ایراندا سنتیابرین ۱۷-دن باشلایان اعتراض آکسییالاری نین بیر آز سنگیمه‌سی ایله عینی واختدا حاکمیت رسمیلری نین نماییشلرین بیتمه‌سی باره‌ده چیخیشلاری دا آرتیب.

سیاسی رهبرلر و ایران انقلاب کئشیکچیلری کورپوسونون کوماندیرلری «اغتیشاش» آدلاندیردیقلاری اعتراضلارین قارشی‌سینی آلا بیلدیکلری باره‌ده ادعالی چیخیشلار ائتسه‌لر ده، اونلارین سس‌سیزجه عائله عضولری و یاخینلارینی خاریجه گؤندرمه‌لری باره‌ده معلوماتلار یاییلماقدادیر.

مسئله بوراسین‌دادیر کی، سون ۳ آیدا ایرانین ۳۱ ایالتی و ۱۶۶ شهرینده باش وئره‌ن نماییشلر ۴۳ ایللیک ملا حاکمیتینی ایلک دفعه جدی و بین الخالق سوییه‌ده عکس-صدا دوغوران لئگیتیم‌لیک پروبلئمی ایله قارشی-قارشییا قویدو.

بیر چوخ نفوذلو اکسپرتلرین فیکرینجه ایراندا انقلاب پروسئسی باشلاییب و حاضردا آکسییالارین قارشیسی تمامیله آلینسا بئله، حاکمیتی اوزون مدته قورویوب ساخلاماق ممکن اولمایاجاق. بونون مختلیف سببلری اولسا دا، اساس عامل ایراندا یاشایان خالقلارین دوشونجه طرزی نین دییشمه‌سی، یئنی ایستکلرین یارانماسی، فردی و اجتماعی آزادلیقلارا جان آتدیغی حالدا، حاکمیتین مسئله‌لره ۴۳ ایل اؤنجه کی تفکرله یاناشماسی و بوتون پروبلملری وطنداشلارین ایراده‌سینه اهمیت وئرمه‌دن انضباطی سرانجاملار، گوج یولو ایله حل ائتمیه چالیشماسیدیر.

مهسا امینینین اؤلدورولمه‌سین‌دن سونرا باشلایان اعتراض آکسییالارینین گئنیشله‌نمه‌سینین قارشی‌سینی آلماق اوچون رژیمین «اخلاق پلیسی»نین فعالیتینین لغو ائدیلمه‌سی ایله باغلی دئدیکلرینین اؤزونو دوغرولتماماسی حاکمیتین ملالارین تفکرونه ضد اولان هئچ بیر دییشیکلییه گئتمیجیینی گؤستردی.

عینی حالدا، اینفلیاسییانین گوجله‌نمه‌سی، ایران والیوتاسینین (ارز) دیرینین حدین‌دن آرتیق آشاغی دوشمه‌سی ایله بیریکده، اؤلکه‌نین بیر نئچه ایالتینده، خصوصیله خوزستان و هرمزگان ایالتلرینده نفت صنایع‌سی ایشچیلرینین داواملی تعطیل آکسییالاری ۱۹۷۹-جو ایل انقلابینا سبب اولان آکسییالارین تکراری کیمی گؤرونور.

۱۹۷۸-جی ایلین اوکتیابر آیین‌دا ایران نفت صنایع‌سی، خصوصیله، آبادان نفت‌آیریما زاوودوندا باشلایان تعطیل آکسییالاری قیسا مدت‌ده اؤلکه‌نین بیر چوخ یئرلرینه یاییلاراق، پهلوی رژیمینی جدی پروبلملرله قارشی-قارشییا قویموشدو.

حاضردا نفت صنایع‌سی ایشچیلرینین تعطیل آکسییالارینا قارشی رژیمین جدی یاناشماسینین بیر سببی ده، ۱۹۷۸-جی ایلده خمینی‌نین چاغیریشیندان سونرا بو ساحه‌نین تعطیله باشلاماسینین رژیم دییشیکلیینده‌کی اهمیتینی بیلدیکلریندن ایر‌لی گلیر.

بوتون بونلارلا یاناشی نه قدر اؤرت-باسدیر ائتمه‌یه چالیشسالار دا، حاکیمیتداخیلی ضدیتلر و پارچالانمالار گوجله‌نمکده‌دیر.

بو گونه کیمی عینی جبهه‌ده اولان بیر چوخ سیاستچی و سپاه کوماندیرلرینین فرق‌لی مؤقع نماییش ائتدیرمه‌یه یؤنه‌له‌ن داورانیش و چیخیشلاری اونلارین رژیم دییشیکلیینین قاچیلماز اولدوغونو حس ائتدیکلریندن ایر‌لی گلدیینی گؤستریر.

سون ۳ آی بویو اون‌لارلا سیاسی و حربی شخص حبس ائدیلیب، فرق‌لی دوشونجه‌ده اولان نفوذلو ملت وکیللرینه قارشی تضییقلر آرتیب و بیر چوخ تانینمیش دین خادیملرینین چیخیشلارینا محدودیتلر قویولوب.

دکابرین اوللرینده ایران-عراق محاربه‌سی دورونون اساس کوماندیرلریندن بیری و سپاه-ین حربی دنیز قوه‌لرینین قوروجولاریندان‌دان اولان گنرال محمد باقر بختیاری حبس ائدیلیب.

تبریزین ایران پارلامنتین‌ده‌کی نماینده‌سی مسعود پزشکیان مهسا امینینین اؤلوم سببلری باره‌ده اجتماعیته دقیق معلومات وئریلمدیینی بیلدیردیی چیخیشیندان سونرا حاکمیت‌ده اولان رادیکال کسیمه باغلی مئدیا اورگانلارینین هجومونا معروض قالب. دئمک اولار کی، ملت وکیلینین مئدیا (مطبوعات) اورگانلاری و تلویزیا چیخیشلارینا محدودیتلر قویولوب.

ملا حاکمیتینین حاضردا شدتلی رپرسییالارا (سرکوبلارا) ال آتماسی، اعدام حکملرینین آرتماسینی و اعتراضچیلاری دوشمن کیمی قلمه وئرمه‌سیی سیستمین تهلوکه‌ده اولدوغونو گوستریر. آتیلان بو سرت آدیملاری، حاکمیتین اوزونو قوروما جهدلری کیمی ده دیرلندیرمک اولار.

بوتون بونلارلا یاناشی، ملا رژیمی ۴۳ ایللیک حاکمیتی دؤورونده ایندی اولدوغو کیمی بین‌الخالق تضییقلرله اوزلشمه میشدی.

بو گونه کیمی رژیمین بؤلگه‌ده بوتون اؤزباشینالیقلارینا، بین‌الخالق قانونلارا ضد حرکت و تخریباتلارینا یومشاق مناسیبت بسله‌یه‌ن غرب اؤلکه‌لرینین مؤقعلرینین کسکین دییشمه‌سی تهران رژیمی اوچون آغیر گونلرین باشلانماسیندان خبر وئریر.