چؤرک صفینده همه‌شه اوول نؤوبه اولماغا جان آتان قادینلار، ایندی آخیر نؤوبه‌نی سئویرلر. چؤرکخانادان هامی‌نین داغیلیب گئتمه‌سینی گؤزله‌ییرلر. سونرا اوزلرینی اؤرتوب ایره‌لی گئدیرلر. چؤرکچی‌یه «قارداش منه نئچه چؤرک وئر، ایشاللا پولوم اولاندا گتیریب وئررم» دئییرلر. هله ساغ اولسونلار چؤرکچیلرکی پولسوز قادینلاری گؤزله‌ین اوشاقلاری دوشونوب، اونلاری الی‌بوش یولا سالمیرلار.

گونلر چوخ چتین کئچیر.

یاشادیغیم بو کیچیک شهرده هرگون و هرگون بیر نفر جانینا قصد ائدن آدامین خبرینی ائشیدیرم. دونن ده ائوه چؤرکسیز قاییدان بیر خانیمین اؤزونو آسیب اؤلدورمه‌سینی ائشیتدیم. اوشاغینا گئت کوچه‌ده اوینا، من سنه کوف آسیرام دئمیشدی.

تقویمین هئچ گونونه بایرام و ایلین آخیر چرشنبه‌سی قدر محبتیم یوخدور. اوشاقلیق چاغلاریمدان یاز بایرامینی سئورم. زینداندا اولدوغوم ایکی ایلدن باشقا، آخیر چرشنبه گئجه‌سینی هئچ یئرده قالمامیشام و قالمارام. بیزیم یئرلرده بئله بیر اینانیش وارکی، بایرام گونو سؤیود آغاجلاری اییلیب باشلارینی یئره قویوب، بوداقلاری‌نین اوجو ایله سو ایچیرلر. سؤیودلر یئره باش قویان زامان، هر آرزی ائدرسنسه، همن موراد اولاجاق.

بو ایل ائویمیزین اطرافیندان اولان سؤیودلری ده کسیب آپاردیلار و آرزی آغاجیمیزا داش آتدیلار. من یاز بایرامینی اورکدن سئورم، آما بو گلن باهارین ایستی باخیشی‌نین آلتیندا، سانکی قار نَفَسی، آجلیق نَفَسی، اؤلوم نَفَسی، دار نَفَسی وار.
گونلر چوخ چتین کئچیر.