اللریم یئنه ده کئییییب، ایملانی نئجه یازاجاغام؟! الیمده الجک وار، اما یئنه ده اوشویور. الجکلری‌می چیخاردیم، اللریمی گونشه ساری توتدوم، بلکه، قیزیشار. خانیم دئییر، نه زامان اللریم دونماسا، سن گله‌جک‌سن.
«آه! بو قیش نه اوزون سوردو. ائله بونا گؤره گئجیکمیسن؟!»
«قیزیم، گل اچری، گئدک سوبادا اللرینی قیزیشدیر».
گؤیچک ننه ایدی، الینده آچار قاپینی آچیردی. اوشاقلار اونو گؤرن کیمی قاپییا ساری قاچدیلار. سویوقدان قورتولوب ایچری کئچمک اوچون بیر-بیرینین باشینا دیرماشیردیلار.
«بو قیشین سویوغو هامینین آمانین کسیب، باهار گلسیدی، بیر آز جانیمیز قیزیشاردی».
گؤیچک ننه‌نی نه زامان گؤرسم، اؤزو-اؤزونه میزیلداییردی. فقط، تنفس اولاندا اوشاقلارین الیندن باشی قاریشیق اولدوغوندان دانیشمازدی، بیر شئی ده سوروشسایدین، های-کویدن ائشیتمزدی. چانتامی ماسامین اوستونه آتیب پئچه ساری قاچدیم، مرزییه ایله ائلناز دا اوردایدیلار. ائلناز باشینا یئنی بیر قیرمیزی بؤرک قویموشدو. «آتام دونن بازاردان آلیب»، - دئدی. - سن یادیما دوشدون. آنام دئییر، سن گلنده کؤنلوم ایسته‌ینی منه آلاجاقسان.
سوبا چوخدا ایستی وئرمیردی. گؤیچک ننه تزه یاندیرمیشدی، اللریمین دونو هله آچیلمامیشدی. اللرین یادیما دوش‌دو، آتا. قیشدا مکتبدن ائوه دؤننده «تنگه»ده منی گؤرردین، باغرینا باسیب اوووجلاریمی علینه آلیب قیزیشدیراردین، من اؤزومو نازا قویوب بوینوندان ساللاناردیم، سونرا اللریمی جیبلریمه قویوب ائوه یوللاناردیق. «اورادا کیمین اللرینی قیزیشدیریرسان؟»
دونن آسقیدا پالتونو گؤردوم، بیر آن ائله قریبسدیم کی، پالتونو گؤتوروب باشدان-آیاغا ایلدیم! پالتو سنین قوخونو وئریردی، ایلدیم و باغریما باسدیم. بو گون ده سنی باغریما باسیردیم، اللریمی جیبلریمه سالدیم او گونلری خاتیرلادیم و آغلادیم...یاخشی کی، کیمسه ائوده دئییلدی. آنا گؤرسیدی، چوخ اوزولردی. اونون یانیندا نئجه اولور-اولسون آغلامیرام.
- قیزیم ناخوشلامیشسان، نیه گؤزلرین دولوب؟
معلمه صینیفه گیرمیشدی، آنجاق من بیلممیشدیم:
- هئچ سویوقدان‌دیر بلکه.
خانیم درین-درین منه باخدی:
- یالان دئمه، بیلیرم، دؤز، قاداسی، دؤز، بالام، گله‌جک یاز گلنده… داها اللرین دونمایاجاق، گؤزلرین دولمایاجاق، - بونلاری گؤزلری ایله منه دؤنه-دؤنه دئییردی. باشی‌می آشاغی سالیب، گئدیب یئریم‌ده اوتوردوم.
- ائو تاپشیریقلارینی آچین ختلییم، - خانیم دئدی.
چانتام‌دان دفتریمی چیخارتدیم، آچیب قویدوم ماسامین اوستونه. خانیم بیر-بیر ائو تاپشیریقلارینا باخیب ختلییردی، سیرا منه چاتدی.
- آتان نئجه‌دیر؟ مکتوب گؤندریب؟ نه واخت گله‌جک؟
- هئچ، هله خبرسیزیک، - معلمه تئز گؤزلرینی من‌دن قاچیردی، داها باشقا اوشاقلارین ائو تاپشیریقلارینی ختله‌مه‌دی، قاییدیب یئرینده اوتوردو.
- کیتابلارینیزی قویون قاباغینیزا، تزه درسی کئچیرم، یاخشی قولاق آسین.
