آدم عبرانی منشالی سؤزدور. آرخائیک شکلی ایسه "آدوم"دور. معناجا آلا تورپاق، دولوسچولوق تورپاغی دئمکدیر. (باخ قاموس کتاب مقدس/ مستر هاکس ص ۲۵) . تبریزده "اَت تورپاغی" دئییلیر.

انسان سوریانی منشالی سؤزدور. انسان سؤزو جمع‌دیر لاکین سهو اولاراق مفرد کیمی ایشلنیلیر. همن سؤزون سوریانی فورماسی انشا (انس)دیر. معناجا بشر، آدم دئمکدیر. ش/س دییشیلمه‌سی اوزوندن؛ عربجه‌ده "انس" شکلینی آلمیش. همن سؤزه قوشولان "ان" ایسه جمع‌لیک بیلدیرن شکیلچی‌دیر. (باخ پژوهش واژه‌های سوریانی در زبان فارسی/ جلیل اخوان زنجانی ص ۳۴.)
حسن‌اوموداوغلو

قدیم تورک دیلی عابیده‌لرینده "یالنیز، تک، تنها" معناسیندا یال لکسیمی بیر نئچه مختلف فونتیک ترکیب‌لی سؤزلرین ایشلنمه‌سی فارس دانیشیق دیلینه کئچدییینی سؤیلمه‌یه تام اساس وئریر.

قدیم تورک یازیلی عابیده‌لرینده "یال" لکسم‌لی باشقا بیر نئچه سؤز یالانوس ، یالنوق // آدام، انسان آنلامیندا راست گلینیر.
ماراقلی‌دیر کی م. کاشغری‌نین "دیوان"یندا "انسان اوغلو" معناسیندا "یالنوق اوغلو" بیرلشمه‌سی‌نین ایش‌لندییی یالنوق اوغلو منگوُ قالماس (انسان اوغلو ابدی قالماز) جمله‌سی وئریلمیشدیر.

همین معنادا یالانوق و یالنوق سؤزلری‌نین ایش‌لنمه‌سی ثبوت ائدیر کی، تورک دیل‌لرینده بئله بیر سؤز اولموش و قدیم‌ده ایش‌لنمیشدیر. بو فاکت اساسیندا "انسان، آدام" معناسیندا اولان "یالنوق/ یالانوق"، "چیلپاق" معناسینی داشییان "یالین" (تک و تنها) معنالی یالغوز/ یالنوس لاپ قدیم‌لرده یارانمیش بلکه‌ده انسانین یاراندیغی تک، چیلپاق شکیل‌ده یاشادیغی دؤرده عمله گلمیش سؤزلردیر.

چوخ گومان کی، بوگون ده دیلیمیزده ایش‌لنن "یالنیز" سؤزونده کی (تک و تنها) معناسی همین دؤرله باغلیدیر و قدیم دؤرده "یال" لکسمی هر اوچ معنانی " تک، آدام، چیلپاق" اؤزونده بیرلشدیرمیشدیر.

فارس دانیشیق دیلینده "یالغوز" سؤزون هم‌ده "سوبای" معناسیندا ایش‌لنمه‌سی گؤستریر کی، بو سؤز فارس دیلینده یئنی سمانتیک چالار کسب ائتمیشدیر. بو سؤز "سوبای؛ تک، تنها" معناسیندا آرتیق فارس ادبی دیلی‌نین لغت ترکیبینده ده اؤزونه یئر ائتمیشدیر.
خاطیرلاداق کی آذربایجان‌دا "یالقیْز" سؤزو ( تک، کیمسه‌سیز، تنها) معناسیندا ایش‌لنیر.

معاصیر فارس دیلینده آذربایجان- تورک منشالی سؤزلر؛ کتابی