گئچن 2 آی بوْیوندا گۆنئی آزربایجانین میللی حرکاتیندا باش توتان یاراماز دئدی ـ قوْدو لارا دایاناراق، بیر چوْخ قوْنولار حاقدا بئینیم ده قیغیلجیم لار یارانیردیرسا، یازماغا اَلیم گلمیردی.

3 گۆن اؤنجه دن بیر پارا شخصی ایشلر و ائله جه رحمتلیک آشیق قاففارین قیرخ تؤره نینده اشتراک اۆچۆن، دۆنن ۱۳۹۷/۱۱/۲۶ بوْش واخت تاپیب و یوْلداشلارلا بیرلیکده آزربایجانین قارتال تیراختور فوتبال کامانداسی ایله، تهرانین استقلال کلوبونون فوتبال کامانداسی یاریشینی یاخیندان ایزله یه بیلدیک.

یوْل اوزونو، تۆرکلرین بۆتۆن ایران دان آزربایجانا و تیراختورون چئشیدلی و اؤزللیک له گنج یاشلی آزارکئشلرینین قوردلار وادیسینه سئل کیمی آخینلاری، گئرچک دن غرور دویوجو بیر گؤرۆنتۆ یارادمیشدیر.

نئجه دییه رلر: « گله سن، گؤره سن ».

میللی یوْلوموز اوغروندا ۱۳۷۰ینجی ایلین اوْرتالاریندان بری، اوْ چاغلار حسرتله دیلکلریمیزین بو گۆجله اوغورا یؤنلمه سی و گئرچک دۆنیادا، اَن آزی 80 مین آغیزدان: سن چاغیرسان گلرم من، سن یاشا آزربایجان و ... شعارلارین سسلنمه سی نی گؤررکن، سئوینج یاشی اختیارسیز گؤزلریم دن یاناغیما سۆزۆلدۆکده، شیرین بیر دویغو ایله، دوْداغیمین کۆنجۆندن ساووشاراق، یئره تؤکۆلمه سینه ایزین وئرمه دیم و دیلیم له تامسیندیم. دئمک اوْلار؛ منه اوْ داملا ـ لار، اَن دادلی دوزلو، ائله جه شیرین گؤز یاشلاریمیدیلار .

شۆکۆرلر اوْلسون ماچین سوْنوندا، بۆتۆن تۆرک ائللرینینین تمثیل چی سی تیراختورون اوغورو، اوْ سئوینجیمیزی قات ـ قات آرتیردی.

دئمک؛ حاق یوْلوموزدا، میللی ـ معنوی مجادله لریمیزین 30 ایله یاخیندان بری سپدیگیمیز توْخوملاری، ایندی اوغورلا بار وئریر.

بؤیۆک ظفر اومودویلا، یاشاسین آزربایجان .

اردبیل ـ ۱۳۹۷/۱۱/۲۷