کولت. آذ مممد ایسماییلین "نیینه گرک؟" آدلی شعرینی تقدیم ائدیر:

داها من سنینچون کئچیلمیش یولام،
اوخونموش کیتابام، دریلمیش چیچک.
دؤنوب ایننه‌ن بئله لاپ قیزیل اولام،
یا کی داش پارچاسی، نیینه گرک؟!

آخی، هر چیچیین عمرو بیر دریم،
کؤکسونده نار کیمی یئتیشیب اورک.
نیینه گرکدیر یورغون اللریم،
دالغین خیاللاریم نیینه گرک؟

چاتار قولاغینا اوزاق سوراغیم،
یاخین اولفتیمین دردینی آز چک.
نیینه گرکدیر سولان یاناغیم،
سولوخان دوداقیم نیینه گرک؟

قییما محبتین جوان چاغینا،
پاییز حسرت چکر یاز یارپاغینا.
اؤلموشم، قالمیشام نیینه گرک؟
هارادا قوجالمیشام نیینه گرک؟