کولت آذ گونئیلی تانینمیش شاعیر و ژورنالیست حبیب ساسانیانین قلمیندن سوزولن شعری اوخوجولارینا تقدیم ائدیر:

اؤتدۆ حسرت دَه عؤمۆر، ایندی اۆرَک قان دێ گۆلۆم

ائلیمین قایغێسێنا آرزولارێم یاندێ گۆلۆم.

هر یئتن توْولادێ بو میللت بیچاره میزی

سس قازانجاق اَکیلیب سؤزلرینی داندێ گۆلۆم!

اونودوب (من سنه بیر یار وفادار) ێنێ، یار

تالانێب خرمن صبریم باشا - باش یاندێ گۆلۆم.

سئوگی بیر نعمت الواندێ مۆقددس دی اینان

حئیف اولا دۆنیا مالێندان سارێ کوْرلاندێ گۆلۆم.

تیکه لَر قارما - قارێش دۆشدۆ، صداقت اؤلدۆ

چوْخلارێ میز ریاست لَره آللاندێ گۆلۆم.

تکجه اؤز عاییله سین دَن اؤتۆرۆ بئش گۆنلۆک

بیر ائلین دۆنیا بْویو وارلێغێنێ داندێ گۆلۆم!

بو فلک اؤز باشێنا فیکر ائله مَه فێرلانێری

چوْخلارێن دست قضا، پیس دوروما سالدێ گۆلۆم.

سن مکافات عمل دن نه بیلیرسن گؤزه لیم؟

چوْخلو ظالیم لَری اؤز قێیناغێنا چالدێ گۆلوم.

گَل گیلن ساده محبت له جهاندا یاشایاق

چوْخلو عاشیقلری، خام عشقی دیله سالدێ گۆلۆم.

من اؤزۆم مین دنه مجنون اوْلا، اوْندان دا باشام

گؤزلَریم -گؤزلرینه هؤیرۆنۆ چۆن سالدێ گۆلۆم.

باخما معیاره دؤنۆب پول - پارا حؤکم ائتمه دَه دیر

منه اوْ غونچه دوْداق بسدی یئتر، بالدێ گۆلۆم.

عؤمرۆمۆ حصر ائله دیم، دوْغما آزربایجانێما

سندَه انصاف ائله دوستاقدا گۆنۆم قالدێ گۆلۆم.

بو یانان کؤنلۆمه سو سَپ گؤزۆنۆن قوربانێیام

چوْخ یوباندێرما، اجل قوْنشویا یوْل سالدێ گۆلۆم.

سن شکار ائیله سێنێق کؤنلۆمی گۆلسۆن یاکاموز

غافل اوْلسان ائشیدرسن کی اجل چالدێ گۆلۆم.