دیلی قوتسال بیر موستوییه قالدیراراق سیاسی رومانتیکا دایاغینا چئویرمه‌مه‌لییک. بو سویچولوغا گتیریب چیخارا بیلر. فارس دیلی رومانتیک قونومدا [جایگاهدا] اوتوردوغو اوچون ممالیک محروسه‌ده‌کی باشقا دیل‌لره آلچاق گؤزله باخیر. بیز بو تجروبه‌نی ترس یؤنده تکرار ائتمه‌مه‌لیییک.

بو اویارینی اونوتماماق شرطیله، فلسفی بیر مستویده دیلین أؤنمی اینسانلیغین گئرچکلشمه‌سینده‌دیر. اینسان دانیشان حئیوان‌دیر. بیز سؤزلرسیز دوشونورکن بیله، دیلین آغیر چکیسیندن یاخا قورتارا بیلمه‌ریک.

بونو دقیق آنلاماق اوچون کیچیک بیر حاشیه لازیم‌دیر. دیل و دوشونجه ایلگیسینده بعضن گؤزدن یایینان مسئله دیلین سئمانتیک ماهیتی‌دیر. بعضی‌لری‌نین نظرینجه دیل سمیولوگییانین [ایشاره‌شوناسلیغین] شاخه‌لریندن‌دیر. فئردینان دو سؤسور بئله دوشونوردو. همین یاناشما طرزیندن بئله چیخیر کی، هانسیسا دوشونجه‌نی ایفاده ائتمه‌یه دیلدن باشقا یول‌لار دا وار. لاکین ائله‌لری ده وار کی، دیل دیشیندا مؤوجود ایشاره‌لر سیستئمی‌نین وارلیغینا شوبهه ایله باخیر. بئله بیر باخیش دییشیمی‌نین نتیجه‌سی نه‌دن عیبارت‌دیر؟

سیمیولوگییا دیلین بیر بؤلومو کیمی نظره آلیندیقدا، دوروم دییشیر. بئله کی، دوشونجه تام دیلدن آسیلی قالیر. رولان بارت همین باخیشین گؤرکملی نوماینده‌سی‌دیر. او، سیمیولوگییانی دیلین بیر بؤلومو سانیر. بو گئرچک‌دیر کی، نسنه‌لر، ایماژلار و آنلاشیلماز سس‌لر نه‌یه‌سه دلالت ائده بیلرلر. حتتا داورانیش‌لار و باخیش طرزیندن عیبارت بدن دیلی واردیر. لاکین بوتون بو گؤسترگه‌لر [دلالت‌لر] دیلدن باغیمسیز شکیلده گئرچکلشمیر. هر بیر سیمیولوژی سیستئمین اؤزونه مخصوص لینگویستیک ترکیبی واردیر. باشقا سؤزله، دیل یالنیز سؤزلردن عیبارت دئییل. علاقه قورا بیله‌جک هر ایشاره، یول‌لارین کسیشدیی یئرده یانیب سؤنن ایشیق‌‌لار بیله، دیلین آیرینتی‌لاریندان ساییلمالی‌دیر.

رولان بارت "ارتیباط یالنیز کلام آراجیلیغی ایله گئرچکلشیر" کیمی جومله‌نی ایدئولوژیک وورغو آدلاندیریر. چونکی دیل سؤزلرین داریسقال اورتامینا سیغیشمیر. دیل چئوره‌میزده‌کی هر بیر نشانه‌/ایشاره‌ده اؤزونو گؤستریر. یاپون یاخشی اؤرنک‌دیر. «بو اؤلکه‌ده ایشاره‌لرین ایمپئراتورلوغو اولدوقجا گئنیش‌دیر. بونون اوچون ایشاره‌لر سؤزلری ائله اؤتوب کئچیرلر کی، دیلین لیللنمه‌سینه باخمایاراق، گؤزقاماشدیرجی زنگینلیک، حرکت‌لیلیک و اینجه‌لیک قازنیرلار. چونکو اوردا گؤوده‌نین قاباریق حضورو واردیر. گؤوده‌لر هئچ بیر هیستیرییه قاپیلمادان حرکته کئچیرلر؛ هئچ بیر اؤزونه‌وورغونلوغا ایومادان اؤزلرینی گؤستریرلر. دئمه‌لی ایله‌تیشیم یالنیز سسله گئرچکلشمیر. گؤوده‌نین بوتونلویو (گؤزلر، گولوش‌لر، ساچین بیرجه توکو، حرکت‌لر، پالتارلار) بیزیمله دانیشماغا باشلاییرلار.»