ادبیاتدا عینی سؤزو فرقلی معنالاردا ایشلتمک صنعتینه جیناس دئییلیر و آذربایجان آشیق شئعرینده، بیر میصراعنی عینی‌جه تکرار ائدیب باشقا معنالار یاراتماق صنعتینه «تام جیناس» دئییب نئچه-نئچه آنلام وئره‌بیلن شئعرلر یاراتمیشلار. گولگز خانیما عاشیق اولان آشیق عباس توفارقانلی‌نین بیر تام جیناس شئعرینی بیرلیکده اوخویوروق:

آتاسیندان، آناسیندان/ گولگز ایندی، گولگز ایندی.

آتاسیندان آناسیندان/ گول گز ایندی، گول گز ایندی.
بیرینجی بئیتده ایندی (ائندی)؛ آتابئلیندن و آنابطنیندن ائنیب دونیایا گلمک آنلامیندادیر و ایکینجی بئیتده گول گزمک؛ چیچک آختاریب آتا آنادان موشدولوق آلماق دئمکدیر.
سن منی آغلامادا گؤر/ سن منی آغلاما، دا گؤر
سن منی آغ لامادا گؤر/ گول، گز، ایندی، گول، گز، ایندی.

بو سون میصراع آغلاییشدان اوزاقلاشیب ساکیت و آغ گونلره چاتان اینسانا گوله-گوله دولانماغی تکلیف ائدیر.
یاری آغلی باده گؤردوم/ یاری، آغ لیباده گؤردوم
یاری عاغلی باده گؤردوم/ گولگز ایندی، گولگز ایندی.

آغ و آغو زهردیر و ایلک میصراع یاریسی زهرلی باده‌دن دانیشیر. هر یاندان خبرسیز و آغ لبّاده گئیمیش آغلیسیز یار اونو ایچرسه گولگزین ناله ائتمکدن باشقا یولو یوخدور. سون میصراعداکی ایندی فئعلی؛ اینمک و اینله‌مک یا همن ناله ائتمک آنلامیندادیر.

بیر ایشدن عباس دای آندی/ بیر ایشدن عباس دایاندی
بیر ایشدن عباس دا یاندی/ گولگزیندی، گولگزیندی.