آتن شهرینه گیریش مؤهورو پاسپورتوما باسیلدیقدان سونرا در حال موبایلیمی کنترل ائدیرم. تبریزده مهاجرت اوچون مشاوره ائتدیییم شخص، واقعی قیمتیندن نئچه قات چوخ پول اؤده‌دیییم آتن- برلین بلیتینی واتساپ حسابیما گؤندردیینه سؤز وئریب. بلیتی گؤندرمه‌سه‌لر نه ائده‌جه‌ییمی و اؤزومو نئجه برلین شهرینه چاتدیراجاغیم باره‌ده هئچ بیر فیکریم یوخدور. هؤوشنه‌لی اولسام دا منفی فیکرلره قاپیلماق ایسته‌میرم. آدیما آلینمیش بلیتی واتساپ حسابیمدا گؤرونجه اوره‌ییم یئرینه گلیر. سئوینجک برلین مقصدینه اوچوش کارتی آلماغا گئدیرم. بلیت گئیتی ایسه هله آچیلماییب. غیرقانونی مهاجیرلرین پوسقوسوندا یاتان قارایاخا پلیس‌لرین دقتینی چکمه‌ییم دییه ایکینجی مرتبه‌ده‌کی رستورانلارین بیرینده اوتورماق قرارینا گلیرم.

سورونگن پیلله‌لردن یوخاری قالخیرکن سالونون یئر به یئرینده‌ دوزولموش تندیس‌لره گؤزوم ساتاشیر. آتن شهری فیلسوفلارین و فلسه‌نین آنا شهری‌دیر. فلسفه فاکولته‌سینده درس اوخودوغوم گونلر بو شهری یاخیندان گؤرمک حیاتیمین بؤیوک آرزولایندان اولموشدو. ایندیسه فلسفه‌نین آنا شهرینه بو قدر یاخین اولدوغوم حالدا اؤزومو بو شهردن اوزاق ساخلاماغا چالیشدیغیما گؤره کدرلنیرم. هتل رزرواسیون برگه‌سی کیفیمده اولماغا دئییل، قانون دیشیندا آتن اؤلکه‌سینی بیر کئچید کیمی قوللانیب، آلمان و آیری اؤلکه‌لره سیغینماق قصدی اولان مهاجیرلرین بیر چوخو آتن باتاقلیغیندا گرفتار قالدیقلاریندان چوخلو حیکایه‌لر ائشیتمیشم. گله‌جکده بیر توریست کیمی بو شهره گئری قاییداجاغیمی اؤزومه وعده وئریب، منی ماراقلاندیران تندیس‌لری یاخیندان گؤرمکدن واز کئچیرم. اؤزلویومده تندیس‌لرین بیرینی بقراط، بیر آیریسینی سقراط و ساچلارینی تپه‌سینه توپلامیش تندیسی هیپارچیا تصور ائدیرکن کافه‌لرین بیرینده دینج بیر یئر تاپیب، أیلشیرم. أیلشمک همن یاشا دولموش بیر قارسون گؤبلک کیمی میز باشینا قونور. (گؤبلک کیمی میز باشیندا گؤیریر.) اونون هانسی سمتدن گلدیینه بئله برخود اولمادیم.

میز باشیندا اوتوردوغوما گؤره بیر شئ‌لر سفارش وئرمه‌لی اولدوغومو باشا دوشوب، دینمز دانیشماز منیو دفترینی گؤزدن کئچیریرکن أل قولتوق دوران قارسون سفاریشیمی گؤزله‌ییر. باخیشی هئچ ده التفاتلی نظره گلمیر. سفارش وئرمه‌سم میز باشیندان قالخماغا مجبور قالاجاغیمی دوشونورم. بیر آن فلاسکیم یادیما دوشور. نه قدر ذهنیمی زورا باسیرام قاینار سویون انگلیزجه آنلامی یادیما دوشمور. داغ سو ایله قاینار سو سؤزونون ائله ده فرقی یوخدور دییه فلاسکی چمداندان چیخاریب، قارسونون ألینه وئریرم.

هوت water آند two تئاباگس.

او ایسه دلی‌یه باخان کیمی اینانماز اینانماز اوزومه باخیر. منه ائله گلیر کی قارسونلوق حیاتیندا قاینار سو سفاریش وئرن بیر مسافیرله هئچ راستلاشماییب. گؤزلرینده دئییلن سؤزو اؤزومه ترجمه ائدیرم: «بو دیلنچی توریست ده هاردان تاپیلیب گلدی!»
قارسون فلاسک ایله گئری قاییدیب، حساب فیشینی ده فلاسکین کنارینا قویوب، یئنه أل قولتوق دایانیب اوزومه باخیر. حسابی گؤرونجه آز قالیر گؤزلریم تپه‌مه چیخیسین. اون یورو کیفیمدن چیخاریب فیشین اوزه‌رینه قویورام. اون یورویلا اؤلکه‌میزده نئچه فلاسک داغ سو دولدورماق اولار دییه دوشونورکن گؤز آلتی یان میزلرده ایلشن‌لره باخیرام. بیر آن سالونون دیبینده دئو بیر خوم گؤزومه ساتاشدیغیندا ایچیمده اوشاق یانا بیر سئوینچ یارانیب، بیر فلاسک داغ سویا وئردیییم اون یورونون آجیسی ایله قارا یاخا پلیس‌لرین قورخوسو باشیمدان اوچور. یئریمدن قالخیب شیشه‌ایله حاصارلنمیش خوما ساری گئدیرکن اؤزلویومده دئییرم: «یورد وار لـله یوخ. کاش خومون ایچینده دیوژن تندیسینی ده یاراشدیراردیلار.»

ائله او آن ساچلاری پیرتلاشیق، قارقا بورون، چلاق بیر کیشی ألینده رادیولوژی فیلمی چلییی یئره تاپدایا تاپدایا منه یاخینلاشیرکن او دا تندیس‌لر کیمی هاوا لیمانینین اؤزل خلاقیت‌لرینین بیر پارچاسی اولدوغونو دوشونورم. اؤزلویومده میزیلدانیرام: «بویور، بو دا خوم ایچینده آختاردیغین دیوژن!»

کیشی آنلامادیغیم دیلده بیر سؤزلر دئییرکن رادیولوژی فیلمینی منه ساری اوزالدیر. بیر آن هؤوشنه‌لریم گئری قاییدیر. کیشی‌نین سؤزونو سایمادان میز باشینا گئری دؤنورم. او ایسه آرخامجا گلیب، میز باشیندا دایانیب، دانیشیرکن گؤزونو گؤزومه تیکیر. اونون اوزونه باخماقدان بئله چکینیرم او ایسه دانیشماغیندادیر. اونو گؤرمزدن گلیب، فلاسک قاپاغینا داغ سو سوزوب، ایچینه بیر تی‌بگ سالیب، رنگ وئرمه‌یینی گؤزله‌ییرم. کیشی ایسه بیردن بیره دئییر: «سن تورک‌موسون؟!»

بیر آندا باشیما داغ سو جالانان کیمی ساچلاریمین دیبی بیزبیز اولوب، بوتون وجودوم کئهییر...