کولت آذ. فرخ جرایدی‌نین"یازیلی کؤینک" آدلی حکایه‌سینی تقدیم ائدیر:

۱۷ یاشیْم وار ایدی " آرتان "لا بیرگه بیر اوْخولدا اوْخویاردیق یاشیْت ایدیک آرتان گؤرکم‌دن گؤزل ایدی گئیدیگی چئشیدلی بوْیالی پالتارلار اوْنو بۆتۆن اؤیرنجی‌لرین ایچیندن سئچدیرردی. اوْنون دیللی-باشلی اوْلوب سؤزده قالماماغی دا بیر باشقا اؤزل‌لیگی ساییلیردی. اؤیره‌دیلن درس‌لری یاخشی باشا دۆشمه‌سه‌یدی ده، هانکی اۆنلو هانکی کؤینه‌یی، هانکی بوْیادا اوْلان شلوارلا گئییب، بوُگۆن هانکی آیاق قابیْ گۆندم گئییم ساییلیر، بوُ کیمی شئی‌لری یاخشی بیلردی. آتا-بابانین دئدیگی " بوُ اؤزۆ شیطانا درس وئرر " بۆس-بۆتونلوک‌له آرتان-ی توُتوردو، بعضا آرتانین ایکی-اۆچ آی اؤنجه گئیدیگی پالتارلاری هاچاندان-هاچانا یابانجی تلویزیوندان اۆنلولرین اگنینده گؤرۆب شاشاردیْم. یالان نه‌یه گرک من اؤزۆم‌ده بوُ تیپ گئییم‌لری چوْخ سئوردیم، آچیْقجاسی اوْنو اۆره‌گیمده قیسـقاناردیم، اۆزه وئرمزدیم، وئره ده بیلمزدیم، ائویمیزده اوْلان مادی دوُروم لا عنعنه اۆزره بئله گئییم‌لرین آدیْنی بئله ائوده توُتماق اوْلمازدی آتام باشیْمی اۆزردی.

آچیْغین دئسم یوْخسول دئگیلدیک آنجاق وارلی‌دا ساییلمازدیْق. نه ایسه... .

آرتان هر گۆن چئشیدلی پالتارلارلا اوْخولا گلردی. آرتان‌لا یاخیْن یوْلداش ساییلدیْغیمدان بیر گۆن اۆره‌گیمه اۆرک باغلاییب بوُ پالتارلارین اؤزۆنۆ هابئله پولونو هاردان گتیریر دئیه اوندان سوْروشدوم. ایلک شاققیْلدایاراق گۆلۆب منه دئدی:

" بالا بوُنلار کتلی-کۆتلو مالی دئییل بوُنلاری هر آدام تاپیْب گئیه بیلمز، سن گئت کۆچه‌نیزده منتشی‌نی دیْغیرلات "

بوُ سؤز اۆره‌گیمه توْخوندو، ایشین کؤکۆنۆ بیلمک ایسته‌ییردیم اوْ اۆزدن اؤزۆمۆ ساخلاشدیریب، یالواریْشلا دوْلو بیر سس‌له " آرتاااان " دئدیم. داها قالانیْنی اؤزۆ اوْخودو، نه دئمک ایسته‌دیگیمی باشا دۆشمۆشدو. ساغ الینی آتیْب، منیم سوْل بیله‌گیمدن یاپیْشدی منه ساری اگیلیب اهمالجا قوُلاغیْما پیْچیلدادی: " هفته بازاردان ".

۱۳۸۲-اینجی ایلدن بَری تبریزده داها آرتیْق یایغیْن اوْلان بو هفته بازاری اؤزۆنه گؤره بؤیۆک بیر آد قازانمیْشدی، یابانجی اؤلکه‌لردن گلن ایکینجی-اۆچۆنجۆ ال پالتارلار " تاناکورا " آدی ایله تانیْنیب بیراز اوُجوزونا اوْلموش اوْلسادا بوْل-بوْل ساتیْلیردی بو ایسه تبریز له آزربایجاندا بؤیۆک بیر ایش‌سیزلیگه نه‌دن اوْلوردو. بوُ آرادا اَن بؤیۆک قازانج کرد قاچاقچیْ‌لارین ایدی.

آرتان یئنه بوُگۆن بیر یئنی پالتار گئیمیشدی. یاریْم قوْل، اوْلدوقجا بوْیو اوُزون ائله‌کی آرتان-یْن دیزلرینه کیمی آز قالا چاتیْردی، بیراز گئنیش، سۆت رنگلی بیر کؤینک. اۆزه‌رینده قیْرمیز بوْیا ایله اینگلیس‌جه ده بؤیۆک بیر یازیْ وار ایدی آنلامیْن بیلمیردیک آما یازی‌نی اوْخویا بیلیردیم

" Im pregnant "

یازی کؤینه‌گین هم آرخاسیندا وار ایدی هم اؤنونده. آرتان یازیْ‌نی گؤسته‌ریب گۆله-گۆله دئییردی: " بیلمیرم نه‌یم آما من بتر بیر شئی‌یم "
اوْخولون زیلی چالیْندی. آرتیْق کلاس باشلاناجاق ایدی. ایلک درس‌ده انگلیس‌جه‌یدی. اؤیرتمه‌نیمیز " یاشار آخارسوُ " جنابلاری اوْلدوقجا اوْلقون بیریسی ایدی. هئچ بیر اؤیرنجی‌نین اۆره‌گینه توْخونماق ایسته‌مزدی.

