کندلر تورک دیلی و کولتورونون بئشیگی دیرلر. کندلردن دانیشدیقدا، تورکون داشدان، سودان و تورپاقدان یاراتدیغی ایلک اوتاقلاردان، اوجاقلاردان، و ائو تیکینتیلریندن، و ایلک تورک توپلوملاریندان دانیشیریق. کندلر فولکلور قایناغی، و کند دیلی تورک دیل بولاغینین دورو و آیدین آخان سو گؤزه‌سی دیر. تورک دیلی کندلرده یارانیب، دوغولور، و کندلرده بویا-باشا چاتیب، سونرا دونیانین هر بیر یئرینه سپه‌له‌نیب، اوچوب، کؤچور. آنجاق، بو یازیدا کندلرین نه قدر اؤنملی اولدوقوندان، و دوغال دیل سزیرگیسی ایله أرکین سؤزلرین یارانماسیندان دانیشماق ایسته‌میریک. بو یازیدا، کندلریمیزده یئنی تورک اوجاقلارینین یارانماسیندان دانیشاجاییق.
1395-جی گونش ایلینین یای سونایی گلدیکده، آی-گونون تامارزیلیغیندا، و سونایدا گونون سارایلیغیندا نیسگیللی آنلارین یاشانماسیندا، بیر کتاب یازان و کتاب ساتان دیله گلدی:
- آی جانیم! تلگرام گلندن کتابلاریمیز دا کتاب قفسه‌لرینده توتساقلانیبلار! هئچ کیسمه کیتاب اوخومایا ماراقلانمیر. یازیچیلاریمیز داها کتاب یازمیرلار. دیلیمیز تلگرامین شفاهی ادبیاتیندا داها ائیبجرله‌شیر، و مدنیتیمیز أرکینلیکدن دوشمکده دیر. بئله گئتسه نه یازیچی قالاجاق، نه کتاب، و نه دیل! میتوسدان لوگوسا کؤچمک ایمکانسیز اولاجاق.
- قاداسی! کتاب دا دونیادا یارانان باشقا اورونلره تای رئکلام اولمالی دیر. اونون دا اؤزونه اؤزل اورونلمه، رئکلام، و ساتیش یوللاری وار. میللتی قیناماق یئرینه و اونلاری کیتاب ساتیش ائولرینه چکیب گتیرمکدن داها یاخجی، کیتابلاری اونلارین ائولرینه قوناق ائتمک دیر. نه یاخجی کی دیلیمزین اوخول‌لاردا یاساقلیقیندا دیل ائلچیلری اولان تورکجه کتابلاریمیزی اوخول‌لارا، مچیدلره، ائولره، و بوتون دونیا کندلرینه قوناق و ائو یییه‌سی ائدک!
سؤز بَیه‌نیلدی. ایشه باشلاماق گره‌کدی. آماج بللی ایدی:
بو یورویوشون (کمپئینین) هدفی هر بیر کنده ایلک باشدا «اوشاق کتاب ائوی» یاراتماق، و سونرا، بو کتاب ائولرینی گئنیشلندیرمک و گنج‌لره اؤزل، اورتایاشلیلارا اؤزل، قادینلار اؤزل، و ... کتاب ائولری یاراتماق دیر. بو کمپئینه قاتیلانلار أن یاخین ایلگی قورا بیلجکلری کندده بیر «اوشاق کتاب ائوی» یاراتمالی دیرلار و سونرا اونون آچیلیش شکیللرینی بیزه گؤندرمه‌لی دیرلر:
1) دونیانین هر بیر کندینده اوشاقلار اوچون بیر تورک کتاب ائوی‌نین یارانماغی
2) تورک یازیچیلارینی اوشاقلارا کتاب یازیب، یاراتمایا ماراقلاندیرماق
3) تورک کتاب یایین، یاییم، و ساتیش ائولرینه آرخا دوروب، اونلاری ساوونوب، اونلاردان حمایت ائتمک
4) اوشاقلاری تورکجه کتابلار ایله تانیش ائدیب، اونلاری تورک دیلی، ادبیاتی، کولتورو، فولکلورو، هونری، و ... ایله داها آرتیق ایلگیلندیرمک
بو یورویوشون آماجلاریندان دیر.

قوتسال آماج‌لار ایله قوتسال بیر حرکت باشلانیر. بو حرکت باشلانمازدان اؤنجه، «ککیللی» آدلی بیر قوش، کندلره کتاب آپارماقدا ایدی. ککیللی‌نین "دیلیمزی-توپراقیمیزی قورویاق!" سسی ایله بوتون تورک کتابلاری جانلانمایا باشلادیلار و کندلره دوغرو دیلیمیزی ساوونماق اوچون یولچولوق باشلاندی. بو کتابلاری و کتاب داشییجیلاری بیر سیرا سوروشمالار جئوره‌له‌میشدی:
تورکجه کتاب آلماساق، تورکجه کتاب ائولرینی قورماساق نه اولار؟
1) تورکجه کتاب یازانلار بیر داها تورکجه کتاب یازمازلار!
2) تورکجه کتاب یایینلایانلار بیر داها تورکجه کتاب یایینلامازلار!
3) تورکجه کتاب یاییملایانلار بیر داها تورکجه کتاب یاییملامازلار!
4) تورکجه کتاب ساتانلار بیر داها تورکجه کتاب ساتمازلار!
5) ...

تورکجه کتابلار یازیلماسا، یایینلانماسا، یاییملانماسا، ساتیلماسا نه اولار؟
1) اوشاقلاریمیز تورکجه کتاب آلیب، اوخویانمازلار.
2) تورک دیلی، ادبی، کولتورو، فولکلورو، هونری، و ... انکشاف تاپماز! اؤلر!
3) انکشاف تاپمایان و اؤلن دیلین یئرینه باشقا دیللر یئرلشر!
4) یازیچیلاریمیز یایینلانان، یاییملانان، و ساتیلان باشقا دیللرده کتابلار یازمایا باشلارلار!
5) ...

بو سوروشمالار آیاقیمیزدان یاپیشماق یئرینه، ألیمیزدن یاپیشدیلار و بیزی تورک دیلی بئشیگی اولان کندلره آپاردیلار. ایلک باشدا، هئریسین کندلری‌نین بیریسینه کتاب آپاریلدی. بیر آی کئچمزدن 2-جی کتاب گزیسی اهرین کندلری‌نین بیریسینه باشلاندی و گنج قوناق کتابلار کندلر ایله قوشا قاریماق اوچون، کندده ائو یییه‌سی اولدولار. ایندی، 3-جو کنده کتاب کؤچمه‌سی باشلانماقدادیر و یاخین گلجکده، اوجا گؤیوللرین زیروه‌سیندن آخان سئلین ائل گوجو ایله، تبریزین کتاب ساتیش ائولریندن بیر باشقا کنده کتابلار آخیناجاق. بو بیر باشلانقیج دیر کتابلارین ساتیلماغینا، یازارلارین یازماغینا، اوشاقلارین تورکجه اوخوماغینا. نه موتلو باشلاییم دئینلره. آذربایجانا جان دئینسن‌سه، سن ده قوشول بو یورویوشه.

علیرضا فرشی یئکانلی