ایراندا قانون ماده لریمیزین چوخوندا، رسمی اولاراق قادینلار حاقلاری آیاق آلتینا آلینیب. قادینلار رسما ایکینجی درجه لی بیر اینسان کیمی تانینیب ایران قانونلاریندا. بو قانونلار سایه سینده ارککلرایله مقایسه ده قادینلار هر زامان ضرر گوروبلر.

بو حاقسیزلیقلار هر زامان قادینلاری چوخ حیاتی موقعیتلرده، حاقلاریندان محروم بوراخیب. او جمله دن، بوشانماق حاقی، یالنیز ارککلره وئریلمه سی، طلاقدان سونرا اولادلارین آتا طرفینه تاپشیریلماسی، ارث پاییندا ارکک قارداشیلا مقایسه ده قیزلارین یاری حاق آلماسیدیر.

بو حاقسیزلیقلار او قدر آجیماسیز و بویوکدور کی قادین بوشاندیغی زامان اوشاقلار آتایا تاپشیریلر، حتی بیر قادینین حیات یولداشی وفات ائدن صورتده اوشاغین حضانتی، اون درجده قالان ارکک اولان یاخینلارا و یالنیز اولارین اولمادیغی صورتده آنایا تاپشیریلیر.

یعنی بیزیم قانون قادینلاری نه قدر ده یرسیز بیر شخص گورور کی بو حاقسیزلیقلاری هر زامان قادینلارا اعمال ائدیر؟

بیزیم قانون قادینا آتاسیندان قالان ارثیارثیپمپ وئرنده قادینی یاریم اولان بیر اینسان اولاراق گورور.
اولادین حضانت حقی وئریلنده قادینین اوزو دونیایا گتیریب بویودوب تربیت ائتدیگی اوشاغی حتی، ساخلیا بیلمدیگین دوشونوب، اوشاغی ارکک اولان طرفه تاپشیرلار.

اما، قانونی مجازاتلاردا قادینلاردا ارککلر سویه سینده مجازات اولورلار. اما اگر بیر ارکک بیر قادینی اولدورورسه سانکی یاریم اینسان اولدوروب، و اگر بیر قادین بیر ارککی اولدورورسه سانکی ایکی اینسان اولدورولموش کیمی آلینیر بو مملکتده.

تاسفله او یئرلرده کی منفعت سوز قونوسودو، قانوندا قادینلارا یاری اولان بیر اینسان گوزوایله باخیرلار.
ایران قادینلاری هر زامان بو حاقسیزلیقلارا معروض قالیبلار
اما بو حاقسیزلیقلارین کناریندا بیزیم توپراقدا،آذربایجان توپراقینین قادینلاری بیر باشقا حاقسیزلیقلار ایله ده قارشی قارشیا ساواشیب مجادله دیرلر.

آزربایجان قادینلاری بالالارین مین بیر تورلو زحمتینن دونیایا گتیریب بویودورلر، اونلارا اوز آنا دیل ایله گئجه لر صبحه کیمین لایلا دییرلر، اوز انا دیلیله تربیت ائدیرلر. اما اوزامان کی اوشاقلارین مدرسیه گئدیب ائیتیم آلماق زامانی یئتیشیر، قانون چارچوبوندا اولان بیر حاقسیزلیق و زوراکیلیقلا اوزلشیرلر بیزیم بالالاریمیز. اوشاقلاریمیز باشارمادیغی بیگانه بیر دیلده، ائیتیم آلماق مجبوریتینده قالیرلار.
بیزیم اولکه ده فارس شهرلرینده کی آنالار راحاتجا کتابدا یازیلان درسلری اوشاخلارینا اورگدیب اونلاری راحت خیالینان مکتبه گوندریلر چون کی کتابلاردا یازیلان درسلر اونلارین اوز باشاردیغی آنا دیللرینده دیر و او درسلری اوشاخلارینا اورگتمک اوچون هئچ زورلوق چکمیرلر.

اما بیزیم توپراقدا، آذربایجاندا آنالار بو درسلری چوخ چتینلیکلریله اوشاقلارینا اورگدیر و اوشاقلار بو بیگانه دیلده درسلری اورگشماخ اوچون چوخ چتینلیک لره معروض قالیرلار.

اگر علمی اوزدن بو مساله نی بررسی ائلسک، بونو بیلریک کی بیر اوشاق دونیانین هر هانسی اولکه سینده اولور اولسون، اوز آنا دیلی ایله علم اورگشرسه راحت و اصولی اورگشر تا باشارمادیغی بیگانه بیر دیل ایله.
و اگر وجدان محکمه سینده بو مساله یارقیلانیرسا، گورریک، بیزیم اوشاقلارا، اوزلیکله قادینلارا اولان بو حاقسیزلیق دونیانین هئچ ویجدانینا سیغیشمایان بیر قانونسوزلوقدور. قانون آدیلا میلی دیل و بیرلیک بهانه سیله بیزیم اوشاقلارا ظلم و حاقسیزلیق ائدیلیر بو مملکت ده.
بو حاقسیزلیقلارا تاریخ بویو و نسل لر بویو معروض قالمیش بیر خالق، اگر سوسارسا، ایتیب باتار تاریخ اوزرینده. بیزیم توپلومون قادینلاری، بیز قادینلار باغیرا باغیرا طبیعی اولان حاقلاریمیزی ایستمگه قالخماساق و‌ بوحاقسیزلیغین قاباغیندا دایانماساق بو حاقسیزلیقلار نسللر بویو بوجور ادامه تاپاجاق و زمان سورجینده بیزی بیر بیگانه نین کوله سینه چئویره جک. بیزیده ، بیزیم بویا باشا گتیردیگیمیز اوشاقلاریمیزیدا.

دونیا قادین گونو قوتلو اولسون بوتون آزربایجان قادینلارینا، دونیا قادین گونو قوتلو اولسون بوتون دنیا قادینلارینا.