۴۰-۴۲ اؤیرنجی بیر آرا دا اوْتوروب یئنه همیشه‌کی کیمی اؤیرنجی‌لرین تَر قوْخوسو کلاس-ا اؤزل بیر قوْخو وئریردی. دیْشاری دان بیری گلن اوْلسایدی بوُ دوُروما دایانا بیلمزدی آنجاق بیزلر آرتیْق آلیْشمیشدیق. یاشار بی بیر-بیر سیْرا ایله اؤیرنجی‌لری گؤزدن کئچیرمکده‌یدی. هر زامان آرتان-یْن اگنینده یازیلی بیر یئنی کؤینک گؤرسه‌‌یدی اوْنو آیاغا قالخیْزیب اؤنه چاغیْراردی یازیْ‌نی تمامیله اوْخویوب آرتان-یْ فیْرلاداراق کؤینه‌گین هر بیر یئرینی گؤزدن کئچیرردی. بوُگۆن اوْ گۆن‌لردن بیری ایدی. سیْرا آرتان-ا یئتیشدیکده سانکی اوْ اؤزۆده بوُنو بیلیرمیش کیمی یاشار بی آغزیْنی آچاراق آرتان گۆلۆمسه‌یه-گۆلۆمسه‌یه باشیْنی توْولاییب اؤنه کئچدی. یاشار بی یازیْ‌نی گؤرجه‌گین باشیْنی ترپه‌دیب، گؤزلرینی آرتان-یْن اۆزۆنه دیکلتدی، درین بیر نفس آلیْب پۆفۆلدۆ ایله ائشیگه وئرن‌دن سوْنرا دئدی : " باخ آرتان بوُرا کیمی نه گئیمیشدین بیر سؤز دئمه‌میشم آما قاچ بوُنو دگیش گل. "

آرتان سانکی کۆچه‌ده بیر یاشیْدی ایله دانیْشیر، قوْلونو ترپه‌دیب الینی یاشار بی‌یه ساری توُتاراق دئدی: " آغا نه‌منه من بوُنو دۆنن آلمیْشام هله-هله اگنیمدن چیْخارتمارام. ".

" اوْغلان سن بیلیسن بوُنون اۆزه‌رینده نه یازیْب آخی ؟ "

آرتان سانکی شۆشه‌کی سالیر، گۆلۆمسه‌ییب دئدی " با نییه بیلمیرم یازیْب کی
" Im pregnant "
یانی من بتر شئی‌یم "

یاشار بی سسینی یۆکسلدیب دئدی :

" اوْغلان سارساقلاما، دئدیم گئت دگیش، دئ باش اۆسته؛ قوُرتار "

" یو آآآآ من ائوه دا گئده بیلمه‌رم نه‌نه‌م ائوده دگیل گئتسم‌ده قاپی‌دا قالارام. هله بئش-اوْن گۆن گرک بوُنون پوْزوُنو وئرم بااا "

" آرتان اوْنو چیْخارت دئدیم " دئیه یاشار بی سسینی بیراز داها یۆکسلتدی، ایندی‌یه‌دک هئچ بیریمیز اوْنو بئله قیْزقیْن گؤرمه‌میشدیک.
آرتان اؤزۆنۆ لاپ سایمامازلیْغا ووُروب دئدی " اوْلماز دگیشمه‌رم، ایلک دئیین نه یازیْب من‌ده باخیْم دا منه یاراشماسا دگیشه‌رم "
یاشار بی نه قدر چوْخ دئدی آنلامی پیس‌دی، آرتان دا بیر اوْ قدر دئدی " سیز آنلامین دئمه‌یینجه اوْلماز "
یاشار بی اۆزۆنۆ بیزلره ساری توُتوب سؤزه باشلادی :

" منیم بالالاریم ایلک گرک بیز اؤز اؤلکه‌میزده‌کی اۆرۆنلردن یارارلاناق. یوْخ کی یابانجی بیر اؤلکه‌نین اۆرۆنۆن آلماق ایسته‌ییریک‌سه اوْنون اۆزه‌رینده اوْلان یازیْ‌نین آنلامیْنی بیلمه‌لییک. من هئچ زامان بیر اؤیرنجینی سیْندیرماق ایسته‌مه‌میشدیم آنجاق بوُگۆن آرتان بوُنا نه‌دن اوْلدو. گؤردۆگۆنۆز بوُ کؤینه‌گین اؤنۆ ایله آرخاسیْندا " من بوْیلویام " یازیلیب، بللی اوْلور بوُ بیر بوْیلو قادیْن کؤینه‌گی دیر چئوره‌سینده‌کی آداملاری اوُیارماق اۆچۆن... "

یاشار بی دانیْشا-دانیْشا بیر جیْریلتی سسی قوُلاغیْمزا دگیب، گؤزلریمیزی سس گلن یئره ساری چکدی. آرتان باشیْنی آشاغی‌یا تیکیب اۆزۆندن آخان گؤز یاشلاریْنی الینده اوْلان پارچالانمیْش پارچا، پارچالاریْنا آخیْتدیرماقدایدی.