کیتابی‌می چیخاریب قویدوم قاباغیما، معلمه ایلک جمله‌نی اوخودو:
- آن مرد آمد. آن مرد در باران آمد.
اوشاقلار دا خانیم اوخودوقجا بیر سسله بونلاری تکرار ائدیردیلر. ندنسه ایکینجی جمله‌نی اوخویان‌دا دیلیم توتولدوغوندان دئیه بیلمدیم، بئینیم بیر قوش اولوب اوچدو گلدی سنین یانینا. آتام یاغیشدا گئتدی...
سن گئدنده یاغیش یاغیردی، پاییزین ایلک گونلری ایدی. بیلمیرم، ساعت نئچه ایدی. آخی اوندا ساعتی اؤیرنممیشدیم. دونه‌ن معلمه اؤیرت‌دی. یاتمیشدیم، باشیمین اوستونو آلیب منی اویاتدین، قوجاقلاییب اوزومدن اؤپدون، من ده بوینونو قوجاقلادیم:
- نه واخت گله‌جک‌سن، آتا؟
منی دیزلرینین اوستون‌ده اوتوردوب دئدین:
- تئزلیکله…
- مثلاً، نه واخت؟ بو گئجه یاتیب دورسام، گله‌جک‌سه‌ن؟
- یوخ، آنجاق گلنده سنه بیر قیرمیزی دون، بیر جوت قیرمیزی باشماق آلاجاغام.
- آها، ایندی بیلدیم، سن بایرام‌دا گله‌جک‌سه‌ن.
گولومسدین، ساچلاری‌می اؤپوب منی یاتاغیما قایتاردین:
- یات، جئیران قیزیم.
سونرا گئتدین. سنی بیر داها گؤرمک اوچون تلسیک قاچیب پنجره آرخاسین‌دا دایاندیم. آنام هئیأت‌ده دانیشیردی، سسین یاغیشین سسینه قاریشمیش‌دی، منه ائله گلیردی آناملا ویدالاشیرسان:
- اول الله، سونرا سن. اوزولمه، صفییه، تئز قاییداجاغام، تئز-تئز مکتوب گؤندره‌جه‌یه‌م.
آنام دینمز-سؤیلمز سنه باخیردی، سانکی بیلیردی تئزلیکله داها گؤزلری سنی گؤرمه‌یه‌جک. اونا گؤره یالنیز و یالنیز دویونجا سنه باخماق ایستییردی. سونرا آنامین آلنیندان اؤپوب، قاپینی آچیب گئتدین.
آنام ایسه دالینجا سو آتدی. من تئز قاچیب یاتاغیما قاییتدیم، یورغانیمی باشیما چکدیم و نه قدر ائلدیم یاتیم، یاتا بیلمدیم. چونکی آنامین آغلاماق سسی یان اوتاقدان گلیردی.
- زینب فیکرین هاردادیر؟
دیک آتیلدیم:
- هئچ، بوردایام، باغیشلایین! – دئدیم. معلمه گؤزلرینی منه برلت‌دی.
یئنی درسی دئمیش‌دی. ایندی اوشاقلارا صاباحین تاپشیریغینی دئییردی کی، زنگ چالین‌دی، هامی باییرا قاچ‌دی، اوشاقلارین نئچه‌سی قورخودان آغلاییب یئرلرین‌دن ترپه‌نه بیلمیردیلر. مرزییه قیشقیردی، خانیم اوشاقلاری باییرا یؤنلندیردی. تئز صینیف‌دن چیخیب هئیأته ساری گئتدیم، هئیأت‌ده اوشاقلار قارماقاریشیق ایدیلر.
گؤیچک ننه اویان بو-یانا قاچیردی، خانیم مودیر سالونون آغزین‌دا دایانیب اوشاقلاری ایچری کئچمه‌یه چاغیریردی. تییاره‌لری گؤرمک ایستییردیم. بیرینی گؤردوم - آلا-بولا تییاره ایدی. سانکی اوزرینی قارا و یاشیل رنگه بویامیش‌دیلار، آنجاق بویالاری قارماقاریشیق سالمیش‌دیلار. گؤی گورولداییردی، یاغیش یاغان زامانلار کیمی ایدی. بیر گؤز قیرپیمین‌دا تئز اوزاقلاش‌دی، بیردن سانکی کیمسه منی دال‌دان ایتلدی. یئره ییخیلدیم، اللریم گومبولتو ایله یئره دیدی. قالخدیم، داها طیاره‌لردن خبر یوخ ایدی. اوشاقلار هله سیغیناجاغا قاچیردیلار. اللریم گؤینییردی، گئدیب حیطین بیر کونجون‌ده اوتوردوم، بیر آز قورخموشدوم.
