کولت آذ. ووقار نعمت-ین یازیسینی تقدیم ائدیر:

شووونیزم آدی ناپولیون بناپارتین عسگری "نیکولا شووون"دان آلینمیشدیر. نیکولا شووون، نوپولیون اوچون، سورماقسیزین، جانیندان و باشیندان کئچن، ساده‌لؤوح بیر عسگر ایدی. آنجاق، ۱۸۳۱-دن اعتیبارن فیرانسادا، "شووون" آدلی بیر کاراکتئری اولان بیر پیئس و بیر بسته ایله، شووون آدی و شووونیزم دئییمی دیللره دوشدو و بالا-بالا باشقا اؤلکه‌لره ده یاییلمیش اولدو.
اینگیلیز دیلینده ایسه "شووون" سؤزجویو، هر تور منجیل‌لیک، آشیری‌لیق و اؤزونو بیه‌نی اوچون ایشله‌نیلیر. قادینچی حرکتین: "کیشی‌سل شووونیزم" (شوونیزم مردانه) ایشلتدییی کیمی.

شووونیزم دونیا گؤروشو، اینسان و اینسانا سایقی اولقوسوندان یوخسوندور. اؤزونو اوستون گؤرمک، دیگرلرینی آشاغی‌لاماق و اونلارا قارشی نیفرت، آیری‌سئچکی‌لیک و آشیری ایرقچی‌لیق، اؤزونو بیه‌نی و سؤمورو اونلارین گؤروشلرینی اولوشدوران مؤالیفه‌لردندیر. تاریخی، دیلی، یوردو و کولتورو گئرچک‌دیشی آلقی‌لار و تانیملارلار. شووونیزم باخیش‌لیغیندا اینسان بیر نسنه (شئی، کالا) اولاراق، ساختا و اویدورما آرکئولوژی قاوراملاری اؤتورمک و تثبیت ائتمک یاخود بو تاریخی توههوم و اویدورماجی‌لیغی یایماق و گئنیش‌لندیرمک وسیله‌سی‌دیر.

ائله بو اوزدن ده، شووونیزمین آرخاسینا ساپلاندیغی توم قاوراملار چۆروک، یالان و گئرچک‌دیشی قاوراملاردیرلار و قاوراملارین، گونوموزون رئاللیق‌لاری‌یلا هئچ بیر باغی و ایلیشکیسی یوخدور. بو ندن‌لردن دولایی شووونیزم، فیکیر و دوشونجه اؤزگورلویو، اینسان حاقلاری و دئموکراسی‌نین بیرینجی دوشمانی‌دیر.

شوونیزم باخیش آچی‌سیندان اینسان، بیر قوربانلیق قویون آنلامیندادیر. یعنی اونلار، شووونیستی دوشونجه اوغرونا کسیلمه‌لی و قوربان اولمالی‌دیرلار (تاریخی، اقتصادی، اجتیماعی، کولتوره‌ل و ... اولاراق).
داعش و القاعده کیمی دین تملچی‌لرینین قونومونا میللت‌لرین دینی و اینسانی آلانلارینداکی باخیشی، میللی یاشام آلانیندا شووونیزم اوچون ده کئچرلی‌دیر. چونکو هر ایکیسی، اؤزون حق و اوستون سانان، باشقالارینی هئچه سایان و آشاغی‌لایان، ایرتیجاعی، کؤهنه‌چی، دیگرلری اؤزو اوچون قربان ائدن، اینسان و اینسان حاقلارینی و دئموکراسینی هئچه سایان، دیش‌لاییجی و کوچومسر بیر ذئهنییت داشی‌ییجی‌لاری‌دیرلار. و اؤز کیرلی، ذئهنی ایدئولوژیک آماجلارینا وارماق اوچون محو ائتمک، داغیتماق، قان تؤکمک و سوی‌قیریم (قتل عام) ائیلم‌لرینه قول قویار و اویقولارلار.

دئمه‌لی، داعش و القاعده‌نین بتنیندن دئموکراسی، اؤزگورلوک، اینسان حاقلاری، اینسانا سایقی آنلاییشی دوغمادیغی کیمی، شووونیزم و فاشیزم بتنیندن ده، بونلار دوغولمایاجاق.

اینسانلارین قورتولوشونون، بو مذهب تملچی‌لری (داعش، القاعده و ...)نین آرادان قالخماسینا باغلی اولدوغو کیمی، اسارتده اولان اینسانلیغین دا قورتولوشو، شووونیزمین و فاشیزمین اورتادان قالخماسی ایله اولاسی‌دیر.