کولت آذ. گونئی‌لی یازار ایشیق سؤنمزین یازیسینی تقدیم ائدیر:

اجتماعی مسئله لر اوزره دوشونجه و فیکیر یئریدر و مختلیف انسانلار ایله ایلگی و علاقه-ده اولارکن، انسان هر هانکی بیر مسئله نی بوتون یؤن و جهتلری ایله گؤره بیلمدیگی، یوخسا گؤرمک شانسینا اولمادیغی اوچون، خطا ائده بیلر. بو باخیمدان انسانا عرب دیلینده "جایز الخطا" دئیه بیر صفت وئریلمیش و وئریلر. دئمک، خطا ائتدیکده، هر هانکی بیر مسئله و شخص اوزره توپلوم و اجتماعا یانلیش بیلگی و نظر وئردیکده، خطامیزی دا اصلاح ائتمک و بو مسئله نی اجتماعیته توضیح وئرمک جسارتینه مالیک اولمامیز، ایستر اجتماعیتین مدنیلشمه سینه و گلیشمه سینه، ایسترسه ده اؤزوموزون توپلوم و اجتماعدا اؤزوموزه یئر آچمامیزا و محبوبیت قازانمامیزا یول آچابیله ر دئیه دوشونمه لیییک. بو باخیمدان خطاسیز قول اولماز، دئییلمیش. دئمک، خطالاریمیزی توپلوم و اجتماعا توضیح وئرمکله اؤز صادق و صداقت اهلی اولدوغوموزو دا سرگیلمیش و اورتایا قویموش اولاریق. ترس دورومدا مسئله نی ایضاح ائتمدن خطالارین اوستوندن آتلاماق شخصین اؤزونو خطاکار دئیه سورقو و سؤآل آلتینا آپاراراق اجتماعیتده شخصه قارشین اعتمادسیزلیق یارادارکن، شخصن اؤزونه ده ساغالماز ضربه لر ووراراق اونو اجتماعی مسئله لردن بئزدیرمیش اولار. بو دا آذربایجان اجتماعیتی اوچون اصلا آرزو ائدیلمزدیر.