او زامانا کیمی یاخین‌دان طیاره گؤرممیشدیم. دئییرلر، سن اولدوغون یئرده طیاره‌لر تئز-تئز گلیرلر. «بیری سنی گؤرسه، هارا قاچاجاقسان، آتا؟»
دونه‌ن گئجه تلویزوردا سن گئتدیین یئری گؤستریردیلر، هر یئر تورپاقلیق ایدی، هر یئردن سس گلیردی. سسلری سئچه بیلمیردیم. آنا دئییر، بلکه، سنی ده تلویزوردا گؤستریبلر، آنجاق من گؤره بیلمدیم.
یولداشلارینی گؤروردوم، چوخونون پالتاری توز-تورپاق‌لی ایدی. حتی قاچاندا یئره ییخیلمیشدیلار. هردن گومبولتو سسی گلیردی. بیر یئردن تورپاق گؤیه قالخیردی، یولداشلارین ائله هئی دانیشیردیلار، آنلامیردیم نه دئییرلر. بیرینی یورغان آراسینا قویوب آپاریردیلار.
یئنه سیگنال سسی اوجالدی. صینیفلره قاییتمالی ایدیک ایندی. تنگه‌ده قونشولار بیر یئره ییغیشیب دانیشیردیلار.
همیشه طیاره‌لر گلیب گئدندن سونرا قونشوموزدا اولان آروادلار اعظم خانیم گیلین قاپیسینا توپلاشیب هر شئیدن خبر وئریردیلر. آنام هئچ زامان آرالاریندا گؤرونمزدی، یا نفت، یا دا ارزاق نؤوبه‌سین‌ده، بزه‌ن ده چؤرک آلماقدا یا دا... نه بیلیم… «سنین ایشلرین قورتارمالی دئییل»، - آنام دئیردی. من مکتبدن ائوه دؤننده هردن ائوده اولمازدی، من ده قاپی دالیندا قالاردیم. منی گؤرمه‌ینده سندن گیلیلنردی.
اوشاقلار های-کویله سیغیناجاقدان چیخیردیلار.
«بیزی اونوتموسان؟!»، - بونو دونن گئجه آنا دئییردی، اؤزوم ائشیتدیم. تاخچاداکی شکیلینین قاباغیندا دایانیب سنله دانیشیردی. من یاتاغیمدا ایدیم، یورغانیمی باشیما چکمیشدیم، آنجاق هله یوخولامامیشدیم. دوشونوردوم بیر رسم چکیب، سنه گؤندریم. گلیب چات‌سا، اولا بیلسین بیر شئیلری خاتیرلایارسان.
ندنسه دیزلریم گؤینییر، آخی اللریم یئره دیمیشدی. آییلیب دیزلریمه باخدیم، شالواریم بیر آز جیریلمیشدی.
سن یوخسان، یوخسا سنله قوناق اوتاغیمیزدا اوینایا بیلمزدیم. من قوزو اولوب ملییم، سن ده قورد اولوب منی قووالایاسان. سونرا سسیمیزه آنام گلیب دئیینسین. سن گئدندن سونرا آنام قوناق اوتاغینین قاپیسینی قیفیللادی. ایندی اورا سویوقدان آیاق قویمالی دئییل. آنا دئییر، سن گلنده قاپیسینی آچاجاق.
صینیفه قاییتدیم، اوشاقلار هله طیاره‌دن دانیشیردیلار. کاش کی، طیاره‌ده چکدیین شکیلینی گتیریب مکتبه - اوشاقلارا گؤستریب دئیردیم کی، بو طیاره‌نی سن سورورسن. بوردا اولسان، گؤرردین سنله نئجه فخر ائدیره‌م.
معلمه یئنیدن صینیفه گیرمیشدی، بو درس ایملا یازمالی ایدیک. نئچه گئجه‌دیر یوخوما دا گلمیرسن. اوردا یولداشلاریندان ناغیل اؤیرنیب، قاییداندا هامی‌سینی منه دئیه‌جکسن. بونا سون مکتوبوندا سؤز وئرمیشدین. معلمه ایملانی باشلامیشدی، دفتریمی چیخاریب یازماغا باشلادیم. اللریم هله ده گؤینییردی.
