ماکو تایمز اینستاگرام صفحه‌سینین پایلاشدیغی بیر استاتوسا گؤره و باشقا رئپورتاژلاردان گلن معلوماتا گؤره بسندگی فارسی طرحی ایلک تحصیلاتی کئچیرمک اوچون مکتب‌لره داخل اولان اؤیرنجی‌لره اعمال اولونور بو طرح تقریبی اولاراق بیر آی اؤنجه ایران ایسلام جمهورییتی‌نین ائییتیم اؤیرتیم باشقانیلیغی یؤنوندن اعلان ائدیلمیشدی، بو اصلی گؤز اؤنونه آلاراق کی ایران آدلانان اؤلکه‌نین نفوسونون اَن آزی یوزده یئتمیشی باشقا ائتنیک‌لر تشکیل ائدیرلر و باشقا ائتنیک‌لرین دیلی دوغال اولاراق رسمی دیلله فرقلی‌دیر، بیر آلتی یاشلی اوشاق عاییله‌سینین دیلیندن باشقا بیر دیل ائشیتمه‌دیینه گؤره تکجه اؤز آنا دیلینده دانیشماغی باجاریر و مین تور آرزو ‌ایله آلتی یاشین گؤزله‌یه‌‌رک کی ایلک تحصیلاتین باشلایاجاق و یئنی تجربه‌لر قازاناجاق و یئنی اینسانلارلا قارشی قارشیا گله‌جک، مکتبه آیاق قویور.

او اوزدن باشلانقیج اوچون بیر راسیسمی و فاشیستی طرحله اوز اوزه گلیرلر و او اوشاقلار کی فارسجا دانیشماغی یاخشیجاسینا باجارمیرلار مکتب گؤره‌ولی‌لری یؤنوندن ۱۵ گون فورصت وئریلیر تا عاییله‌سی او اوشاغا فارسجا دانیشماق صینیفی قوروب و فارسجا دانیشماغی اونا اؤیردسینلر.

بو قونونون چئشیدلی پیسیخولوق (روانشناسی) وگله‌جک‌ده اوشاقلارین اؤنلرینه گلن انگللردن گؤز یوماراق بو حالدا کی هئچ تور بوانگللردن گؤز یومماق مومکون دئییل، بیر اؤلکه کی اولوسلار آراسی آدلاناراق ایسلام آدین اؤزویله داشییر و قورآن‌ آیه‌لرینه گؤره اینسانلار چئشیدلی سویلاردا و بویالاردا و اؤزللیکله چئشیدلی دیللرده یارادیلمیش ساییلیرلار (حجرات/۱۳)، او اوزدن بیر ایسلامی اؤلکه‌دن کی قوراللاری قورآن آیه‌لری اساسیندا قورولوب بئله بیر چیرکین و فاشیستی قوراللار گؤزله‌نیلمه‌ییر بو اساسدا بئله بیر طرحین هئچ زامان اولوملو سونوجو اولمایاراق نئچه قات داها اولومسوز سونوجو اولاجاقدیر.

بو طرح و بونا اوخشار طرحلر و تبعیضلر مرکزیت‌له (رسمی دیل) حاشیه‌نین (غیر رسمی و ائتنیکلرین دیلی) آراسیندا بیر آیریلیق سالان سورون ساییلا بیلیر.

بئله‌لیکله بئله بیر طرحلرین عمل ساحه‌سینه گلمک‌لرینین هر نه‌قده‌ر تئز اؤنؤن آلماق ایسته‌‌نیلیر.