اؤز آنا دیلیم و اؤز جینسیمه بورجوم و ماراغیم، منی بو ساحه‌ده یازماغا یؤنلردیردی...

۱۳۴۱- جی ایلده تبریزین "چوست‌دوزلار" محله‌سینده پاییزین یاغیشلی بیر گونونده؛ دونیایا گؤز آچدیم. عائله‌نین حیاتدا اولان ایکینجی اوشاغی‌یدیم. آتام بعضی ندنلره گؤره تبریزده قالا بیلمه‌ییب سالماسا و سونرا دا ۱۳۴۴ -ده مرنده کؤچوب.

فارسجا یازیب، اوخوماغی اورتا مکتبده کامل اؤیرنیب، او واختدان یازماغا باشلادیم. کیچیک ادبی متنلر و یازیلار یازیردیم. تاسفله بو یازیلار انقلاب سونرا ائومیزین آختاریشلاریندا الیمدن چیخدی. بئله‌لیکله منیم ده یازماق هوسیم کورلاندی. بعضی سورونلارا گؤره، چوخ تاسفله اونیورسته‌ده اوخویا بیلمه‌دیم. آما ائوده هئچ زامان اوخوماقدان غافل اولمادیم. تورکجه اوخویوب، یازماغی ؛ ۱۳۶۳ - ده ائولنن‌دن سونرا حیات یولداشیمین تشویقیله باشلامیشام. آنجاق جیدی تورکجه یازماغیم ۱۳۹۰-دن ائل‌بیلیمی موسسه‌سینده اولان اوستادلارین ،اؤزلیکله سایین اوستاد صرافی جنابلاری‌نین ،لطفویله باشلاییب.

فولکویازیلار و رحمتلیک آنامدان ائشیتدیگیم ،بیر چوخ ناغیلار، ائل‌بیلیمی بولتنینده چاپ اولوب. اؤز آنا دیلیم و اؤز جینسیمه بورجوم و ماراغیم، منی بو ساحه‌ده یازماغا یؤنلردیردی.

فریبا خانیم وفی‌نین "حتی وقتی می‌خندیم" ‌ و همچنین اوریانا فالاچی‌نین،"نامه به کودکی که هرگز زاده نشد" کیتابلاری آذربایجان تورکجه‌سینه ترجمه‌‌م، ایشیق اوزو گؤروب.

ایران، دونیا و آذربایجانین مشهور قادینلارینین حیاتیندان آذربایجان تورکجه‌سینه ترجمه‌لریم چاپا حاضیردی. بونو بیلیرم یولون باشیندایام اؤیرنمگه چوخ چالیشمالیام. اومورام عؤمور قالسا، گؤزل ترجمه‌لر ادبیات دونیاسینا تقدیم ائده‌بیلم.
ائو قادینیام، ایکی اولادیم وار.

گؤزل مرند شهرینده مهربان حیات یولداشیملاَ یاشاییرام.