‍ عزیز دوستلار بو گونلر کی ایل بایرامینا یاخینلاشیریق یاخشی‌سی بودور کی رسم‌لریمیزدن و عنعنه‌لریمیزدن دانیشاق.

ایندی بیزیم مملکتیمیزده بایرام گلنده سوفرادا " 7سین" دوزورلر و دئییرلر کی "س" حرفیله باشلانان زادلاردان یئددی سین گرک دوزه‌لر.
بو باره‌ده بیر آز ایضاح وئرمک ایسته‌ییردیم.

دئمه‌لییم کی بو عادت عنعنه اصلن فارسجا الفباسیندا اولان "س" حرفینه ربطی اولان بیر شئی دئییل و بو سؤز بیر یانلیش و اشتباه سؤزدور .
و بو ایشین ایناملاری بئله‌یدی کی:

تورک ائللرینده چوخ قدیم و اسگی زامانلاردان ، او زاماندان کی میترائیزم آیین‌لری رواج واریدی (بئش مین ایل بوندان اؤنجه) 7 سایی‌سی(عدد) مقدس ساییلیردی و تورک ائللری 7 نی مقدّس بیلیردیلر اونا گؤره‌ده یئنی ایل باشلاناندا أللرینده اولان نعمت‌لرین 7 سین برکت و روزی‌نین چوخالماسی نییتی ایله سوفرایا قویاردیلار و بؤیوکلر کیچیک‌لره دئیردیلر کی:

"نعمت لرین یئددی (7) سین سوفرایا قویون "

و بو یئددی (7) سین دئمک فارسجایا گئدیب و هفت سین آدلانیبدیر و یانلیشجاسینا ( اشتباها) 7 دنه "س" حرفیله باشلانان شئی‌لره تعبیر اولونوبدور.
بو 7 زاد کی سوفرایا قویولاردی هره‌سی بیر نعمت و برکتین سیمگه‌سیدی:

۱ - گؤی برکتی : سو

۲ - سو برکتی: بالیق

۳ - یئر برکتی: بوغدا قوورماسی

۴ - حئیوان برکتی: یومورتا

۵ - آغاج برکتی: آلما ، ایده

۶ - آل وئر برکتی: سکّه

۷ - گؤیرمک برکتی: سبزه