سورقو ایران و توران آدلاری کئچمیشده افسانه حالیندا اولماسینا باخمایاراق ندن "توران" آدی افسانه اولاراق کئچمیشده قالارکن "ایران" آدی بیر سیاسی و انضباطی دؤلت ساحه سینه یوکسلمیش آد اولموش؟

جاواب: بیلیندیگی کیمی سلطان محمود غزنوی، تورک سلطانی حاکیمیته گلمک ایله درباریندا بیر چوخ شاعیرلر مداحلیغا توپلانمیش. سلطان محمود غزنوی و ابولقاسم فردوسی زامانی نین ایران آنلاییشی غزنه یوخسا غزنی اطرافی دئیه بیر کیچیک بؤلگه آنلاییشی ساییلارمیش. سلطان محمود غزنوی بو بؤلگه ده گوج اولماغا باشلاراق هندوستانا، سیستانا قوشون چکمک ایله بو آد سیاسیلشمیش. بئله لیکله ایران آنلاییشی تورک شاهلاری واسیطه سی ایله شرقدن غربه گتیریلمیش بیر دؤلتچیلیک آدی اولماسینا و زامان زامان تورک شاهلاری نین مهمیزی آلتینا کئچمیش مملکتلر "ممالیکی محروسه"، یوخسا "ممالیکی محروسه ایران" آدلانماقلارینا باخمایاراق غرب دؤلتلری بو ممالیکی محروسه نی گئنه ده ایران تانیماق ایستمه میشلر. یالنیز آلماندا نازیستلر ایش اوسته گلدیکدن سونرا آلمان نازیستلری نین سفاریشلرینه اساسا برلین شهرینده ایران سفیری ابولقاسم مجد ۱۹۳۵ اینجی ایل (۰۳.۱۰.۱۳۱۳ ه. ش. تاریخینده) ایران ممالیکی محروسه سی خاریجی ایشلر ناظرلیگینه (وزارت خارجه ایران) بیر مکتوب یازاراق بو ممالیکی محروسه یه حاکیم اولموش دؤلتین آدی نین ایران آدلانماسینا داییر بیر مکتوب یازمیش. بو مکتوب او زامانین خاریجی ایشلر ناظری اولموش سیدباقر کاظمی تفریشی واسیطه سی ایله غرب دؤلتلری تمثیلچیلرینه و ائله جه ده خاریجده کی تمثیلچیلره مکتوب یازیلاراق "ایران" آدینی رسمی دؤلت آدی ائتمگه یول آچمیشلار.