایله باخیردیلار.
بیر آزدان پالتارلی، ماسکلی حکیملر اوتاغا آخیشدی. اونو گؤتوروب باشقا بیر تک چارپاییلیق اوتاقدا یئرلشدیریب گئتدیلر.
کیشی یای کیمی گریلدی. نسه دئمک، قیشقیرماق، وضعیتینی باشا سالماق ایستهدی. سسی چیخمادی. دریندن نفس آلیب ساکیتلشمهیه چالیشدی. باجارمیردی. برکدن هؤنکوروب آغلاماق ایستهییردی. طب ایشچیلری اونا یئمک، سو گتیردی. بیر ساکیتلشدیریجی ایینه ووردولار. ماراقلی ایدی کی، اونونلا ایشاره ایله، الله دانیشیردیلار. اونو کار-می حئساب ائدیردیلر؟ نه باش وئریر؟ چیلدیرمیشدی. او، نییه دانیشا بیلمیردی؟..
...- قیزدیرماسی چوخ یوکسکدی! - خانیم حکیمین اینجه، ظریف، لاکین تلاشلی سسینه یوخودان اویاندی. حکیمدن نه باش وئردییینی سوروشماق ایستهییردی. او، ویروسا یولوخوبمی؟ یوخ، او بیلمزدی! سادهجه، یورغوندو. ایچریدن گرگیندی... عایله پروبلملری وار. بورا نمدی. هئچ واخت یئمهدییی یئمکلری یئییب، دوشمهدییی قاپالی شرایطده یاشاییب... آما... یئنه دانیشا بیلمهدی. یئنه ایینه ووروب گئتدیلر.
کیشییه گؤز آچماغا ایمکان وئرمیردیلر. اونو داوا-درمان٬ ایینه آتشینه توتموشدولار. اؤزونه گلن کیمی باشینین اوستونو کسدیریر، ایینهلهییب، اوتاغی درمانلاییب گئدیردیلر...
... دیلی آغزیندا شیشمیشدی. ترپهده بیلمیردی. بوتون بدنی دونموشدو، ایشلهمیردی. سینهسی گؤینهییردی. نفسی دارالمیشدی. آرادا نفس آلدیقجا خیریلداییردی. نه یاخشی عاغلی اوستونده ایدی. «- ایلاهی، کؤمک اول» - نئچهنجی دفعه ایدی کی، حبسخانا پنجرهسینه اوخشایان نفسلیکدن اولو گؤیلره باخیردی. حکیملر گؤزه دهیمیردی.
ایلاهی، او بوردامی اؤلهجک؟ اگر بوردا اؤلسه... یقین کی، اونو باکییا آپارمایاجاقلار. هارداسا درین بیر چالاقدا، قویودا.. باسدیراجاقدیلار... بیر اؤلکهنین چینلی مامورو اولاسان، اون اؤلکهده ائوین- مولکون اولا، ماشینلارین، پولون-پاران، قیزیلین- گوموشون اولا... بو آغیر گونلرده راحات بیر یاتاغین، یئرین اولمایا... او ائولرین بیرینده دینجلمهیهسن... آناسی دوعالارینین سونوندا همیشه بئله دئیردی: - ایلاهی، منه اؤلومون ده خئیرلیسینی نصیب ائیله! - اوندا آناسینین سؤزلرینه گولوردو:
- آی آنا، اؤلوم نه، خئیر نه؟ اؤلدون قوتاردی ده...
یوخ، سن دئمه، دوشوندویو کیمی دئییلمیش... گؤر هاردا اؤلوردو!.. اؤزو ده هانسی آدلا، هانسی خستهلیکله!
دوغمالاریندان، قوهوملاردان، دوستلاردان اوزاق بیر خستهخانانین کونجونده. بیر ایستکان چای وئرنی، «جان» - دئیهنی ده یوخ... نهاینکی اؤزو، هئچ عایلهسیندن کیمسه آلیب ییغدیغی او ائولرین، مولکلرین بیریندن دئییلدیلر... آروادی خستهخانادا، اوغلو حبسخانادا، قیزی شرکتده، اؤزو ده بئله... بوردا اؤلوب قالاسی اولسا آلدیغی او ائولرین چوخونون یئرینی، اؤلکهسینی بئله بیلن اولمایاجاقدی.. آروادینین عؤمرو بوندان سونرا گئری سایماغا باشلاییر... خرچنگ (سرطان) اوندان أل چکن دئییلدی... بیر آز گئج، بیر آز تئز آپاراجاقدی... اوغلودا فرسیز... قیزی دا هونرسیز... تک نه ائده بیلردی یاد اؤلکهده؟
قونشو اوتاقدان اونا تانیش اولان خیریلتی سسی گلیردی: شعر اوخویوردولار. یقین کی، خستهلردن کیمینسه موبایل تئلفونوندان سسلنیردی. هه... اوستاد شهریارین اؤز سسینده، قوجا واختلاریندا سسلندیردییی «یالان دونیا» شعری ایدی:
بو دونیا فانیدیر، فانی،
بو دونیادا قالان هانی؟
داوود اوغلو سلیمانی
تاخت اوستوندن سالان دونیا،
یالان دونیا...
بو شعری رادیودان دفعهلرله ائشیتمیشدی. آما هئچ واخت بو گونکو کیمی درک ائلمهمیشدی. گؤرهسن بیز نییه اؤزوموزدن قاباقکیلارین دئدیکلرینی اوخویاندا، ائشیدنده درک ائتمیریک، یالنیز او دوروما دوشنده آنلاییریق؟
آتاسی اوزون ایللر بیر رایوندا (ناحیه) حزب ایشچیسی اولموشدو. عاغیللی، ساوادلی، گؤروب-گؤتورموش کؤهنه کیشیلردن ایدی. وظیفهدن چیخاندا اونو دا الیندن آلمیشدیلار. یاشلی واختلاریندا هارا گئدیردیسه پیادا گئدیب-گلیردی.
داوامی وار
تاریخ
2020.07.09 / 23:16
|
مولف
Axar.az
|