سؤزسوز قادین آدی گلدیکده ایلک گؤزوموزون اؤنونده آنالاریمیز دورور. گرچکدن آنالاری اؤومک٭ اۆچون سؤزجوکلر آز گلرلر، آنا سؤزلره سیغمایان بیر وارلیق.

۹ آی بویونجا ایشله‌یه-ایشله‌یه بیزلری جان شیره‌سیندن بسله‌ین، بۆتون آجیلارا، چتینلیک لره دؤزن، آرا سیرا اؤزونو ائشیتمه‌مزلیگه ووران، و... بونلار ساده‌جه بیر قادینین اؤزل‌لیگی دیر، سؤزلره سیغمایان قادینلار.
دئییرلر تاریخ هر کسه بیر یئردن باشلار، منجه تاریخ قادینین اللریندن باشلاییر، کؤرپه اوشاغین یاناغینا سئوگیله توخونان آنادان، عشق‌له دولو ایلک گؤروشده تیترک اللرله سئوگیلیسی‌نین الینی سیخان سئودالی دان، هابئله بیر آتانین سئوینجلی اللریله ایلک گۆن دنیایا گؤز آچمیش قیزینین اللرینی توتماقدان. تاریخی قادینلار باشلادیر.
قادینلار بئله دیرلر، ایسته‌سه‌لر دنیانی دگیشرلر.

۸ مارت گۆنونو توتاجاقلاییب٭ یاشام بویو ائولادلاری اۆچون دیلکلریندن کئچن آنالارا؛ هر آن سئوگیلی لری‌نین، حیات یولداشلاری‌نین آرخاسیندا دوران قادینلارا؛ آتالارینا، قارداشلارینا یولداش اولان قیزلارا قوتلاییرام.