تورکلرین آراسیندا آدلیم و افسانه‌وی قوماربازین آدی لئیلاج دیر. لئیلاج اصلینده آد دئییل بلکه زیرک و باجارلیقلی قوماربازلارا خالق طرفیندن وئریلن لقب اولاراق، آلیجی‌لارین آلیجی‌سی آنلامیندادیر.

بو لغتین ایلک بؤلومو «لئی» سؤزو اصلینده «آ» حرفی‌نین دوشومو ایله آلئی اولاراق آلیجی، شیکاری، آلای پوزان (صف سیندیران) آنلامیندادیر و بیر جوره آلیجی (شیکاری) قوشا دا لئی دئییلیرکی گؤیون لاپ اوجا یئریندن بیر آندا شیغییب کول ایچینده گیزلنن قوشلاری اوولایار، اونا گؤره زیرک، فیریلداق، آلیجی و فرصت طلب آداملارا دا شفاهی ادبیاتیمزدا لئی دئییلمیش و بئله بیر ایفاده ده واردیر: آمان آمان لئی‌دیلر مئشکینلی‌لر، باشماغیمی گئیدیلر مئشکینلی‌لر.

قدیم قوماری آشیقلا اوینارمیشلار. آشیق حیوانلارین دال قیچی‌نین توپوغوندا اولان بیر تیکه اویناق (مفصل) سوموکدور. آشیغین آلتی اوزو اولور، یاستی اوزلرینه جیک و بؤک، دیک اوزلرینه آلچی و تووخان و لاپ دیک اوزلرینه اومبا دئییرلر. داها دوغروسو اومبا دوشمک مومکون دئییلدیر. آرتیرمالییق کی قدیملر ائولرین تاوانیندا توستو چیخماق و ایشیق دوشمک اوچون بیر بالاجا باجا قویارمیشلار.

لئیلاج قومارخانانین اورتاسیندا اوتورب رقیبلره «جیکی سیزین، بؤکو سیزین، آلچی‌سی سیزین، تووخانی سیزین، اومباسی منیم» دئییب آشیغی باجادان داما آتارمیش، گئدیب گؤررمیشلر آشیق اومبا دوشوبدور. لئیلاج بو قدر مهارتله یئنه ده عؤمرونون آخیریندا سونگه چیخیر و بوتون توپلادیقلارینی اودوزور. قومار پیس اوزونو اونا گؤسترمیشدی.