اینجه‌صنعت، طبیعت و ایدمان وورغونو اولان سعید، یئتمیش یاشیندایکن هله شهرین مکانیزمی و آددا! مدرنلشمه‌سی ایله باریشا بیلمه‌ییب.

ایللرله تورکمن‌صحرا، کویر و لُرستان‌ ماحال‌لاریندا داغدا، مئشه‌ده تک یاشاییب، رساملیق-عکاسلیق ائتمیشدیر.

دئییردی: -موزیسین اوغلوم، کئچن ایل بیر اداری سند اوچون «کارت‌ملی» آلماغا منی مجبور ائله‌دی!

گنجلیینده بیر دوستویلا قیزیل‌اوزن چایینین اوباشیندان دوشوب خزره قدر بیر آزین پیادا، بیر آزین قاییق‌لا و بیر سیرا یئرلرین اوزه اوزه باشا چاتدیرمیشدیر.

آتاسی و (سربست شعریمیزین آتاسی) حبیب ساهرین بوتون اشیالاری و ال‌یازمالارین آذربایجان ال‌یازمالار فوندونا هدیه ائدیبلر و اوردا بیر اؤزل بؤلمه‌ده ساخلانیلیر...

بو گؤروشدن ذهنیمی قاتان ایکی مسئله‌یه توخونماق ایستیرم.

۱- آناسی بئش ایل بوندان اؤنجه ۹۹ یاشیندا تهراندا حیاتینی دَییشَرکن، چاغداش شعریمیزین آتاسی‌نین حیات‌یولداشینی تورپاغا تابشیرماغا بیر نفر ده تاپیلماییب و سعیدله اوغلو ایکی نفرلیک تشییع ائدیب و جنازه‌نی گؤتورمک اوچون کارگر توتماغا مجبور اولوبلار!!!
(گویا، فرقه‌نین ملی مارشینی یازان میرمهدی اعتمادین تورپاغا تابشیرماسیندا دا دؤرد نفر آدام وار ایمیش.)

۲- حبیب ساهر اؤلندن بو گونه قدر، یعنی تقریبا ۳۵ ایلین ایچینده اونون شاگیردلرندن، دوستلاریندان، تانیشلاریندان و... بیر نفر بیله تاپیلماییب ساهرین بوتون اثرلرینی بیر یئره توپلاییب نشر ائتسین.
هر نه وارسا اؤزو دیرییکن نشر ائدییی‌دیر.

اؤلمه‌میشدن اؤنجه، (یعنی ۸۴ یاشیندا اؤزو ایسته‌یَرکن اؤلمه‌میشدن اؤنجه) بیر چوخ کیتابلارینی نشر ائدیب و قالانلارینین اوزوندن اون نسخه کپی توتدوروب، اون نفر دوستو، شاگیردی و امین بیلدییی آداملارا تابشیریب و سونرا ۲۴ آذرده، اؤلوم گونونو ده سئچیب، اؤزونو آسارکن قورتاریر.

۱۳۶۴-جو ایلین آذریندن بو گونه قدر، هله ده امین بیلدیگی آداملار و حتی اولادلاری و ادبیات آراشدیریجی‌لاری، چاغداش شعریمیزین آتاسی‌نین چاپ اولمامیش اثرلرینی نشر ائتدیرمه‌ییب‌لر.

تکجه اؤلوموندن ۲۰ ایل سونرا باجاریقلی شاعیر و یازیچی رسول یونان جنابلاری و کؤمکچیسی س.‌ موغانلی، ۴۵۰ صفحه‌لیک، ساهرین اؤزو چاپ ائتدیی کیتابلاردان و مطبوعاندا یاییلان اثرلریندن سئچیلمیش شعرلر توپلوسونو «یانان یاشیل» آدییلا افکار انتشاراتی‌ طرفیندن نشر ائتمیشدیر.

(سونرالار همن جمع، سهندین بوتون اثرلرینی «قارداش آندی» آدییلا همن انتشاراتدا نشر ائتدیریبلر).

بیر نئچه ایل سونرا تبریزده سایین بهروز ایمانی، «سورگون» آدیندا تقریبا ۲۰۰ صفحه‌لیک سئچیلمیش شعرلرینی (یئنه قدیمکی کیتابلاریندان) نشر ائدیب.

و‌ نهایت ۱۳۹۴-جو ایلده دوکتور حسن جعفرزاده و سعید موغانلی ساهرین حئکایه‌لریندن بیر سیرالارینی الده ائدیب، «تالانچیلار» (اصلی آدی «قیز سسی، قیزیل سسی، قازان سسی») آدییلا و هابئله «آرزی قمبر» دستانینی تهراندا نخبگان انتشاراتی‌ و یاشماق کیتابلاری طرفیندن (باکی نشرینین اوزوندن) نشر ائتمیشلر.

گویا قالان اثرلرینی الده ائده بیلمه‌میشلر!

دونن ساهرین ال‌یازمالارینا باخیردیم.

تقریبا ایکی‌مین ۲۰۰۰ صفحه‌یه یاخین اثرلریندن کپی توتولموشدو و هلم هلم توز یئمه‌یه محکوم‌ نسنه کیمی برک-برک ساخلانیلیر...
حتی قرآن-ین تورکجه ترجمه‌سی بیله...

بو آذربایجان چاغداش شعری‌نین آتاسی‌دیر #حبیب_ساهر

بو دا بهشت‌زهرادا مزاری‌دیر!...

شکیل‌لری ورقله‌یین!

بعدالتحریر:

* بو بویدا آذربایجاندا و بو بویدا مدعی‌لرین ایچینده بیر نفر فدایی آراشدیریجی و بیر نفر سرمایه قویان(اسپانسر) تاپیلماییب، ۳۵ ایلدن سونرا سربست شعریمیزین آتاسی‌نین بوتون اثرلرینی نشر ائتدیرسینلر!

*گؤره‌سن ساهرین امین اولدوغو و اثرلرینین کپی‌لرینی اونلارا، سونرالار! نشر ائتمک اوچون تابشیردیغی او اون نفر دوستو و شاگیردی کیملردیلر؟!

*حبیب ساهر بیر نئچه اثری‌نین یاییلماسییلا سربست شعریمیزین آتاسی ساییلیب.

بوتون شعرلری، حئکایه‌لری، رومانلاری، تنقیدلری، یادداشت‌لاری، ترجمه‌لری و یازیلاری چاپ اولسایمیش، معاصر شعرین و ادبیاتین بؤیوک باباسی ساییلارمیش ظنیمجه!...

*وورغولاماسی یئرینه دوشردی کی، حبیب ساهرین حیاتی و اثرلری باره‌ده بیر سیرا نشریه‌لریمیز او‌جمله‌دن وارلیق، آذری، ساهر، پیک‌آذر و... چوخ دَیرلی خصوصی بوراخیلیش و اؤزل سایی نشر ائدیبلر.

#اثرلر:

اؤلوموندن سونرا نشر اولان اثرلری:

تالانچی‌لار - سئچیلمیش حئکایه‌لر/ نخبگان انتشاراتی، تهران ۱۴۹

(قیز سسی، قیزیل سسی، قازان سسی)

*آرزی ایله قنبر- فولکولور ناغیل، نخبگان انتشاراتی، ۱۳۹۴، تهران

*یانان یاشیل - سئچیلمیش شعرلر توپلوسو، رسول یونان/ افکار انتشاراتی، تهران، ۴۵۰ صفحه، ۱۳۸۷

*سورگون- شعر توپلوسو/ بهروز ایمانی/ تبریز