خالام قیزینین اوشاق‌لیق‌دان سئودیی بیر اوغلان اولوب. کند یئرین‌ده ده سئوگی ایمکان‌سیز. کیم قویار سنی سئودیینله گؤروشمه‌یه؟ یالنیز توی مجلیسلرین‌ده بیر-بیریلرینی گؤرورلرمیش. هردن ده کندین یوللاری اونلاری قوووشدورورموش.

اوغلان خالام قیزینا ائلچی دوشمیی قتیلشدیریب. او واخت دا کندین ان گؤزل قیزی خالام قیزی‌دیر. یالان اولماسین، هر گون قاپیلارینی ائلچیلر کسدیریر. بیری گئدیر، بیری گلیر. آتا-آناسی دا گؤزل-گؤیچک قیزلارینی هر یول‌دان اؤت‌نه وئرمک ایستمیر، خئی‌لی گؤتور-قوی ائلییر، ائلچیلری الیبوش قایتاریرلارمیش.

ائله خالام قیزینین سئودیی اوغلانین عائله‌سی ده الیبوش قاییدانلاردانمیش. هردن توی مجلیسلرین‌ده عذاب دولو گؤزلری خالام قیزینین اوستوندیمیش اوغلانین. قیز دا جامااتین دیلینه دوشمه‌مک اوچون باخیشلارینی قاچیریرمیش، اما ساچینا سیغال چکه‌ن‌ده هردن-هردن گؤزوجو اوغلانا دقت یئتیریرمیش.

اوغلان چوخ دورمادی کندده. ائوده ده باش-بئینینی آپاردیلار کی، گئت، ایشله، اؤزونه گون-گوزران یارات. او گون‌دن اوغلان روسییایا گئت‌دی. کند یوللاری اونون آیاقلارین‌دان یئتیم قال‌دی. خالام قیزینین اونون گئتمیین‌دن خبری اولمادی بئله. ائوده‌ن چیخماغا قویموردولار. روسییانین آنجاق آدینی ائشیتمیش‌دی. بیلمیردی، بیزیم کن‌ده یاخین‌دی، یا اوزاق.

ایتلرین هوروشو ایله دولو گئجه‌لرین بیرین‌ده خالام قیزینین یاشادیغی ائوه باسقین اولور. اوندا آتاسی کندده یوخموش، تورکییه‌یه ایشله‌مه‌یه گئدیبمیش. قارانلیغین ایچین‌دن ایکی-اوچ یئکپر آدام چیخیب. سسه چیخان آناسینی دمیر سوپا ایله یئره ییخیبلار. یئره اوزانمیش آنانین گؤزونون قارشی‌سین‌داکی منزره: قیزینی دارتا-دارتا داروازایا طرف آپاریرلار… سونرا بولانیق گؤزلری هئچ نیی آییرد ائده بیلمه‌ییب. بیر آزدان سس قالیب آنجاق: قیزینین کؤمک اوچون دیل-آغیز ائلمیی.

خالام قیزینین قاچیریلدیغی گون سئودیی اوغلان کن‌ده گلیبمیش. خبری ائشیدیب اؤزون‌دن گئدیب. قاچیرانلار او بیری کنددنمیش. خالام قیزی دئییر کی، یول‌دا گئدن‌ده آغاجلاردان باشقا هئچ نه یادیم‌دا قالماییب. قیشقیرماق‌دان بوغازی توتولوبموش، آخیردا اونو سوسدوروبلار. گتیریلدیی یاد ائوه مئییت سیفتین‌ده گیریب.

آناسی آتاسینا خبر وئریب، آتا ایشینی بوراخیب گلیب، پولی‌سه گئدیبلر، قاچیران آدامی توت‌دورماق ایسته‌ییبلر. قاچیریلما ایسه کندین گوندمیمیش. هر آغیزدان بیر آواز گلیرمیش. بیری دئییرمیش، قیز پوزولوب، داها قاییت‌سا دا خئیری یوخ‌دور، او بیری دئییب کی، تالئیینه بویون ایمه‌لی‌دیر.

و بیر گون خالام قیزینین موباریزه‌سی سونا چاتیب. چیرپینماغینی، قیشقیر-باغیر سالماغینی بیر قیراغا قویوب. سئودیی اوغلانا وئرمه‌دیلر. او دا چیخیب روسییایا گئت‌دی. ایندی ده یقین کی، روس قیزلاری اونا هر شئیی اونوتدوروب. کند ده هر شئی‌دن خبردار.

خالام قیزی اول-اول اسبیلشدیی اوغلانا گئت-گئده آلیشماغا باشلاییب. سس-کوی یات-کوت اولوب، آرایا باریشیق گیریب. کن‌ده گئتدییم بیر گون گؤردوم کی، اونون آرتیق ایکی اوشاغی وار و اوزون‌ده گوللر آچیر. خوشبخت‌دی. بلکه ظاهره‌ن ائل‌دی، اؤزونو ائله گؤستریر. اما دقیق بیلیرم کی، یالان دئییل او خوشبخت‌لیک. نه بیلیرسینیز، بلکه ده سئودیی اوغلانلا بو جور اولمایاجاق‌دی.

قاچیریلمایا یاخشی باخمیریق. دوغرودور. اینسان سئومدیی بیری ایله نئجه یاشایار؟! دئییرلر، بوشانمالارین سایی بونا گؤره آرتیب. تانیمادیغین آداملا ائوله‌نمه‌یه گؤره. اما خالام قیزی خوشبخت‌دیر. باشقا قادینلار دا.

سئوگینین قاداغان اولوندوغو یئرلرده قادینلارین خوشبخت‌لیگی آنجاق بئله اولور.