گؤیدن اؤلوم یاغیردی...

بون‌دان ۳۳ ایل اؤنجه‌سینی خاطرلایانلار بئله خاطرلاییر. بوتون شهری یویان قان، هر یئرده الی یالین تانک اؤنونه چیخان و قانینا بولانان آزادلیق جارچیلاری ۲۰ یانوار فاجعه‌سینین گؤرونه‌ن اوزلری ایدی.

بو گونه گلن و بیر چوخ فاجعه‌لره شاهیدلیک ائد‌ن بوتون یوللار ۲۰ یانواردا آیاق ساخلادی.

نه باش وئرمیشدی ۳۳ ایل اؤنجه؟ رسمی منبع‌لره گؤره یوزلرله، حقیقتده ایسه بلکه ده مینلرله اینسانی قانینا بله‌یه‌ن، قانینا سوسادان، ۵۰ میلیون آذربایجانلینی گؤز یاشینا بورویه‌ن بو فاجعه مستقیل‌لیک عشقیندنمی دوغموشدو؟

۱۹۹۰، ۲۰ یانوار، یادداشلاردا «قارا یانوار» یاخود «قانلی یانوار» کیمی قالان همین گون...

اس.اس.ار.ای-نین ایلک و سونونجو پرزیدنتی میکایل گورباچوو و اونون گوج قوه‌لری یانوارین ۱۹-دان ۲۰-ا کئچن گئجه باکییا گیرمک حاقین‌دا قرار قبول ائتدیلر.

لاکین شهر ساکینلری بوندان خبر توتاندا آرتیق آتیلاجاق بوتون آددیملار اوچون هر شئی گئج ایدی. چونکی آخشام ساعت ۷:۳۰-دا تلویزییا

ایستانسییاسینین انرژی بلوکو پارتلادیلمیش، تلویزییا یاییمی کسیلمیشدی. نتیجه‌ده، باکی‌لیلارین اکثریتی فوق العاده وضعیت باره‌ده یالنیز سحر ساعت ۵:۳۰-دا میرزه خزرین سسی ایله آزادلیق رادیوسون‌دان و ورتولیوتلاردان آتیلمیش ورقه‌لردن خبر توتا بیلدیلر.

بوندان سونرا شهر ساکینلری ال-اله وئریب سانکی بیر زنجیر تشکیل ائتدی و اوردونون قارشینا الی یالین کئچمیی گؤزه آلدی...قیرمیزی سووئت اوردوسو باکییا گیریب خالقین عزمینی قیرماق، هله جوجرمکده اولان آزادلیق توخومونو چیخاریب آتماق اوچون چالیشسالار دا، قطیعتلی سویداشلاریمیز بو توخومو بؤیودوب، مستقیل‌لیک الده ائتمک اوغروندا اوردونون قارشی‌سینا الی یالین چیخماغی، بو یولدا جانلارینی فدا ائتمیی بئله گؤزه آلمیشدیلار.

آیلارا، هفته‌لره، گونلره بؤلونه‌ن ۳۳ ایل شاهیدلرین، ائل‌جه ده بو فاجعه‌نی دویانلارین اوریینده دونن کیمی خاطرلانیر. ۳۳ ایل اولین یادداشلارا حک اولونموش فاجعه‌سی تک آذربایجانین اولمادی. بو فاجعه‌یه جانی یانان هر کس ییه دوردو. ائله آذربایجانین گونئیی، مدنی مختاریتدن محروم اولان، باغریندا آنا دیلی حسرتینی داشییان سویداشلاریمیز دا. اونلار قانلی یانواری اؤز فاجعه‌سی آدلاندیردی، بو گون حاقدا اؤولادلارینی بیلگیلندیردی، تاریخینی آنلاتدی. ۲۰ یانوار یاراسی گونئی، قوزئی کیمی بؤلونمه‌دی. بو فاجعه بوتؤو اولدو. بلکه ده بو بوتؤولویه گؤره بیر چایلا آیریلان میللت عینی دیرلری، عینی عزمی، عینی حسلری آنلاشاراق بؤلوشه بیلیرلر.

باش وئره‌ن هر آکسییا، رژیم علیهینه قالخان، حاقینی طلب ائد‌ن هر بیر تورک ۲۰ یانوار شهیدلرینین کیمی قانلا، کیمی ده معنوی واریثلریدیر.